ރަށްރަށުގެ ކައުންސިލްތަކުން ބެންކޮކަށް ތަޖުރިބާ ދަތުރުތައް ކުރަނީ ރަށަށް ކޮށްދޭންޖެހޭ ކަންކަމަށް ޚަރަދު ކުރުމަށްފަހު، ބާކީ ހުންނަ ފައިސާއިން ކަމަށް މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެއެވެ.

މަޖިލީހުގައި މިއަދު އޮތީ، ކައުންސިލްތަކުގެ ބަޖެޓް ކުޑަކޮށް މެންބަރުންގެ އަދަދު މަދުކުރުމާ ގުޅޭ ގޮތުން ވެރިކަންކުރާ ޕީއެންސީން ހުށަހަޅާފައިވާ ގަރާރަަށް ބަހުސް ކުރުމެވެ. 

އެއަށް ބަހުސް ކުރައްވަމުން ޒިޔާދު ވިދާޅުވީ، ލާމަރުކަޒީ ގާނޫނަށް މިވީ 15 އަހަރުގެ ތެރޭގައި، ކައުންސިލަރުންގެ އަދަދު މަދުކުރުމަކީ، ޕީއެންސީ/ޕީޕީއެމް ވެރިކަމަށް އަންނަ ކޮންމެ ފަހަރަކު ކުރާ ކަމެއް ކަމަށެވެ. 

”މިހާރު ކުރަން މިއުޅޭ ކަމަކީ އަންހެނުންނަށް ދީފައި އިންނަ ކޯޓާ، އެ ޖާގަ ގެއްލުވާލަން މިއުޅެނީ“ ޒިޔާދު ވިދާޅުވިއެވެ.

މިއާއެކު ޒިޔާދު ވިދާޅުވީ، އެ ގަރާރުގައި މައިގަނޑު ގޮތެއްގައި ފާހަގަކޮށްފައިވަނީ ބަޖެޓުން ކައުންސިލްތަކަށް ކުރާ ޚަރަދުގެ ވާހަކަކަމަށެވެ. ނަމަވެސް އެ ޚަރަދަކީ ދައުލަތުގެ ބަޖެޓްގެ އެންމެ ފަސް އިންސައްތަ ކަމަށާ، އެއީ ރާއްޖޭގެ ރަށްރަށުގެ ކައުންސިލް ތަކުގެ މުވައްޒަފުންގެ މުސާރައާއި، ރަށްރަށުގެ މަގުތައް ސާފުކުރުމާއި، ރަށުތެރެ ބެލެހެއްޓުން ފަދަ ކަންކަމަށް ކަނޑައަޅާފައިވާ އެއްޗެއް ކަމަށް އޭނާ ވިދާޅުވިއެވެ.

މިއާއެކު ޒިޔާދު ވިދާޅުވީ، ކައުންސިލްތަކަށް ކުރާ ޚަރަދު ކުޑަކުރަން މަސައްކަތް ކުރަނީ ރަށްރަށަށް ”އެެއްޗެއް ލިބޭތީ އެކަން ކަމު ނުގޮސްގެން“ ކަމަށެވެ. 

ކައުންސިލްތައް ރަނގަޅަށް ނުހިނގާކަމަށް ގަރާރުގައި ފާހަގަކޮށްފައިވާއިރު، ރަނގަޅަށް ހިނގާ ކައުންސިލްތައްވެސް ހުރި ކަމަށާ، އެ ކައުންސިލްތަކުގެ ސަބަބުން ރަށްރަށަށް ތަރައްޤީ ލިބިފައިވާ ކަމަށް އޭނާ ވިދާޅުވިއެވެ. އަދި ރާއްޖޭގައި ގިނައީ ރަނގަޅަށް ހިނގާ ކައުންސިލްތައް ކަމަށްވެސް ވިދާޅުވިއެވެ.

ޒިޔާދު މިހެން ވިދާޅުވެފައިވާއިރު، ކައުންސިލްތަކަށް ބްލޮކް ގްރާންޓުގެ ގޮތުގައި ދޭ ފައިސާ މިހާރު ހޭދަކުރެވޭ ގޮތާމެދު ދާދިފަހުން އޮތް ”ރައްޔިތުންނާއެކު“ ޕޮޑްކާސްޓްގައި ރައީސް ޑރ މުޙައްމަދު މުޢިއްޒު ވަނީ ކަންބޮޑުވުން ފާޅު ކުރައްވާފަ އެވެ. އެގޮތުން، ރައީސް ވިދާޅުވީ ބަައެއް ކައުންސިލްތަކުން ބެންކޮކު ފަދަ ބޭރު ގައުމުތަކަށް ދަތުރު ކުރަމުންދާ ކަމަށާ، އެކަމުން ރައްޔިތުންނަށް ފައިދާއެއް ނުވާ ކަމަށް ވިދާޅުވި އެވެ.