ޓްރަމްޕް އިދާރާއިން 1000 އަށްވުރެ ގިނަ ބޭރުގެ ދަރިވަރުންގެ ވިސާ ބާތިލުކުރުމަށް ނިންމި ނިންމުމާއި ގުޅިގެން އަމާޒުވި ފާޑުކިޔުންތަކާއި ފިއްތުންތަކާއެކު، އެ ނިންމުން އަނބުރާ ގެނެސްފިއެވެ.

މި ނިންމުމަކީ އެމެރިކާގެ ޔުނިވަރސިޓީތަކުގައި ބިރުވެރިކަން އުފެދި، ޤާނޫނީ ގޮންޖެހުންތަކެއް ކުރިމަތިވި ނިންމުމަކަށް ވެގެންދިޔައެވެ. 

އެމެރިކާގެ ޖަސްޓިސް ޑިޕާޓްމަންޓްގެ ވަކީލު އެލިޒަބެތް ކަރްލަން ފެޑެރަލް ކޯޓަކަށް މަޢުލޫމާތު ދެއްވި ގޮތުގައި، އިމިގްރޭޝަން އޮތޯރިޓީތަކުން މިހާރު ވަނީ ބައިނަލްއަޤްވާމީ ދަރިވަރުންގެ ވިސާ މުރާޖަޢާކޮށް ބާތިލުކުރުމަށް އައު އޮނިގަނޑެއް އެކުލަވާލުމުގެ މަސައްކަތް ފަށާފައެވެ.

މި އިޢުލާނު ކުރެވުނީ ކުއްލިއަކަށް އެމެރިކާގައި ކިޔެވުމުގެ ޤާނޫނީ ޙައްޤު ގެއްލުނު ދަރިވަރުންގެ ފަރާތުން 100 އަށްވުރެ ގިނަ މައްސަލަ ކޯޓަށް ހުށަހެޅުމަށްފަހުގައެވެ.

އިންސައިޑް ހަޔަރ އެޑްގެ ހިސާބުތަކުން ދައްކާ ގޮތުގައި މި ނިންމުމުގެ ސަބަބުން ގާތްގަނޑަކަށް 1،800 ދަރިވަރުންނާއި 280 ޔުނިވަރސިޓީއަށް އަސަރުކުރިއެވެ.

މި ވިސާ ބާތިލުކުރުމުގެ ސިޔާސަތުގެ ސަބަބުން މަތީ ތަޢުލީމުގެ ދާއިރާގައި ބިރުވެރިކަމާއި އޮޅުންބޮޅުން އުފެދުނެވެ. އަދި ބަންދުކުރުމާއި އަނބުރާ ފޮނުވާލުމުގެ ބިރުން ބައެއް ދަރިވަރުން އެމެރިކާ ދޫކޮށް ފުރައިގެން ދިޔައެވެ.

ހުކުރު ދުވަހު ބޭއްވުނު ފެޑެރަލް ކޯޓުގެ އަޑުއެހުމެއްގައި ޖަސްޓިސް ޑިޕާޓްމަންޓުން ބުނެފައިވަނީ ނިންމުން ބާތިލް ކުރުމުން، ދަރިވަރުންގެ ރެކޯޑުތައް ސްޓޫޑެންޓް އެންޑް އެކްސްޗޭންޖް ވިޒިޓަރ އިންފޮމޭޝަން ސިސްޓަމް (ސެވިސް) ގައި އަލުން ރީސްޓޯކުރެވޭނެ ކަމަށެވެ. މިއީ ބޭރު ދަރިވަރުންގެ ޤަވާޢިދުތަކާ އެއްގޮތަށް ޢަމަލުކުރޭތޯ ބަލާ ސަރުކާރުގެ ޑޭޓާބޭސްއެވެ.