އިންޑިއާއިން ރޭ ޕާކިސްތާނުގެ ބައެއް ސަރަހައްދުތަކަށް ދިން ވައިގެ ހަމަލާތަކުގެ ރައްދުގައި ހަމަލާދިނުމަށް ޕާކިސްތާނުގެ ނެޝަނަލް ސެކިއުރެޓީ ކައުންސިލުން އެޤައުމުގެ އަސްކަރިއްޔާއަށް ހުއްދަދީފިއެވެ.
ޕާކިސްތާނުގެ ނެޝަނަލް ސެކިއުރިޓީ ކައުންސިލް (އެންއެސްސީ) އިން މިއަދު ހެނދުނު ވަނީ، އަސްކަރިއްޔާގެ ވެރިންނާއެކު ހާއްސަ ބައްދަލުވުމެއް ބާއްވާފައެވެ. މި ބައްދަލުވުމުގައި އެންއެސްސީން ވަނީ އަސްކަރިއްޔާއަށް އިންޑިއާއިން ދިން ހަމަލާތަކަށް ފުރިހަމައަށް ޖަވާބުދާރީވުމުގެ ހުއްދަ ދީފައެވެ. ނަމަވެސް ހަމަލާދޭނެ ވަގުތަކާއި އެފަދަ އެއްވެސް މައުލޫމާތެއް އަދި މިހާތަނަކަށް ޕާކިސްތާނުގެ އަސްކަރިއްޔާއަކުން ހާމަކޮށްފައެއް ނުވެއެވެ.
ޕާކިސްތާނުގެ ހާރިޖިއްޔާއިން ބުނެފައިވަނީ، އިންޑިއާގެ އަސްކަރިއްޔާއިން ޕާކިސްތާނުގެ ފުރިހަމަ ބާރުހިނގާ މިނިވަން ސަރަހައްދުތަކަށް ރޭ ދިން ހަމަލާތަކުގައި ގިނަ އަދަދެއްގެ އާންމުންގެ ފުރާނަ ގެއްލުނުއިރު، އެތައް ބަޔަކު ޒަހަމްވެފައިވާކަމަށެވެ. ޓެރަރިސްޓުން ނައްތާލުމުގެ ނަމުގައި އިންޑިއާއިން ހިންގި މި ޖަރީމާތަކަކީ އދ ގެ ޗާޓަރާއި، ބައިނަލްއަޤްވާމީ ޤާނޫނުތަކާވެސް ހިލާފް ކަމެއްކަމަށް ޕާކިސްތާނުގެ ހާރިޖިއްޔާއިން ނެރުނު ބަޔާނުގައި ބުނެފައި ވެއެވެ.
އިންޑިއާއިން ރޭ ދިން ހަމަލާތަކާ ގުޅޭގޮތުން އެޤައުމުގެ ސަރުކާރުން ވަނީ، ވައިގެ ހަމަލާތައް އަމާޒުކުރީ ޓެރަރިސްޓުން ދިރިއުޅެމުންދިޔަ ތަންތަނަށްކަމަށް ބުނެފައެވެ. އިންޑިއާއިން ދިން ހަމަލާތަކާ ގުޅިގެން އދ އިންވެސް ވަނީ ކަންބޮޑުވުން ފާޅުކޮށްފައެވެ. އަދި ޕާކިސްތާނުގެ އެކުވެރި ޗައިނާއިންވެސް ވަނި މިއީ ދެވިގެންވާނެ ހަމަލާތަކެއް ނޫންކަމަށް ބުނެފައެވެ.
އިންޑިއާ އާއި ޕާކިސްތާނުގެ ގުޅުން ގޯސްވެ އެންމެފަހުން ހަނގުރާމައެއްގެ ހާލަތަށް ގޮސްފައިމިވަނީ، މިދިޔަ މަހު ކަޝްމީރުގެ އިންޑިއާ ކޮންޓްރޯލްކުރާ ބަހަލްގަމްގައި ދިން ހަމަލާއާ ގުޅިގެންނެވެ. މި ހަމަލާތަކުގައި 26 މީހަކު މަރާލާފައިވާއިރު 40 ހަށްވުރެ ގިނަ މީހުން ޒަހަމްވިއެވެ. މިއީ މި ފަހަކަށްއައިސް ކަޝްމީރުގެ އިންޑިއާ ކޮންޓްރޯލްކުރާ ސަރަހައްދުގައި ދިން މިފަދަ އެންމެ ނުރައްކާތެރި ހަމަލާއެވެ.
Advertisement
This content is created and paid for by advertisers and does not involve Voice Journalists
