އެމެރިކާ އަދި ފިލިޕީންސް ގުޅިގެން އަނެއްކާވެސް ދެކުނު ޗައިނާ ކަނޑުގައި އަސްކަރީ ތަމްރީނުތަކެއް ހަދަން ފަށައިފިއެވެ.
މިއީ އަސްކަރިއްޔާގެ އިތުރަށް ދެގައުމުގެ ކޯސްޓްގާޑުވެސް ބައިވެރިވެގެން ހަދާ މިފަދަ ފުރަތަމަ ތަމްރީނުތަކެވެ. މި ތަމްރީނުތައް ހަދާފައިވަނީ ޕަލަވަން ރަށްތަކާއި، އޮކްސިޑެންޓަލް މިންޑޯރޯ އާ ދިމާލުން، ފިލިޕީންސްގެ ހުޅަނގު ކަނޑުގެ ސަރަހައްދުގައެވެ. މި ތަމްރީނުތަކުގައި ފިލިޕީންސްގެ ކަނޑުގެ ސިފައިންނާއި ވައިގެ ސިފައިންގެ އިތުރުން ކޯސްޓްގާޑު ބައިވެރިވިއެވެ. އަދި އެމެރިކާގެ ކޯސްޓްގާޑުގެ އިތުރުން ކަނޑުގެ ސިފައިންގެ ޕޮސައިޑަން މެރިޓައިމް ޕެޓްރޯލް އެއަރކްރާފްޓެއް ބައިވެރިވިއެވެ.
ފިލިޕީންސްއިން ބުނީ މި ތަމްރީނުތަކުގައި މުވާސަލާތީ ޑްރިލްތަކާއި ސަރޗް އެންޑް ރެސްކިއު ޑްރިލްތައް ބޭއްވި ކަމަށެވެ. މިއީ ފިލިޕީންސްއާއި އެމެރިކާ ގުޅިގެން ކަނޑުގެ ސަލާމަތީ ކަންކަމާ ގުޅޭ ގޮތުން މިއަހަރު ބާއްވާ ދެވަނަ ތަމްރީނުތަކެވެ. އަދި 2023 ވަނަ އަހަރު ދެގައުމުގެ މެދުގައި އައު ސަލާމަތީ އެއްބަސްވުމެއް ގާއިމްކުރެވުނު ފަހުން އޭގެ ދަށުން ބާއްވާ 6 ވަނަ ތަމްރީނުތަކެވެ.
އެމެރިކާ، އޮސްޓްރޭލިއާ އަދި ފިލިޕިންސް ކުރިއަށްގެންދާ ތަމްރީނުތަކުގެ ތެރެއިން.. ފޮޓޯ: ފިލިޕީންސް ނޭވީ
ދެކުނު ޗައިނާ ކަނޑުގެ މައްސަލައިގައި ޗައިނާއާއި ފިލިޕީންސްއާއި ދެމެދު މަސްރަހު ވަރަށް ބޮޑަށް ގޯސްވެފައިވާއިރު، ޗައިނާގެ ކުރިއަރާފައިވާ އަސްކަރިއްޔާއާއި ކުރިމަތިލާން ޖެހިއްޖެ ހާލަތަކަށް ފިލިޕީންސްދަނީ ތައްޔާރުވަމުންނެވެ. އެގޮތުން އެމެރިކާގެ އިތުރުން އެސަރަހައްދުގެ އެހެން ގައުމުތަކާއެކުވެސް އަސްކަރީ ތަމްރީނުތައް ހަދައި، ދެކުނު ޗައިނާ ކަނޑުގެ ތެރޭގައި ބައިނަލްއަގްވާމީ ވިޔަފާރީހެ ވިއުގައިގައި ހިމެނޭ އާގުބޯޓުފަހަރާއި އެހެނިހެން އުޅަނދުފަހަރަށް މިނިވަންކަމާއެކު ދަތުރުކުރެވޭނެ ކަން ކަށަވަރުކޮށްދިނުމަށް ފިލިޕީންސްއިން އަންނަނީ މަސައްކަތްކުރަމުންނެވެ. އަދި ފިލިޕީންސްއިން ދައުވާކުރާ ކަނޑުގެ ސަރަހައްދުގައި ފިލިޕީންސްގެ ސިޔާދަތީ ބާރު ހިންގުމަށްވެސް ޗައިނާގެ ކުރިމަތީގައި ފިލިޕީންސްއަށް ވަނީ ބާރު ދައްކަން ޖެހިފައެވެ. ޗައިނާއިން ދައުވާކުރާ ގޮތުގައި މުޅި ދެކުނު ޗައިނާ ކަނޑަކީ އެގައުމުގެ މިލްކެކެވެ.
Advertisement
This content is created and paid for by advertisers and does not involve Voice Journalists
