މުރައިދޫ އިންވިޓޭޝަނަލް ވެޓަރެންސް ވޮލީބޯޅަ ޓޯނަމެންޓް 2025ގެ އޮފިޝަލް ބެވަރޭޖް ޕާޓްނަރަކަށް ރިޓޯ ސޮލިއުޝަންސް ހަމަޖައްސައިފި އެވެ.

މުބާރާތުގެ ބެވަރޭޖް ޕާޓްނަރާއެކު ވޮއިސް އޮފީހުގައި ބޭއްވި ސޮއިކުރުމުގެ ރަސްމިއްޔާތުގައި ރިޓޯ ސޮލިއުޝަންސްގެ ފަރާތުން ސޮއިކުރީ ޑައިރެކްޓަރ އޮފް އޮޕަރޭޝަން އަލީ ރިފާއު އެވެ. އަދި ނިޔާ އެކަޑަމީގެ ފަރާތުން މިއެއްބަސްވުމުގައި ސޮއިކުރީ އެކަޑަމީގެ އެޑްވައިޒަރު މުހައްމަދު ޒަރީރު އެވެ.

މި މުބާރާތަކީ ހއ.މުރައިދޫގެ "ނިޔާ އެކަޑަމީ"ގެ ފަރާތުން އިންތިޒާމުކޮށް ތިލަދުންމަތީގެ ރަށްތަކުގެ މެދުގައި އެކުވެރިކަމާއި އެއްބައިވަންތަކަން އާލާކުރުމުގެ އިތުރުން ކުރީގެ ހުނަރުވެރި ވޮލީބޯޅަ ކުޅުންތެރިންނަށް، ވާދަވެރި އަދި އެކުވެރި މާހައުލެއްގައި އެކުޅުންތެރިންގެ ހުނަރު ދައްކާލުމުގެ ފުރުސަތު ތަނަވަސް ކޮށްދިނުމުގެ އިތުރުން ދުޅަހެޔޮ މުޖުތަމައެއް ބިނާކުރުމުގެ މަގުސަދުގައި އެ އެކަޑަމީގެ ފަރާތުން 35 އަހަރުން މަތީގެ މީހުނަށް ޚާއްސަކޮށްގެން ބާއްވާ މުބާރާތެކެވެ.

އެގޮތުން މިމުބާރާތުގައި މުރައިދޫގެ އިތުރުން ތިލަދުންމަތީގެ އިތުރު ނުވަ ރަށަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 10 ޓީމު ދެ ގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ސެމީފައިނަލަށް ހޮވޭގޮތަށެވެ.

2018 ވަނަ އަހަރު ރަޖިސްޓްރީކުރެވުނު ރިޓޯ ސޮލިއުޝަންސްއަކީ މިވަގުތު ރާއްޖޭގައި ބޯފެން ސާފުކުރުމުގެ ދާއިރާގައި ގިނަބައެއްގެ އިތުބާރު ހޯދާފައިވާ މިދާއިރާގައި އެންމެ މަގުބޫލް އެއްވިޔަފާރިއެވެ. 

ހުޅުމާލެ ހިތިގަސްމަގު ގޯޅި 6 ގައި ރިޓޯ ސޮލިއުޝަންސްގެ ޝޯރޫމް ހުންނައިރު، އެކުންފުނިން މިހާރު ވެސް އަންނަނީ ރާއްޖޭގެ އެކި ކަންކޮޅުތަކުގައި 5000 އަށްވުރެ ގިނަ ގޭބިސީއަށާއި އޮފީސް، ކެފޭ/ރެސްޓޯރަންޓް އަދި ގެސްޓްހައުސްތަކަށް ޚިދުމަތް ދެމުންނެވެ.

ރިޓޯއިން ވިއްކާ އަދި ހަރުކޮށްދޭ ފެން ސާފުކުރާ މެޝިންތަކަކީ ފެންވަރު ރަނގަޅު ކޮލެޓީ މެޝިންތަކެކެވެ. އަދި މިއިން ކޮންމެ މެޝިނަކަށް ވެސް އެކުންފުނީގެ ފަރާތުން ދެއަހަރު ދުވަހުގެ ވޮރެންޓީއެއް ދެއެެވެ. މީގެ އިތުރުން އެކުންފުނީގެ އެހެނިހެން ޚިދުމަތްތަކުގެ ތެރޭގައި ގަވާއިދުން މިމެޝިންތަކުގެ ފިލްޓަރ ބަދަލުކުރުމާއި މެޝިނަށް ދިމާވާ އެހެނިހެން މައްސަލަތައް ހައްލުކޮށްދިނުން ވެސް ހިމެނެއެވެ.

އެގޮތުން ރާއްޖޭގެ އެކި އަތޮޅުތަކުގައި ތިބޭ އޭރިއާ މެނޭޖަރުންގެ އެހީތެރިކަމާއެކު ކަސްޓަމަރުންނަށް ވީހާވެސް އަވަސް ޚިދުމަތެއް ދިނުމަށް ރިޓޯއިން ޚާއްސަ އިސްކަމެއްދެއެވެ. އަދި  އެއްވެސް މައްސަލައެއް ފެން މެޝިނަކަށް ދިމާވެގެން ރިޕޯޓްކޮށްފިނަމަ ހަތަރު ގަޑިއިރު ތެރޭގައި އެކަމަށް ފުރިހަމަ ހައްލެއް ހޯދައިދޭނެކަމުގެ ޔަގީންކަން ރިޓޯއިން ކަސްޓަމަރުންނަށް ދެއެވެ. 

މީގެ އިތުރުން އިތުބާރުހުރި ޚިދުމަތާއި، ރިޓޯ އެސް-ވަން ފެން ސާފުކުރާ މެޝިން ފަދަ ޒަމާނީ މެޝިންތަކާއިއެކު ކަސްޓަމަރުންނަށް އިސްކަންދޭ ޓީމެއްގެ ސަބަބުން، ރިޓޯ އަކީ އާއިލާތަކާއި ވިޔަފާރިތަކުން އުފަލާއިއެކީ އިޚްތިޔާރުކުރާ ޚިދުމަތެކެވެ.