އީރާނުގެ ނިއުކްލިއާ ޕްރޮގްރާމުގެ މައްސަލާގައި އެމެރިކާ އާއި އީރާނުން ފަށާފައިވާ ވާހަކަތަކުގެ ދެވަނަ ބުރު މިއަދު ފެށުމަށް ތައްޔާރުވެއްޖެއެވެ.

ނިއުކްލިއާ މައްސަލާގައި އެމެރިކާ އާއި އީރާނާ ދެމެދު ވާހަކަތަކުގެ ފުރަތަމަ ބުރު މިދިޔަ ހޮނިހިރުދުވަހު ކުރިއަށްގެންގޮސްފައިވާއިރު، ދެ ޤައުމުގެ ދެމެދުގައި ވާހަކަތައް ކުރިއަށްގެންދަނީ ނުސީދާ ގޮތެއްގައެވެ. މި ވާހަކަތަކުގެ މެދުވެރިއެއްގެ ބައި އަދާކުރަނީ އޮމާނުންނެވެ. 

އެމެރިކާ އާއި އީރާނާ ދެޤައުމުގެ ދެމެދުގައި ކުރިއަށްދާ ނުސީދާ ވާހަކަތަކުގެ ދެވަނަ ބުރުގެ ވާހަކަތައް ފެށުމަށް އީރާނުގެ ހާރިޖީ ވަޒީރު އައްބާސް އަރްގްޗީ މިހާރު ހުންނެވީ އިޓަލީގެ ރޯމްގައެވެ. މެދުއިރުމަތީގެ ބައެއް ހަބަރުތައް ބުނާގޮތުގައި މިއަދުގެ ބައްދަލުވުމުގައި އީރާނުން ޔޫރޭނިއަމް ފައްކާކުރަމުންގެންދާ ވާހަކަތަކާ ގުޅޭގޮތުން މަޝްވަރާކުރާނެއެވެ. ނަމަވެސް އީރާނުގެ މީޑިއާތަކުން ވަނީ އެވާހަކަތައް ދޮގުކޮށްފައެވެ. އީރާނުގެ މީޑިއާތަކުން ބުނެފައިވަނީ، އީރާނުގެ ނިއުކްލިއާ ޕްރޮގްރާމް ހަނިކުރުމާ ގުޅޭގޮތުން ދައްކާ އެއްވެސް ވާހަކަތަކަކަށް އެޤައުމުގެ އޮފިޝަލުން ތާއީދެއް ނުކުރާނެއެވެ.

އީރާނު ސަރުކާރުންވެސް ވަނީ މީގެ ކުރިން މިމޭރުމުން ވާހަކަދައްކާފައެވެ. އީރާނުން ނިއުކްލިއާ ވާހަކައިގައި އީރާނަށް ދިން އިންޒާރުތަކާ ގުޅޭގޮތުންވެސް އެޤައުމުން ބުނެފައިވަނީ އީރާނުން ފަނާކުރަނިވި ހަތިޔާރު އުފައްދައިގެން ބާރުގަދަ ކުރުމުގެ ގޮތުން އެއްވެސް މަސައްކަތެއް ކުރަމުން ނުގެންދާކަމަށާއި، ނިއުކްލިއާ ބޭނުންކުރަނީ އެހެން ޤައުމުތަކެކޭ އެއްގޮތަށް ޤައުމުގެ އުފެއްދުންތެރިކަމުގައި އެކަނިކަމަށެވެ.

އީރާނުގެ ނިއުކްލިއާ މައްސަލާގައި ދެ ޤައުމުގެ ދެމެދުގައި ހަނގުރާމައެއް ފެށިދާނެކަމުގެ ބިރު ހީވެފައިވަނިކޮށް، ދެ ޤައުމުން ނުސީދާ ވާހަކަތައް ފެށުމާއެކު، މިހާރު ވަނީ ދެ ޤައުމުގެ ގުޅުން ކޮންމެވެސް ވަރަކަށް ހަމައަކަށް އެޅިފައެވެ. ނަމަވެސް އީރާނުން ހޫޘީންނަށް ވާގިވެރިވާ މައްސަލާގައި އެމެރިކާ އާއި އީރާނުގެ ގުޅުން އަދިވެސް އޮތީ ނުރައްކާތެރި ފައްތަރެއްގެ ތެރޭގައެވެ.