ދަރިން ހެޔޮގޮތުގައި ތަރުބިއްޔަތު ކުރުމަކީ ގިނަ ގުނަ ސަވާބު ލިބޭ އަދި ގޮންޖެހުން ބޮޑު ކަމެކެވެ. އެހެންކަމުން އޭގެ ސަބަބުން، ސްޓްރެސް ތަޖުރިބާ ކުރަން ޖެހުމަކީ ޠަބީޢީ ކަމެކެވެ. އެހެން ކަމުން މި ލިޔުމުގައި ބަލާލާނީ ދަރިންތަރުބިއްޔަތު ކުރުމުގައި ދިމާވާ ގޮންޖެހުން ތަކުގެ ސަބަބުން ކުރިމަތިވާ ސްޓްރެސްއާ މެނޭޖުކުރާނެ ގޮތުގެ މައްޗަށެވެ. 

ދަރިން ހެދިބޮޑުވަމުން އަންނައިރު އެކުދިން އަންނާނީ އައު ތަޖުރިބާތަކާއި އައު ކަންކަން ދަސްކުރަމުންނެވެ. އެއާއެކު އެކުދިންގެ ބެލެނިވެރިންވެސް ތަޖުރިބާ ކުރަންޖެހޭ ކަންކަން ތަފާތުވެ ގޮންޖެހުންތައް އިތުރުވާންފަށައެވެ. އެހެން ކަމުން، އެފަދަ ޙާލަތެއްގައި އެންމެ މުހިންމު އެއްކަމަކީ ކެތްތެރިކަން އިސްކުރުމެވެ. އަދި އެކުދިންގެ ނަޒްރިއްޔާ ތަކާ ވިސްނުންތައް ދެނެގަންނަން މަސައްކަތް ކުރަންޖެހެއެވެ. އަދި އެފަދައިން ކަންކަން ދިމާވާ ސަބަބުތައް ދެނެގަނެ، އެކަމާ ކުރިމަތިލާން ތައްޔާރުވާން ޖެހެއެވެ. މިފަދައިން ކަންކޮށް، ގޮންޖެހުންތަކާއި ކެތްތެރިކަމާއި ޙިކްމަތްތެރި ކަމާއެކު ކުރިމަތިލުމުން އެއިން ކުރިމަތިވާ ސްޓްރެސް މެނޭޖްކުރުމަށް ފަސޭހަ ވާނެއެވެ.

Advertisement

ދަރިންތަރުބިއްޔަތު ކުރުމަކީ ނުހަނު ބުރަ ބޮޑު މަސައްކަތެއް ނަމަވެސް، އެކަންކަމާއި، ގޭތެރޭގައި ހުންނަ ކަންކަމުން ހުސްވެ، އަމިއްލަ ނަފްސު ހިތްހަމަ ޖައްސާލުމަށް ކޮންމެ ދުވަހަކުވެސް ވަކި ވަގުތުކޮޅެއް ހުސްކޮށްލުމަކީ ވަރަށް މުހިންމު ކަމެކެވެ. އެވަގުތު ކޮޅަކީ، ތިމާ ހިތްހަމަޖެހޭ ކަމެއް ކޮށްލުމަށް ހޭދަކުރާ ވަގުތުކޮޅެއް ކަމަށް ހަދާށެވެ. އެއީ ރަހުމަތްތެރިންނާއެކު ވަގުތު ހޭދަކޮށްލުން ކަމުގައި ވިޔަސް، ނޫނީ ބޭރަށް ގޮސް އިރުއޮއްސޭ މަންޒަރު ބަލައިލުން ފަދަ ކަމެއް ކޮށްލުން ނަމަވެސް، ތިމާއަށް ހިތްހަމަ ޖެހުން ލިބޭ ކަމެއް ކޮށްލާަށެވެ. މީގެ އިތުރުން، ކަސްރަތު ކުރުމާއި ހިނގާލަން ދިޔުމަކީވެސް ސްޓެރެސް މެނޭޖުކުރަން މުހިންމު ކަމެކެވެ.

ދަރިންތަރުބިއްޔަތު ކުރުމަކީ އެކަނި އެކަކު ކުރަން ވެއްޖެނަމަ ގޮންޖެހުންބޮޑު، ކަމަކަށްވާނެ އެވެ. އެހެންކަމުން، މައިންބަފައިންނާއި ޢާއިލާގެ އެހެން މީހުންގެ އެހީ ހޯދުމަކީ މުހިންމު ކަމެކެވެ. ޚާއްސަކޮށް ތިމާގެ އަމިއްލަ ނަފްސަށް ޚާއްސަ ކިރާ ވަގުތުކޮޅުގައި ދަރިން އެހެން މީހަކާއި ހަވާލުކޮށްލުމަކީ މުހިންމު ކަމެކެވެ. 

އަބަދުވެސް އެއްގޮތަކަށް ވަކި ތާވަލަކާއި އެއްގޮތަށް މަސައްކަތްތައް ބައްޓަން ކޮށްލުމަކީ، ކަންކަން ކުރުމަށާއި، ފޮލޯ ކުރުމަށް ފަސޭހަވާނެ ކަމެކެވެ. އެކަމުގެ ސަބަބުން ކުދިންނަށްވެސް އެކުދިން އެ ދުވަހެއްގައި ކުރަންޖެހޭ ކަންކަމަށް ސިކުނޑި ތައްޔާރު ކުރުމުގެ ފުރުސަތު ލިބިގެންދެއެވެ. އަދި ތިމާއަށްވެސް ކަންކަން ނުވުމާއި ފުނި ޖެހުން ފަދަ ކަންކަމުން ލިބިދޭ ސްޓްރެސް ކުޑަކުރުމަށް މަގުފަހިވެގެން ދެއެވެ. 

ދަރިންތަރުބިއްޔަތު ކުރުމަކީ ބުރަ ކަމެއް ނަމަވެސް، ހަނދާން ކުރަންޖެހޭ ކަމަކީ، އެއްވެސް ނަފްސަކަށް އެ ނަފްސަކަށް ނުއުފުލޭވަރުގެ ބުރައެއް މާތް الله ނުޖައްސަވާނެ ކަމެވެ. އެހެންކަމުން، މީހާ ސްޓްރެސްވެ، ހިތްދަތިވެ، ގޮތް ހުސްވެގެންދާ ވަގުތުގައި، ކެތްތެރިކަމާއި ސާބިތުކަން ދެއްވައި، ކަންކަން ރަނގަޅު ކޮށްދެއްވުން އެދި މާތް الله އަށް ދެންނެވުމަކީ ނަފްސަށް ބޮޑު ލުޔެއް ލިއްބައިދޭނެ ކަމެކެވެ. ހަމަ އެހެންމެ، ފަރުޟު ނަމާދު ތަކަަށް ރައްކާތެރިވެ، ގިނަ ގިނައިން ޒިކުރު ކުރުމާއި ޤަވާއިދުން ޤުރުއާން ކިޔެވުމަކީވެސް ހިތަށް ހިތްހަމަޖެހުން ލިއްބައިދޭނެ ކަމެކެވެ.

މިކަން ކަމުގެ އިތުރުން، ކޮންމެހެން ބޭނުންވާނަމަ ޕްރޮފެޝަނަލް އެހީތެރިކަން ހޯދުމަކީވެސް މުހިންމު ކަމެކެވެ. އެގޮތުން ކައުންސެލަރ ނުވަތަ ތެރަޕިސްޓެއްގެ އިރުޝާދު ހޯދައި ސްޓްރެސް އާއި ކުރިމަތިލާން ޖެހޭ ސްޓްރެޓެޖީތައް ހޯދައި އެއާ އެއްގޮތަށް ޢަމަލު ކުރުމަކީ މުހިންމު ކަމެކެވެ.