21 ޖޫން 2022ގައި ބައިނަލްއަގުވާމީ ޔޯގާ ދުވަސް ފާހަގަކުރުމަށް ގަލޮޅު ދަނޑުގައި ބޭއްވި ހަރަކާތް ހުއްޓުވުމުގެ ތެރެއިން ހިނގި ހަމަނުޖެހުމާ ގުޅިގެން ހައްޔަރުކުރި ދީނީ ދެ ޢިލްމުވެރިން ކަމުގައިވާ ޝެއިޚް ފަޟުލޫން ބިން މުހައްމަދު އާއި ޝެއިޚް އާދަމް ނިޝާން އަށް ކޮށްފައިވާ ދައުވާ މުރާޖާ ކޮށް ނިމެންދެން ޝަރީޢަތް މަޑުޖައްސާލައިފިއެވެ.

މި މައްސަލާގައި ދެ ޝެއިޚުންގެ މައްޗަށްވެސް ކުރަނީ ޓެރަރިޒަމްގެ ޢަމަލެއް ކުރުމަށް ހިތްވަރުދިނުމުގެ ކުށުގެ ދަޢުވާއެވެ.

އަޑުއެހުމެއް ނުބޭއްވޭތާ ގާތްގަނޑަކަށް ދެ އަހަރު ވުމަށްފަހު، މިއަދު ކްރިމިނަލް ކޯޓުގައި ބޭއްވި މި މައްސަލައިގެ އަޑު އެހުމުގެ ދެ ޝެއިޚުންގެ ފަރާތުން ވަނީ، މައްސަލަ މުރާޖަޢާ ކުރަން ޕީޖީ އޮފީހަށް ހުށަހަޅާފައި އޮތުމުން، އެކަމުގައި އެ އޮފީހުން ނިންމާ ގޮތެއް ބެލުމަށްފަހު މައްސަލަ ކުރިއަށް ގެންދިޔުމަށް އެދިލައްވާފައެވެ.

އެއާއެކު ޕީޖީގެ ވަކީލުން ވެސް ވަނީ އެކަމަށް އެއްބަސްވެ، ހަފްތާއެއްގެ ތެރޭގައި ކޯޓަށް ވަކި ގޮތެއް އަންގަވާނެ ކަމަށް ވިދާޅުވެފައެވެ. އެހެން ކަމުން، ގާޒީ ވަނީ ޕީޖީން ވަކި ގޮތެއް އަންގަންދެން މައްސަލަ މަޑު ޖައްސާލަން ނިންމަވާފައެވެ. 

މި މައްސަލައިގެ އަޑުއެހުންތައް ކްރިމިނަލް ކޯޓުގައި މަޑުޖެހިފައި ކަހަލަ ގޮތަކަށް އޮވެފައި މިއަދު އަޑުއެހުމެއް ބޭއްވި އިރު، އެންމެ ފަހުން އަޑުއެހުމެއް ތާވަލްކުރެވުނީ މިދިޔަ އަހަރުގެ އޮގަސްޓްމަހުގެ ތެރޭގައެވެ. 

އެ އަޑުއެހުން ކެންސަލްވީ ދެ ޝެއިޚުންގެ ވަކީލުންގެ ތެރެއިން އެކަކަށް ހާޒިރު ނުވެވުމުންނެވެ. އެ އަޑު އެހުމުގެ ކުރިން އަޑުއެހުމެއް ތާވަލް ކުރެވުނީ، 2023 ވަނަ އަހަރުގެ ފެބްރުއަރީ މަހުގައެވެ. 

މި މައްސަލަ ކުރިއަށްދިޔުން ލަސްވާތީ ޝެއިޚް ނިޝާން ވަނީ އެކަމާ ކަންބޮޑުވުން ފާޅުކުރައްވައި މިއަދު މީސްމީޑިއާގައި ޕޯސްޓެއްވެސް ކުރައްވާފައެވެ. 

މި މައްސަލާގައި ޝެއިޚުންގެ މައްޗަށް ކޮށްފައިވާ ދައުވާ ސާބިތުވެއްޖެ ނަމަ، 10 އަހަރާއި 15 އަހަރާ ދެމެދުގެ މުއްދަތުގެ ޖަލު ހުކުމެއް އަންނާނެ އެވެ.