ކަޝްމީރުގެ ރަށެއްކަމަށްވާ ބަހަލްގަމްގައި ދިން ހަމަލާތަކަށްފަހު، އިންޑިއާ އާއި ޕާކިސްތާނާ ދެމެދު އޮތް ގުޅުން ވަރަށްބޮޑަށް ގޯސްވެ، ޕާކިސްތާނުން އިންޑިއާ އާއެކު އޮތް ވިޔަފާރީގެ ގުޅުންތައް ކަނޑާލައިފިއެވެ.
މިދިޔަ އަންގާރަދުވަހު ފަތުރުވެރިންގެ ބަޔަކަށް އަމާޒުކޮށްދިން އެ ހަމަލާތަކަށްފަހު އިންޑިއާ އާއި ޕާކިސްތާނު ދެޤައުމުގެ ދެމެދު ބަހުގެ ހޫނު ހަމަލާތަކެއް އަންނަނީ ބަދަލުކުރަމުންނެވެ. އިންޑިއާއިން މި ހަމަލާގެ ޒިންމާ އަޅުވަނީ ޕާކިސްތާނު ސަރުކާރުގެ ބޮލުގައެވެ. ނަމަވެސް ޕާކިސްތާނުން ވަނީ އިންޑިއާއިން ކުރާ ތުހުމަތުތައް ދޮގުކޮށްފައެވެ. ޕާކިސްތާނުން ބުނެފައިވަނީ ކަޝްމީރުގެ ބަހަލްގަމްގައި ދިން ހަމަލާގައި އެޤައުމުގެ އެއްވެސް އަތެއް ނޯންނާނެ ކަމަށެވެ.
އަލްޖަޒީރާއިން މީގެ ކުޑައިރުކޮޅެއް ކުރިން ބުނެފައިވަނީ، ޕާކިސްތާނުން އިންޑިއާއާ އެކު އޮތް ވިޔަފާރީގެ ގުޅުންތައް ވަގުތީގޮތުން ނިމުމަކަށް ގެނެސްފައިވާކަމަށެވެ. މީގެ އިތުރުން އިންޑިއާގައި ތިބި ޕާކިސްތާނުގެ އޮފިޝަލުންވެސް ކުރިއަށްއޮތް ދުވަހުގެ ތެރޭގައި އެނބުރި ޕާކިސްތާނަށް އައުމަށް އެޤައުމުގެ ސަރުކާރުން އަންގާފައިވާކަމަށް އަލްޖަޒީރާއިން ބުންޏެވެ. މީގެ އިތުރުން ޕާކިސްތާނުން އިންޑިއާގެ ރައްޔިތުންނަށް ވިސާ ދިނުންވެސް ހުއްޓާލާފައިވާއިރު، އެޤައުމުގެ ވައިގެ ސަރަހައްދު ބޭނުންކުރުންވެސް މަނާކޮށްފައިވާކަމަށް އަލްޖަޒީރާއިން ބުންޏެވެ.
އިންޑިއާގެ ބައެއް މީޑިއާތަކުން ބުނާގޮތުގައި އިންޑިއާއިންވެސް ވަނީ ޕާކިސްތާނާ ދެކޮޅަށް ފިޔަވަޅުތައް އެޅުމަށް ނިންމާފައެވެ. ނަމަވެސް މިކަމުގެ ތަފްސީލެއް އަދި އިންޑިއާ ސަރުކާރަކުން ހާމަކޮށްފައެއް ނުވެއެވެ. ބަހަލްގަމްގައި ދިން ހަމަލާތަކަށްފަހު އިންޑިއާގެ ބޮޑުވަޒީރު ނަރެންދުރަ މޯދީ ވަނީ ޓެރަރިސްޓުންނަށް ފިލާ ނުތިބެވޭނޭކަމަށް ވިދާޅުވެފައެވެ. އިންޑިއާއިން ތުހުމަތުކުރާ ގޮތުގައި ހަމަލާތައް ދީފައިވަނީ، ކަޝްމީރު މިނިވަންކުރުމުގެ ނަމުގައި ހަރަކާތްތެރިވާ ޕާކިސްތާނަށް ނިސްބަތްވާ ކަނާތުފިޔައިގެ ހަނގުރާމަވެރި ޖަމާއަތެއްކަމަށްވާ ލަސްކަރޭ ތައިބާއެވެ.
ބަހަލްގަމްގައި ބަޑިން ދިން ހަމަލާތަކުގައި 26 މީހަކު މަރާލާފައިވާއިރު 40 ހަށްވުރެ ގިނަ މީހުން ޒަހަމްވިއެވެ. މިއީ މި ފަހަކަށްއައިސް ކަޝްމީރުގެ އިންޑިއާ ކޮންޓްރޯލްކުރާ ސަރަހައްދުގައި ދިން މިފަދަ އެންމެ ނުރައްކާތެރި ހަމަލާއެވެ. މި ހަމަލާއާ ގުޅިގެން އެ ސަރަހައްދުގެ ހުރިހާ ހިދުމަތެއްކަހަލަ ގޮތަކަށް އޮތީ ހުއްޓިފައެވެ. ނަމަވެސް މިއަދު ބައެއް ފިހާރަތައް ހުޅުވާފައިވާކަމަށް އިންޑިއާގެ ބައެއް ނޫސްތަކުން ބުނެއެވެ.
Advertisement
This content is created and paid for by advertisers and does not involve Voice Journalists
