މިދިޔަ ހުކުރު ދުވަހުގެ ފަތިހު ހެންވޭރުގެ ގެއަކުން 21 އަހަރުގެ ޒުވާން އަންހެނަކު ވެއްޓުނު ހާދިސާ ހިނގުމުގެ ކުރީން އަންހެން މީހާއާ އޭނާއާ އެކު އުޅުނު ފިރިހެން މީހާއާ ދެމެދު ހަމަނުޖެހުމެއް ހިންގި ކަމަށް ފުލުހުން ކޯޓްގައި ބުނެފި އެވެ. 

ހ. މިޓާޒް ގޭގެ ފުރާޅު މައްޗަށް ވެއްޓި އަނިޔާވި، ހައްވާ ޔުމްނު ރަޝީދު އެވެ. އޭނާއާ އެކު އޭގެ ކުރީން އުޅުނީ ރައުދު އަހުމަދު ޒިލާލް އެވެ. އެއީ އުމުރުން 21 އަހަރުގެ ދެ ޒުވާނުންނެވެ.

އެ މައްސަލާގައި ރައުދު ވަނީ ހައްޔަރުކޮށްފަ އެވެ. އަދި ބަންދުގެ މުއްދަތު ޖަހަން ކޯޓަށް ހާޒިރުކުރުމުން ފަސް ދުވަހުގެ ބަންދުގެ މުއްދަތެއް ވަނީ ޖަހާފަ އެވެ.

Advertisement

ފުލުހުން ކޯޓްގައި ބުނީ ތަހުގީގަށް އެެނގިފައިވާ ގޮތުގައި ރައުދު އާއި ޔުމްނު އާ މެދު ހަމަނުޖެހުމެއް އެ ރޭ ހިނގި ކަމަށެވެ. އަދި ޔުމްނު ވެއްޓުނު ހާދިސާއަށް ފަހު އޭގެ މާ ގިނައިރުތަކެއް ނުވަނީސް އޭނާ ކޮބައިތޯ ރައުދުއާ ސުވާލުކުރުމުން ވީތަނެއް ނޭންގޭ ކަމަށާ ވެއްޓުނީ ކަމަށް ބެލެވޭ ކަމަށް ބުނެފައިވާ ކަމަށެވެ. 

ކޯޓް އަމުރުގައި ވަނީ ރައުދު ބަންދުކުރަން އަމުރުދިން ސަބަބުތައް ތަފްސީލުކޮށް ހިމަނާފަ އެެވެ.