ވެނެޒުއެލާގެ ގައިދީންތަކެއް އެމެރިކާއިން ޑީޕޯޓްކުރަން، އެގައުމުގެ ރައީސް ޑޯނަލްޑް ޓްރަމްޕް ނިންމި ނިންމުން ތަންފީޒް ކުރުން ވަގުތީގޮތުން ހުއްޓާލުމަށް އެގައުމުގެ ސްޕްރީމް ކޯޓުން ހުކުމް ކޮށްފިއެވެ. 

އެ ކޯޓުން މިފަދައިން އަމުރު ނެރެފައިވަނީ 1798 ވަނަ އަހަރުގެ އޭލިއަން އެނެމީސް އެކްޓްގެ ދަށުން އެ މީހުންނާމެދު ޢަމަލުކުރެވިފައިވާ ގޮތާ ގުޅިގެން ޤާނޫނީ އިޖުރާއަތުތަކާ ގުޅޭ ކަންބޮޑުވުންތަކެއް ހުރުމާ ގުޅިގެން ކަމަށް ބުނެފައިވެއެވެ.

މި ބަންންދުކުރެވިފައިވާ މީހުންނަކީ ވެނެޒުއެލާގެ ގޭންގު ކަމަށްވާ ޓްރެން ދެ އަރަގުއާއާ ގުޅުން ހުރި ކަމަށް ތުހުމަތުކުރެވޭ ބައެކެވެ. މިހާރު އެ މީހުން ތިބީ އުތުރު ޓެކްސާސްގައި ބަންދުކުރެވިފައެވެ. އަދި އެލް ސަލްވަޑޯގެ ސެކޯޓް ޖަލަށް ފޮނުވުމަށް ހަހަމަޖެހިފައިވެއެވެ.

އެމެރިކަން ސިވިލް ލިބަރޓީސް ޔޫނިއަން (އޭސީއެލްޔޫ) އިން ބުނެފައިވަނީ މި މީހުން ޤައުމުން ބޭރުކުރުމަށް ނިންމާފައިވަނީ ޝަރުޢީ އަޑުއެހުމެއް ނެތި ކަމަށާއި، އެ މީހުންނަށް ކޯޓެއްގައި އިއުތިރާޒުކުރުމުގެ ފުރުޞަތު ދީފައިނުވާ ކަމަށެވެ. މިއީ ޤާނޫނީ ގޮތުން ގޮންޖެހުމެއް ކަމަށް އޭސީއެލްޔޫ އިން ބުނެފައިވެއެވެ.

އޭލިއަން އެނެމީސް އެކްޓަކީ ދެވަނަ ބޮޑު ހަނގުރާމައިގެ ފަހުން ބޭނުންކޮށްފައިނުވާ ޤާނޫނެކެވެ. މި ޤާނޫނުގެ ދަށުން އެމެރިކާގެ ރައީސަށް ވަރަށް ފުޅާ ބާރުތަކެއް ލިބިދެއެވެ. އެގޮތުން ޤައުމަށް ނުރައްކާވާނެ ކަމަށް ބެލެވޭ ޤައުމުތަކުގެ މީހުން ހައްޔަރުކޮށް ޤައުމުން ބޭރުކުރުމުގެ ބާރު ލިބިދެއެވެ.

ރައީސް ޑޮނަލްޑް ޓްރަމްޕް މި ޤާނޫނު ބޭނުންކުރަން ފެށީ މާރިޗު މަހުގައެވެ. އެއީ ވެނެޒުއެލާއިން ގޭންގު މެންބަރުން ކަމަށް ތުހުމަތުކުރެވޭ މީހުން އަވަހަށް ޤައުމުން ބޭރުކުރުމަށްޓަކައެވެ. ޓްރަމްޕް ވަނީ ވެނެޒުއެލާއަކީ ޤައުމީ ސަލާމަތަށް ނުރައްކަލެއް ކަމަށް ލޭބަލްކޮށްފައެވެ.

ސީބީއެސް ނިއުސްއަށް އިސް އޮފިޝަލަކު ބުނެފައިވާ ގޮތުގައި އޭޕްރިލް 8 ގެ ނިޔަލަށް 261 ވެނެޒުއެލާގެ މީހުން އެމެރިކާއިން ބޭރުކޮށްފައިވެއެވެ. އޭގެ ތެރެއިން 137 މީހުން ބޭރުކޮށްފައިވަނީ އޭލިއަން އެނެމީސް އެކްޓްގެ ދަށުންނެވެ.