ޕާކިސްތާނާއި އިންޑިއާގެ ގުޅުން ހޫނުވެފައިވަނިކޮށް ޕާކިސްތާނުން ބެލަސްޓިކް މިސައިލެއް ޓެސްޓްކޮށްފިއެވެ.

މިކަމާ ގުޅޭގޮތުން ޕާކިސްތާނު ސަރުކާރުން އެކްސްގައި ކުރި ޕޯސްޓެއްގައި ބުނެފައިވަނީ، އެޤައުމުގެ އަސްކަރިއްޔާގެ ޤާބިލްކަން އިތުރުކުރުމަށް އަބްދާލީ ނަމުންނަންދީފައިވާ މިސައިލް ކާމިޔާބުކަމާއެކު ޓެސްޓްކޮށްފައިވާކަމަށެވެ. ޕާކިސްތާނުން ބުނީ މިއީ 450 ކިލޯމީޓަރުގެ ރާސްތާއަށް ދަތުރުކުރުމުގެ ޤާބިލްކަން ލިބިގެންވާ މިސައިލެއްކަމަށެވެ. މިފަދަ މިސައިލެއް ތަޖުރިބާކުރުމުގެ އެންމެ މުހިއްމު މަޤްސަދުތަކުގެ ތެރޭގައި ޤައުމުގެ ސަލާމަތާއި ރައްކާތެރިކަން ކަށަވަރުކުރުން ހިމެނޭކަމަށްވެސް އެޤައުމުގެ ސަރުކާރުން ބުންޏެވެ.

ޕާކިސްތާނުން ޓެސްޓްކުރި މި މިސައިލަކީ ގިނަ އަދަދަކަށް ގޮވާތަކެތި އުފުލުމުގެ ޤާބިލްކަން ލިބިގެންވާ މިސައިލެކެވެ. މި މިސައިލަކީ މިލިޓަރީ ބޭސްތަކާއި، އިންޑަސްޓްރިއަލް ސަރަހައްދުތަކަށް ހަމަލާދިނުމަށް ހާއްސަ މިސައިލެއްކަމަށް ޕާކިސްތާނު ސަރުކާރުން ބުނެއެވެ.

ޕާކިސްތާނުން މިސައިލެއް ޓެސްޓްކޮށްފައިމިވަނީ ކަޝްމީރުގެ އިންޑިއާ ކޮންޓްރޯލްކުރާ ސަރަހައްދުގެ އަވަށެއްކަމަށްވާ ބަހަލްގަމްގައި ދިން ނުރައްކާތެރި ޓެރަރިސްޓް ހަމަލާއަކަށްފަހު، އިންޑިއާ އާއި ޕާކިސްތާނުގެ ގުޅުން ވަރަށްބޮޑަށް ހޫނުވެފައިވަނިކޮށެވެ. މި ހަމަލާއާ ގުޅިގެން ދެ ޤައުމުގެ ދެމެދު އޮތް ޑިޕްލޮމެޓިކް ގުޅުން ވަގުތީގޮތުން ހުއްޓުމަކަށް އައިސްފައެވެ. މި މައްސަލާގައި ދެ ޤައުމުގެ ވައިގެ ސަރަހައްދު ހިއްސާކުރުން ހުއްޓުމަކަށް އައިސްފައިވާއިރު، އިންޑިއާއިންވެސް ވަނީ މިލިޓަރީ އޮޕަރޭޝަންތަކެއް ފަށާފައެވެ. 

އިންޑިއާއިން މި ހަމަލާގެ އިނގިލި ދިއްކުރަނީ ޕާކިސްތާނު ސަރުކާރަށެވެ. ނަމަވެސް ޕާކިސްތާނު ސަރުކާރުން ވަނީ އެޤައުމާ ހަމަލާއާ ގުޅުމެއްނެތްކަމަށް ބުނެފައެވެ. ފަތުރުވެރިންގެ ބަޔަކަށް އަމާޒުކޮށް މިދިޔަ މަހު ދިން އެ ހަމަލާތަކުގައި 26 މީހަކު މަރާލާފައިވާއިރު 40 ހަށްވުރެ ގިނަ މީހުން ޒަހަމްވިއެވެ. މިއީ މި ފަހަކަށްއައިސް ކަޝްމީރުގެ އިންޑިއާ ކޮންޓްރޯލްކުރާ ސަރަހައްދުގައި ދިން މިފަދަ އެންމެ ނުރައްކާތެރި ހަމަލާއެވެ.