ޣައްޒާގެ ރައްޔިތުންނަށް އިންސާނީ އެހީ ހިފައިގެން ދިޔަ ބޯޓުގައި ތިބި އެންމެން ޑީޕޯޓް ކުރަން އިސްރާއިލުން ނިންމައިފިއެވެ.

"މަދްލީން" ނަމަކަށް ކިޔާ މި ބޯޓު ހިފަހައްޓައި އޭގައި ތިބި 12 މީހުން އިސްރާއިލުގެ އަޝްދޯދް ބަނދަރަށް ގެންދިއޔައީ އިއްޔެގެ ވަގުތެއްގައެވެ. އެފަހުން، އެމީހުން ހައްޔަރުކޮށްފައިވާއިރު، ހައްޔަރުކުރި މީހުންހެ ތެރޭގައި ސްވީޑިޝް އެކްޓިވިސްޓް ގްރެޓާ ތުންބަރގް އަދި އަލްޖަޒީރާގެ ނޫސްވެރިޔާ އުމަރު ފައްޔާޟް ހިމެނެއެވެ.

މި ބޯޓު ހިފެހެއްޓީ ޣައްޒާގެ އައްސޭރިފަށުން ގާތްގަނޑަކަށް 185 ކިލޯމީޓަރު (100 ނޯޓިކަލް މޭލު) ދުރުގައި، ބައިނަލްއަޤްވާމީ ކަނޑުގެ ސަރަޙައްދުގައެވެ.

އިސްރާއީލުގެ ފޮރިން މިނިސްޓްރީން ބުނެފައިވަނީ މަދްލީން އުޅަނދުގައި ތިބި 11 އެކްޓިވިސްޓުންނާއި ނޫސްވެރިޔާ ޓެލް އަވީވްގެ ބެން ގޫރިއަން އިންޓަރނޭޝަނަލް އެއަރޕޯޓަށް ގެންގޮސް މިއަދު އެމީހުން ޑިޕޯޓްކުރެވޭނެ ކަމަށެވެ.

ހިންދް ރަޖަބް ފައުންޑޭޝަން ނަމަކަށް ކިޔާ ޙައްޤުތަކާބެހޭ ޖަމާޢަތަކުން ވަނީ މަދްލީން އުޅަނދު ރެއިޑްކުރުމުގައި ބައިވެރިވި ކަމަށް ބުނާ އިސްރާއީލް ސިފައިންގެ ޔުނިޓާ ދެކޮޅަށް ހަނގުރާމައިގެ ކުށުގެ ދައުވާ ކޮށް މައްސަލަ ހުށަހަޅާފައެވެ..

އެހީގެ ބޯޓު އިއްޔެ ހިފަހައްޓާފައިވާއިރު، އިއްޔެ އެކަނިވެސް އިސްރާއިލުގެ ސިފައިން ވަނީ މަދުވެގެން 60 ފަލަސްތީނުގެ ރައްޔިތަކު ޝަހީދުކޮށްލާފައެވެ. މީގެ ތެރޭގައި ދެކުނު ރާފާގައި ހުންނަ އެމެރިކާގެ އެހީގައި ހިންގާ "ޣައްޒާ ހިއުމެނިޓޭރިއަން ފައުންޑޭޝަން" (ޖީ.އެޗް.އެފް) ގެ އެހީ ފޯރުކޮށްދޭ މަރުކަޒު ކައިރީގައި ޝަހީދުކޮށްލި 14 މީހުން ހިމެނެއެވެ.

ޣައްޒާގެ ޞިއްޙީ ވުޒާރާއިން ބުނާ ގޮތުގައި، އިސްރާއިލުން ޣައްޒާގައި ހިންގަމުންދާ ޤަތުލުޢާއްމުގައި މިހާތަނަށް މަދުވެގެން 56,927 ފަލަސްތީނުގެ ރައްޔިތަކު ޝަހީދުވެ، 126,615 މީހުން ޒަޚަމްވެފައިވެއެވެ.