21 ޖޫން 2022ގައި ބައިނަލްއަގުވާމީ ޔޯގާ ދުވަސް ފާހަގަކުރުމަށް ގަލޮޅު ދަނޑުގައި ބޭއްވި ހަރަކާތް ހުއްޓުވުމުގެ ތެރެއިން ހިނގި ހަމަނުޖެހުމާ ގުޅިގެން ހައްޔަރުކުރި ދީނީ ދެ ޢިލްމުވެރިން ކަމުގައިވާ ޝެއިޚް ފަޟުލޫން ބިން މުހައްމަދު އާއި ޝެއިޚް އާދަމް ނިޝާން އަށް ކޮށްފައިވާ ދައުވާގެ އަޑުއެހުމެއް މިއަދު ބޭއްވުމަށް ތާވަލްކޮށްފިއެވެ.

މި މައްސަލައިގެ އަޑުއެހުން ބާއްވަން ހަމަޖެހިފައިވަނީ މިއަދު މެންދުރު 1:00 ގައެވެ. މި މައްސަލާގައި ދެ ޝެއިޚުންގެ މައްޗަށްވެސް ކުރަނީ ޓެރަރިޒަމްގެ ޢަމަލެއް ކުރުމަށް ހިތްވަރުދިނުމުގެ ކުށުގެ ދަޢުވާއެވެ. 

މި މައްސަލައިގެ އަޑުއެހުންތައް ކްރިމިނަލް ކޯޓުގައި މަޑުޖެހިފައި ކަހަލަ ގޮތަކަށް އޮވެފައި މިއަދު އަޑުއެހުމެއް ތާވަލްކުރި އިރު، އެންމެ ފަހުން އަޑުއެހުމެއް ތާވަލްކުރެވުނީ މިދިޔަ އަހަރުގެ އޮގަސްޓްމަހުގެ ތެރޭގައެވެ. 

އެ އަޑުއެހުން ކެންސަލްވީ ދެ ޝެއިޚުންގެ ވަކީލުންގެ ތެރެއިން އެކަކަށް ހާޒިރު ނުވެވުމުންނެވެ. އެ އަޑު އެހުމުގެ ކުރިން އަޑުއެހުމެއް ތާވަލް ކުރެވުނީ، 2023 ވަނަ އަހަރުގެ ފެބްރުއަރީ މަހުގައެވެ. 

މި މައްސަލަ ކުރިއަށްދިޔުން ލަސްވާތީ ޝެއިޚް ނިޝާން ވަނީ އެކަމާ ކަންބޮޑުވުން ފާޅުކުރައްވައި މިއަދު މީސްމީޑިއާގައި ޕޯސްޓެއްވެސް ކުރައްވާފައެވެ. 

އެގޮތުން ޝެއިޚް ވަނީ، އަހަރަކު 1 ފަހަރު އަޑުއެހުން ތާވަލު ކުރުމުގެ ބަދަލުގައި މިމައްސަލަ ވީހާވެސް އަވަހަށް ކުރިޔަށް ގެންގޮސްދިނުމަށް ޖުޑިޝަރީއަށް ގޮވާލައްވާފައެވެ. 

އަދި މިއީ އެއްވެސް އަޞްލެއް ނެތް ބާތިލު ދަޢުވާއެއްކަން ޘާބިތުކޮށްދޭން ވަރަށް ޘާބިތުކަމާއެކު ތިއްބެވި ކަމަށްވެސް ވިދާޅުވިއެވެ.

ޝެއިޚް ނިޝާން އިތުރަށް ވިދާޅުވީ، މިސަރުކާރު އައިސް، އައު ޕީޖީއެއް ޢައްޔަނުކޮށް، މުރާޖަޢާ (ރިވިއު) ކުރަން ބޭނުންވާ މައްސަލަތައް ހުށައެޅުމަށް ހުޅުވާލުމުން، އެކަމަކަށް ހުށައަޅައިގެން އަދިވެސް މައްސަލައިގާ އެއްވެސް ޚަބަރެއް ނުވާކަމަށެވެ.

މި މައްސަލާގައި ޝެއިޚުންގެ މައްޗަށް ކޮށްފައިވާ ދައުވާ ސާބިތުވެއްޖެ ނަމަ،  10 އަހަރާއި 15 އަހަރާ ދެމެދުގެ މުއްދަތުގެ ޖަލު ހުކުމެއް އަންނާނެ އެވެ.