ހުޅުމާލެ ފޭސް ދޭއްގައި ސީސީޓީވީ ކެމެރާ ހަރުކުރުމަށްޓަކައި އެކަމަށް ކުރަންޖެހޭ މަސައްކަތްތައް ކުރަމުން އަންނަކަމަށް ދާހިލީ ވަޒީރު އަލީ އިހްސާން ވިދާޅުވެއްޖެއެވެ.

އެންމެފަހުން އޮތް ރައްޔިތުން މަޖިލީހުގައި ހުޅުމާލޭ ފޭސް ދޭކަށް ނިސްބަތްވެ ވަދައިގަންނަވާ މެމްބަރަކު ކުރެއްވި ސުވާލަކަށް ޖަވާބުދެއްވަމުން މިނިސްޓަރު އިހްސާން ވިދާޅުވީ، ހުޅުމާލެ ފޭސް ދޭއްގައި ދިރިއުޅެމުންދާ ރައްޔިތުންގެ ސަލާމަތީ ކަންކަން ރައްކާތެރިކުރުމަށްޓަކައި އެ ވުޒާރާއިން ކުރަންޖެހޭ ކަންކަން ކުރަމުންގެންދާކަމަށެވެ. މިގޮތުން ފޭސް ދޭއްގައި ފުލުހުން ހަރަކާތްތެރިވާ މިންވަރު އިތުރުކުރުމުގެ އިތުރުން ފޭސް ދޭއްގެ އެކި ސަރަހައްދުތަކުގައި ކެމެރާތައް ހަރުކުރުމަށްޓަކައި ކުރަންޖެހޭ މަސައްކަތްތައް ކުރިއަށްދާކަމަށް މިނިސްޓަރު ވިދާޅުވިއެވެ. 

އިހްސާން ވިދާޅުވީ، ފޭސް ދޭއްގައި ކުށްކުރުމުގައި ހަރަކާތްތެރިވާ ކުދިން ފާހަގަކޮށް އެކުދިންނަށް ހިންގަންޖެހޭ ޕްރޮގްރާމްތައް ހިންގުމުގެ މަސައްކަތްވެސް ކުރަމުން އަންނަކަމަށެވެ. ފޭސް ދޭއްގައި ކެމެރާ ހަރުކުރުމުގެ މަސައްކަތް ކުރުމަށްޓަކައި އެކަމުގެ ތައްޔާރީތައް ވަމުން އަންނަކަމަށް މިނިސްޓަރު ވިދާޅުވިއިރު ުލުހުން ވަނީ މިމަހުގެ 22 ވަނަ ދުވަހު ހުޅުމާލޭ ފޭސް ދޭއްގައި ފައިބަރ ކޭބަލް އަޅައިދޭނޭ ބަޔަކު ހޯދުމަށް އިއުލާނުކޮށްފައެވެ. 

Advertisement

ފުލުހުންގެ މި އިއުލާނުގައިވާ މައުލޫމާތު ތަކަށް ބަލާއިރު ފައިބާ ކޭބަލް އަޅަންޖެހެނީ ހުޅުމާލޭ ފޭސް އެކެއްގައި ހުންނަ ފުލުހުންގެ އިމާރާތުން ފެށިގެން ފުލުހުން ފާހަގަކޮށްފައިވާ ސަރަހައްދުތަކަށެވެ. 

ހުޅުމާލެ ފޭސް ދޭއްގެ އާބާދީ 30،000 ހާހުން މަތީގައި އުޅޭއިރު، ހިޔާ ފްލެޓް ސަރަހައްދުގެ ސަލާމަތީ ކަންކަން މިހާރުހުރީ ކަންބޮޑުވާ ހާލަތެއްގައިކަމަށް އެތަނުގައި ދިރިއުޅެމުން އަންނަ ބައެއް ފަރާތްތަކުން ފާހަގަކުރެއެވެ. މިގޮތުން ބައެއް މަގުތަކުން ފޭރުންފަދަ އަމަލުތައް ހިންގުމާއި ސައިކަލް ފަދަ އުލަނދުތައް ވަގަށް ނަގަމުން އަންނަކަންވެސް އެ ސަރަހައްދުގައި އުޅެމުން އަންނަ މީހުން ފާހަގަކުރެއެވެ.