ޣައްޒާގައި އެހީ ބަހާ ސަރަހައްދު ތަކަކީ ”އިންސާނުން ކަތިލާ ތަންތަން“ ގެ ގޮތުގައި ސިފަކޮށްފިއެވެ. 

ޣައްޒާގައި އެހީ ބަހާ ދެ ސަރަޙައްދަކަށް ސީދާަ އަމާޒުކޮށް އިއްޔެވެސް ނިރުބަވެރި އިސްރާއިލުން ވަނީ ހަމަލާތައް ދީފައެވެ. އެގޮތުން ރަފާގެ އިރުމަތީގައާއި ވާދީ ޣައްޒާ ފާލަމާ ކައިރީގައި ހުރި އެހީ ބަހާ ސަރަޙައްދުތަކުގައި ކާބޯތަކެތި ހޯދަން ގޮސް ތިބި ބަޔަކަށް އަމާޒުކޮށް ދެވުނު މި ހަމަލާ ތަކުގައި މަދުވެގެން 13 މީހުން ޝަހީދުވެ، 150 އަށްވުރެ ގިނަ މީހުން ވަނީ ޒަޚަމަވެފައެވެ.

އިސްރާއީލުން ގަދަކަމުން ފޭރިގަނެ، އެމީހުންގެ ބާރުގެ ދަށަށް ގެނެސްފައިވާ ސަރަޙައްދުތަކުގައި އެމެރިކާގެ އިސްނެގުމުގެ ދަށުން ހިންގާ ޣައްޒާ ހިއުމެނިޓޭރިއަން ފައުންޑޭޝަން (ޖީއެޗްއެފް) ގެ އެހީ ބެހުމުގެ މަރުކަޒުތަކުގައި އެހީބަހަން ފެށުނީއްސުރެ އެ ސަރަހައްދަށް އެހީ ހޯދަންދާ މީހުންނަށް އަމާޒުކޮށް އަންނަނީ ހަމަލާތައް ދެމުންނެވެ.

އެގޮތުން، މޭ 27 އިން ފެށިގެން މިހާތަނަށް 130 އަށްވުރެ ގިނަ މީހުން ޝަހީދުވެ، 700 އަށްވުރެ ގިނަ މީހުން ޒަޚަމްވެފައިވެއެވެ. އަދި މަދުވެގެން 9 މީހުން އަދިވެސް ވަނީ ގެއްލިފައެވެ.

ޣައްޒާ ސަރުކާރުގެ މީޑިއާ އޮފީހުން ނެރުނު ބަޔާނެއްގައި ވަނީ މި އެހީ ބަހާ ސަރަޙައްދުތަކަކީ "އިންސާނުން ކަތިލާ ތަންތަން" ގޮތަށް ސިފަކޮށްފައެެވެ. އެގޮތުން މިއީ ހައިހޫނުކަންމަތީގައި ތިބޭ މުސްލިމުން އެއްތަނަކަށް ޖަމާކޮށް، އެއްފަހަރާ އެތައްބައެއްގެ ފުރާނަ ދުއްވާލުމަށް ހިންގާ ޖަރީމާތަކެއް ކަމަށް ބުނެފައިވެއެވެ. 

"މިއީ ހަނގުރާމައިގެ ކުށްތަކާއި އިންސާނިއްޔަތާ ދެކޮޅު ކުށްތަކެއް،" މި ބަޔާނުގައި ބުނެފައިވެއެވެ. އަދި މައްސަލައާ ގުޅިގެން މިނިވަން ބައިނަލްއަޤްވާމީ ތަޙުޤީޤެއް ހިންގުމަށާއި ޖީއެޗްއެފްގެ އެހީ ބެހުމުގެ މޮޑެލް ވަގުތުން ހުއްޓާލުމަށްވެސް ވަނީ ގޮވާލާފައިވެއެވެ.

އިއްޔެގެ ހަމަލާ ދެވިފައިވަނީ، ފަތިހު 4:30 އިން ފެށިގެން އެހީ ބަހާ ސަރަހައްދުތަކަށް މީހުން އެއްވެ ކިޔުއަށް އަރަން ފަށައި، މުޅި އެ ސަރަހައްދަށް އެހީ ހޯދަން އެއްވި މީހުން ތަކުން ބައިބޯވުމުންނެވެ. 

”މިއީ އެހީ އެއްނޫން. މިއީ ދަންތުރައެއް“ ޣައްޒާގެ ރައްޔިތަކު ބުނެފައިވެއެވެ.