އިންޑިޔާގެ ބާރުގެ ދަށުގައިވާ ކަޝްމީރުގެ ޕަހަލްގާމް ސަރަޙައްދުގައި ހިނގި ހަމަލާއެއްގައި 26 މީހުން މަރުވުމާ ގުޅިގެން އިންޑިޔާއިން ޕާކިސްތާނާ ދެކޮޅަށް ހަރުކަށި ފިޔަވަޅުތަކެއް އަޅައިފިއެވެ.

މި ފިޔަވަޅުތަކުގެ ތެރޭގައި ދެޤައުމުގެ މައިގަނޑު ބޯޑަރު ބަންދުކުރުމާއި، 1960 އިން ފެށިގެން ދެމިއޮތް އިންޑަސް ފެން ބެހުމުގެ މުއާހަދާ ހުއްޓާލުމާއި، ޕާކިސްތާނުގެ ޑިޕްލޮމެޓުން ބޭރުކުރުން ހިމެނެއެވެ.

އިންޑިޔާގެ ބޮޑުވަޒީރު ނަރެންދްރަ މޯދީ ބުނެފައުވަނީ މި "ނުބައި ޢަމަލު" ހިންގި ފަރާތްތަކަށް އަދަބު ދެވޭނެ ކަމަށާއި، ޓެރަރިޒަމާ ދެކޮޅަށް ކުރާ މަސައްކަތް އިތުރަށް ހަރުދަނާ ކުރާނެ ކަމަށެވެ. އިންޑިޔާއިން ދެކޭގޮތުގައި މި ހަމަލާގައި ޕާކިސްތާނުގެ ނުސީދާ ދައުރެއް އެބައޮތެވެ. ނަމަވެސް ޕާކިސްތާނުން މިކަން ވަރަށް ހަރުކަށި ގޮތެއްގައި ދޮގުކޮށްފައިވެއެވެ.

Advertisement

މި ހަމަލާއަކީ ފަހުގެ ތާރީޚެއްގައި ކަޝްމީރުގައި ހިނގި އެންމެ ނުރައްކާތެރި ހަމަލާތަކުގެ ތެރެއިން އެކެކެވެ. މިކަމުގެ ސަބަބުން ކުރިން ވެސް ގޯސްވެފައިވާ ދެޤައުމުގެ ގުޅުން އިތުރަށް ގޯސްވެދާނެ ކަމަށް ބެލެވެއެވެ.

ކަޝްމީރަކީ 1947 ގައި އިންޑިޔާ ބައިބައިވެ ޕާކިސްތާން އުފެދުނީއްސުރެ ދެޤައުމުގެ މެދުގައި ޚިލާފު އުފެދިފައިވާ ސަރަޙައްދެކެވެ.

ޕާކިސްތާނުގެ ފޮރިން މިނިސްޓަރު ވިދާޅުވެފައިވަނީ އިންޑިޔާއިން އަޅާފައިވާ ފިޔަވަޅުތަކާ ގުޅޭގޮތުން ޖަވާބުދާރީވުމަށް ބުރާސްފަތި ދުވަހު ބައްދަލުވުމެއް ބާއްވާނެ ކަމަށެވެ. އަދި އިންޑިޔާގައި ތިބި ބައެއް ޕާކިސްތާނު ރައްޔިތުންނަށް 48 ގަޑިއިރުގެ ތެރޭގައި އެޤައުމު ދޫކޮށް ދިއުމަށް އަންގާފައިވާ ކަމަށް ވެސް ބުނެފައިވެއެވެ.