ޕަހަލްގާމް ޓެރަރިސްޓް ހަމަލާއާ ގުޅިގެން އިންޑިއާއިން ވެސް ޕާކިސްތާނާއެކު ކުރަމުން އައި ހުރިހާ ވިޔަފާރިއެއް ރަސްމީކޮށް ހުއްޓާލައިފިއެވެ. މި ހަމަލާއާއި ގުޅިގެން ޕާކިސްތާނުން އިއްޔެ ވަނީ އިންޑިޔާއާއެކު ވިޔަފާރީގެ ގުޅުން ވަގުތީގޮތުން ނިމުމަކަށް ގެނެސްފައެވެ.
ގްލޯބަލް ޓްރޭޑް ރިސަރޗް އިނިޝިއޭޓިވް (ޖީޓީއާރްއައި) ގެ ރިޕޯޓެއްގައި ބުނެފައިވާ ގޮތުގައި ތިންވަނަ ޤައުމުތައް މެދުވެރިކޮށް ނުރަސްމީ ގޮތުން ދެގައުމުގެ ދެމެދުގައި ވިޔަފާރި ކުރިއަށް ދާނެއެވެ.
ހުކުރު ދުވަހު އިންޑިއާ ސަރުކާރުން މި ނިންމުން ނިންމާފައިވަނީ ޕަހަލްގާމްގައި ހިނގި ޓެރަރިސްޓް ހަމަލާގައި އިންޑިއާގެ ފަތުރުވެރިން މަރުވުމާ ގުޅިގެންނެވެ. މިކަމުގެ ސަބަބުން ދެ ޤައުމުގެ ދެމެދުގައި އޮތް ސިޔާސީ ގުޅުން ވަނީ އިތުރަށް ގޯސްވެގެން ގޮސްފައެވެ.
ޖީޓީއާރްއައި ގެ ރިޕޯޓުގައި ބުނެފައިވާ ގޮތުގައި ރަސްމީ ވިޔަފާރި ހުއްޓުނު ނަމަވެސް އިންޑިއާގެ މުދަލަށް ޕާކިސްތާނުގައި އޮންނަ ޑިމާންޑް ނުހުއްޓޭނެއެވެ. އެހެންކަމުން ޕާކިސްތާނުން އިންޑިއާގެ މުދާ ގަންނާނީ ތިންވަނަ ޤައުމުތައް މެދުވެރިކޮށް، އަގުބޮޑުކޮށް ކަމަށް ބެލެވެއެވެ.
"ކުރުގޮތަކަށް ބުނާނަމަ، ބޯޑަރު ބަންދުކުރުމުން ހުއްޓޭނީ ރަސްމީ ވިޔަފާރި އެކަނި. ޑިމާންޑެއް ނުހުއްޓޭނެ. ޕާކިސްތާނުން އިންޑިއާގެ މުދާ ގަތުން ކުރިއަށް ގެންދާނެ. އެކަމަކު އަގު ބޮޑުކޮށް، އަދި ތިންވަނަ ޤައުމުތައް މެދުވެރިކޮށް،" ޖީޓީއާރްއައި އިން ބުނެފައިވެއެވެ.
ކަޝްމީރުގެ ޕަހަލްގާމް ސަރަޙައްދުގައި ދެވުނު ހަމަލާއެއްގައި 26 މީހުން ވަނީ މަރުވެފައިވާއިރު، އެ މައްސަލާގައި ދެގައުމުގެ ދެމެދުގައިވާ ބޯޑަރ ވަނީ ބަންދުކޮށްފައެވެ.
އިންޑިޔާގެ ބޮޑުވަޒީރު ނަރެންދްރަ މޯދީ ބުނެފައުވަނީ މި "ނުބައި ޢަމަލު" ހިންގި ފަރާތްތަކަށް އަދަބު ދެވޭނެ ކަމަށާއި، ޓެރަރިޒަމާ ދެކޮޅަށް ކުރާ މަސައްކަތް އިތުރަށް ހަރުދަނާ ކުރާނެ ކަމަށެވެ.
އިންޑިޔާއިން ދެކޭގޮތުގައި މި ހަމަލާގައި ޕާކިސްތާނުގެ ނުސީދާ ދައުރެއް އެބައޮތެވެ. ނަމަވެސް ޕާކިސްތާނުން މިކަން ވަރަށް ހަރުކަށި ގޮތެއްގައި ދޮގުކޮށްފައިވެއެވެ.
މި ހަމަލާއަކީ ފަހުގެ ތާރީޚެއްގައި ކަޝްމީރުގައި ހިނގި އެންމެ ނުރައްކާތެރި ހަމަލާތަކުގެ ތެރެއިން އެކެކެވެ. މިކަމުގެ ސަބަބުން ކުރިން ވެސް ގޯސްވެފައިވާ ދެޤައުމުގެ ގުޅުން އިތުރަށް ގޯސްވެދާނެ ކަމަށް ބެލެވެއެވެ.
Advertisement
This content is created and paid for by advertisers and does not involve Voice Journalists
