އާލިއޯ އޯލިއޯ އަކީ ގިނަ ބަޔަކަށް މީރު، ތައްޔާރުކޮށްލަންވެސް މާ އުނދަގޫ ނޫން ކެއުމެކެވެ. މި ހުކުރު ވޮއިސްގެ ބަދިގެއިން މި ގެނެސްދެނީ މީރުކޮށް ޗިކަން މަޝްރޫމް އާލިއޯ އޯލިއޯ ހަދާނެ ގޮތެވެ.

2 ޖޯޑު ކުދިކޮށް ކޮށާފައި ހުރި ބޯންލެސް ކުކުޅު

1 ދަޅު މަޝްރޫމް (ކުދިކޮށް ކޮށާފައި)

10 ބޮޑު ލޮނުމެދު (ކުދިކޮށް ކޮށާފައި)

10 ހިކިމިރުސް (ނޫނީ ބޭނުން ވަރަކަށް)

ސްޕެގެޓީ ބޮނޑިއެއް

2 ސައިސަމުސާ ލޮނު (ސްޕެގެޓީ ކައްކަން)

1/2 ޖޯޑު އޮލިވް އޮއިލް

1 ނޫޑްލްސް ސޫޕް ޕެކެޓް

ހިކަނދި ފަތް

ފެން

1/2 ސައި ސަމުސާ އަސޭމިރުސް

2 ޓޮމާޓޯ (ކިޔުބްކޮށް ކޮށާފައި)

ތެޔޮ (ކުކުޅު ކޮޅު ތެލުލަން) 

1) ލޮނުކޮޅަކާއި އަދި އަސޭމިރުސް ލައިގެން ކުކުޅު މަސްކޮޅު 5 މިނެޓް ވަރު ވަންދެން މެރިނޭޓް ކޮށްލާށެވެ. ދެން ތެޔޮ ފޮދުގެ ތެރޭގައި ތެލުލާލާށެވެ. 

2) އެއަށްފަހު، ފެނާއި، ލޮނާއި، ކުޑަ ތެޔޮ ފޮދެއް އަޅައިގެން ފެން އެތި ކައްކާލާށެވެ. ފެން ކެކެން ފެށުމުން ސްޕެގެޓީ ކޮޅު އަޅާލައިގެން ސްޕެގެޓީ މަޑު ވަންދެން ކައްކާލާށެވެ. 

3) ބޮޑު ތެއްޔަކަށް އޮލިވް އޮއިލްކޮޅު އަޅާ ހޫނު ކުރާށެވެ. ތެޔޮ ހޫނު ވީމައި ލޮނުމެދުކޮޅު އަޅާށެވެ. ލޮނުމެދުކޮޅަށް ރަންކުލަ އަރައި ކުޑަކޮށް މުރަނަ ވަންދެން މެދު ގިނީގައި ކައްކާށެވެ. ދެން ޓޮމާޓޯއާއި، މަޝްރޫމާއި، ހިކަނދިފަތާއި ހިކިމިރުސް އަޅާފައި 2-3 މިނިޓުވަންދެން އަނެއްކާވެސް ކައްކާލާށެވެ. ކައްކަމުން ދާއިރު ގެންދަންވާނީ ހުރިހާ އެއްޗެއް އެއްކުރަމުންނެވެ.

4) ދެން، ތެލުލާފައި ހުރި ކުކުޅުކޮޅާއި ނޫޑްލްސް ސޫޕް ކޮޅު އެ ތެއްޔަށް އަޅާފައި ރަނގަޅަށް އެއްކޮށްލާށެވެ. ދެން 2 މިނިޓުވަރު ހުރިހާ އެއްޗެއް އެއްކުރަމުން ކައްކާލާށެވެ.

5) ފަހު ކަމަކަށް، ސްޕެގެޓީކޮޅު ތެއްޔަށް އަޅާ އެއްކޮށްލާށެވެ. އެއަށްފަހު 2 މިނެޓް ވަރު ކައްކާލާށެވެ. 

ޗިކަން މަޝްރޫމް އާލިއޯ އޯލިއޯ އެހުރީ ތައްޔާރު ވެފައެވެ.