އެމެރިކާގެ ކުރީގެ ރައީސް ޖޯ ބައިޑަންއަށް ޕްރޮސްޓޭޓް ކެންސަރު ޖެހިއްޖެއެވެ. މިކަން ހާމަވެފައިވަނީ ހުކުރު ދުވަހު ކުރެވުނު މެޑިކަލް ޗެކަޕެއްގައެވެ.

82 އަހަރުގެ ބައިޑެންއަށް މި ބަލި ޖެހިފައިވާކަން ދެނެގަނެވިފައިވަނީ އޭނާއަށް ކުޑަކަމުދާ ނިޒާމުގެ މައްސަލަތަކެއް ފާހަގަވެގެން ޓެސްޓްތައް ހެދުމުން ކަމަށް އޭނާގެ ރަސްމީ އޮފީހުން ނެރުނު ބަޔާނުގައިވެއެވެ. 

އެގޮތުން އެ ބަޔާނުގައި ބުނެފައިވަނީ މިއީ ވަރަށް އަވަހަށް ފެތުރޭ ބާވަތެއްގެ ކެންސަރެއް ކަމަށާއި، ނަމަވެސް މިއީ ހޯމޯން ސެންސިޓިވް ކެންސަރެއް ކަމަށް ވާތީ ފަރުވާ ދިނުމަށް ފަސޭހަވާނެ ކަމަށެވެ. އަދި މި ވަގުތު ބައިޑަން އަދި އޭނާގެ އާއިލާއިން ޑޮކްޓަރުންނާއެކު ފަރުވާ ކުރެވޭނެ ގޮތްތައް ބަލަމުންދާ ކަމަށްވެސް ބަޔާނުގައި ބުނެފައިވެއެވެ.

ބައިޑެންއަށް ކެންސަރު ޖެހުނުކަން ހާމަކުރުމާއެކު އެމެރިކާގެ ރައީސް ޑޮނަލްޑް ޓްރަމްޕް ވަނީ ބައިޑަންއަށް އަވަސް ޝިފާއަކަށް އެދިފައެވެ.

އަދި ބައިޑަންގެ ނައިބު ރައީސް ކަމަލާ ހެރިސް ވަނީ ބައިޑަންއަކީ ވަރުގަދަ ”ފައިޓަރެއް“ ކަމަށް ބުނެ، އޭނާއަށް އަވަސް ޝިފާއަކަށް އެދިފައެވެ.

ޕްރޮސްޓޭޓް ކެންސަރަކީ ފިރިހެނުންގެ މެދުގައި އެންމެ އާންމުކޮށް ޖެހޭ ކެންސަރެވެ. އެމެރިކަން ކެންސަރ ސޮސައިޓީގެ ތަފާސް ހިސާބުތަކުން ދައްކާ ގޮތުގައި އެމެރިކާގެ ކޮންމެ 8 ފިރިހެނުންގެ ތެރެއިން 1 ފިރިހެނަކަށް މި ބަލި ޖެހެއެވެ.

އަދި މިއީ ފިރިހެނުންގެ މެދުގައި ކެންސަރުގެ ސަބަބުން ދެވަނައަށް އެންމެ ގިނަ މީހުން މަރުވާ ބާވަތުގެ ކެންސަރެވެ.

ބައިޑަންއަށް ޖެހިފައިވާ ކެންސަރުގެ ގްލީސަން ސްކޯރއަކީ 9 (ގްރޭޑް ގުރޫޕް 5) ކަމަށް އޭނާގެ އޮފީހުން ހާމަކޮށްފައިވެއެވެ. މިއީ އެންމެ ”އެބްނޯމަލް“ މަތީ ގްރޭޑްގެ ކެންސަރެވެ. އެހެންކަމުން ބައިޑަންއަށް ޖެހިފައިވާ ކެންސަރުގެ ވަރަށް ނުރައްކާތެރި އިރު، މިހާރު ކެންސަރު ވަނީ ކަށިތަކަށްވެސް ފެތުރިފައެވެ. 

ބައިޑެންއަށް ކެންސަރު ޖެހިފައިވާއިރު، އޭނާގެ ބީއު ބައިޑެން، 2015 ވަނަ އަހަރު މަރުވެފައިވަނީވެސް ކެންސަރު ޖެހިގެންނެވެ. ބައިޑެންގެ ދަރިފުޅަށް ޖެހުނީ ބްރެއިން ކެންސަރެވެ.