އީރާނުގެ ނިއުކްލިއާ މައްސަލާގައި އެމެރިކާއާއެކު އީރާނުން ކުރިއަށްގެންދާ ނުސީދާ ވާހަކަތަކުގެ ތިންވަނަ ބުރު މިއަދު އޮމާނުގައި ފެށުމަށް ތައްޔާރުވެއްޖެއެވެ.

މި ވާހަކަތަކުގައި ބައިވެރިވުމަށް އީރާނުގެ ހާރިޖީ ވަޒީރު، އައްބާސް އަރްގްޗީ ވަނީ އޮމާންގެ ވެރިރަށް މަސްކަޓަށް ވަޑައިގަންނަވާފައެވެ. އީރާނާ އެމެރިކާ ދެމެދު ކުރިއަށްގެންދާ ނުސީދާ ވާހަކަތަކުގެ މެދުވެރިއެއްގެ ބައި އަދާކުރަނީ އޮމާނުންނެވެ. މީގެ ކުރިން ދެ ބުރެއްގެމަތިން ވާހަކަތައް ކުރިއަށްގެންގޮސްފައިވާއިރު، އީރާން އަދި އެމެރިކާއިންވެސް ބުނެފަިއވަނީ މިހާތަނަށް ކުރިއަށްގެންދެވިފައިވަނީ ވަރަށް ބިނާކުރަނިވި ވާހަކަތަަކެއް ކަމަށެވެ. ނަމަވެސް އަދި މިހާތަނަށް ކުރިއަށްގެންދިޔަ ވާހަކަތަކުގެ މާބޮޑު ތަފްސީލެއް އެއްވެސް ފަރާތަކުން ހާމައެއް ނުކުރެއެވެ.

އީރާނާ އެމެރިކާ އާ ދެމެދު ނުސީދާ ވާހަކަތައް ކުރިއަށްގެންދަނީ އެމެރިކާގެ އޮފިޝަލުންނާއި އީރާނުގެ އޮފިޝަލުން ވަކިވަކި ކޮޓަރީގައި ތިއްބަވައިގެންނެވެ. ދެ ފަރާތުން ދައްކާ ވާހަކަތައް އެއްބަޔަކު އަނެއްބަޔަކާ ހިސާބަށް ގެންގޮސްދެނީ އޮމާނުގެ ކަމާ ބެހޭ އޮފިޝަލުންނެވެ. 

Advertisement

އީރާނާ އެމެރިކާ އާ ދެމެދު ނުސީދާ ވާހަކަތައް ފަށާފައިވަނީ، އީރާނުގެ ނިއުކްލިއާ ޕްރޮގްރާމް ހުއްޓާލަންޖެހޭކަމަށް ވިދާޅުވެ އެމެރިކާގެ ރައީސް ޑޮނާލްޑް ޓްރަމްޕް ފުލުފުލުގައި އިންޒާރުދެއްވުމުންނެވެ. ޓްރަމްޕް ވިދާޅުވެފައިވަނީ، އީރާނުން ނިއުކްލިއާ ޕްރޮގްރާމާމެދު ވާހަކަތައް ދައްކައިގެން ނޫނީ އެޤައުމަށް ސަލާމަތެއްނެތްކަމަށް ވިދާޅުވެފައެވެ. ނަމަވެސް އީރާނުން ބުނަމުން އަންނަނީ، އެޤައުމުން ނިއުކްލިއާ ބޭނުންކުރަނީ ފަނާކުރަނިވި ހަތިޔާރު އުފައްދަން ނޫންކަަމަށާއި، އޭގެ ބޭނުން ކުރަނީ އައު އީޖާދުތައް އުފެއްދުމަށް ކަމަށެވެ.

އީރާނާއި އެމެރިކާގެ ވާހަކަތައް ކުރިއަށްގެންދަން ފެށުމާއެކު ދެ ޤައުމުގެ ދެމެދުގައި އޮތް ގުޅުން ރަނގަޅުވިނަމަވެސް، އީރާނުން ހޫޘީންނަށް އެހީވާ މައްސަލާގައި އެމެރިކާއިން އަދިވެސް ދަނީ އެޤައުމަށް ފިއްތުންތައް ކުރިމަތިކުރުވަމުންނެވެ.