ލަންކާގެ ބައެއް މަތީ ތަޢުލީމުދޭ މަރުކަޒު ތަކުގައި އެންރޯލް ނުވުމަށް މޯލްޑިވްސް ކޮލިފިކޭޝަން އޮތޯރިޓީ، އެމްކިޔުއޭއިން އެދިއްޖެއެވެ.
އެމްކިޔުއޭއިން ބުނީ، ސްރީލަންކާގެ ޓިވެކް ގައި ރަޖިސްޓަރީކޮށްފައިވާ ބައެއް މަތީތަޢުލީމުދޭ މަރުކަޒުތައް ސަސްޕެންޑް ކޮށްފައިވާކަމުގެ މައުލޫމާތު އެ އޮތޯރިޓީއަށް ލިބިފައިވާ ކަމަށެވެ.
އަދި އޭގެ ތެރޭގައި "މެޓްރޯޕޮލިޓަން ކޮލެޖް" އާއި "އީސޮފްޓް" ގެ ހުރިހާ ކެމްޕަސްތައް ހިމެނޭ ކަމަށެވެ.
ވުމާއެކު، މި މަރުކަޒުތަކުގައި މިހާރު މަތީ ތަޢުލީމު ޙާޞިލުކުރަމުންދާ ފަރާތެއް ކަމުގައިވަނީނަމަ، ވީ އެންމެ އަވަހަށް އެ އޮތޯރިޓީއަށް އީމެއިލް ([email protected]) މެދުވެރިކޮށް އެންގެމަށް ވަނީ އެދިފައެވެ.
އަދި މި މަރުކަޒުތަކުގެ ޕްރޮގްރާމްތަކުގައި މިވަގުތު އިތުރަށް އެންރޯލްވެގެން މަތީތަޢުލީމު ޙާޞިލުކުރުމަށް ނުފެށުމަށްވެސް އެ އޮތޯރިޓީން ވަނީ ނަޞޭޙަތްތެރިވެފައެވެ.
މީގެ އިތުރުންވެސް އެމްކިޔުއޭއިން ވަނީ، ރާއްޖެއިން ބޭރަށް ކިޔަވަންދާ ދަރިވަރުންގެ ތެރެއިން ބައެއް ދަރިވަރުން ކިޔަވަން ދަނީ އެމް.ކިއު.އޭ އިން ހޯދަންޖެހޭ މުހިއްމު އެއް ލިޔުންކަމުގައިވާ "ރިކޮގްނިޝަން އޮފް ދަ އިންޓެންޑެޑް ޕްރޮގްރާމް" ނުހޯދައިކަން ފާހަގަކޮށް، އެކަމުގެ ސަބަބުން ދަރިވަރުން ކިޔަވައި ނިމިގެން އައިސް ސަނަދު ވެލިޑޭޓް ކުރުމަށް ހުށަހެޅުމުން އެކިޔެވި މަރުކަޒަކީ އެމް.ކިއު.އޭ ޤަބޫލުކުރާ މަރުކަޒަކަށް ނުވުމުން އުޞޫލުގެތެރެއިން ސަނަދު ވެލިޑޭޓް ނުކުރެވޭ ކަމަށް ބުނެފައެވެ.
”މި ލިޔުން ހޯދުމުގެ އެންމެ ބޮޑު ބޭނުމަކީ އެމް.ކިއު.އޭ އިން ޤަބޫލުކުރާ މަރުކަޒެއްކަމާއި، އެ ކިޔަވާ ޕްރޮގްރާމަކީ އެމް.އެން.ކިއު.އެފް އަށް ފެތޭ ޕްރޮގްރާމެއްކަން ބެލުމާއި މީގެ އިތުރުން، އެ މަރުކަޒަކީ އެ ޤައުމެއްގެ ސަރުކާރުގެ ކަމާ ބެހޭ އިދާރާއަކުން ޤަބޫލުކުރާ މަރުކަޒެއްކަމާއި އެ މަރުކަޒުގައި އެ ޕްރޮގްރާމް ރަޖިސްޓަރީކޮށްފައިވާކަން ކަށަވަރު ކުރުމެވެ.“ އެމްކިޔުއޭއިން އިއްޔެ ނެރުނު ބަޔާނެއްގައި ބުނެފައިވެއެވެ.
ވުމާއެކު ރާއްޖެއިން ބޭރަށް ކިޔަވަން ދިއުމުގެ ކުރިން ހޯދަން ޖެހޭ "ރިކޮގްނިޝަން އޮފް ދަ އިންޓެންޑެޑް ޕްރޮގްރާމް" ހޯދުމަށް އެ އޮތޯރިޓީން ވަނޫ ނަސޭހަތްތެރިވެފައެވެ.
އަދި، "ރިކޮގްނިޝަން އޮފް ދަ އިންޓެންޑެޑް ޕްރޮގްރާމް" ނުހޯދާ ކިޔެވުން ފަށާފައިވާ ދަރިވަރުންވެސް ވީ އެންމެ އަވަހަށް މި ލިޔުން ހޯދުމަށް އެމް.ކިއު.އޭ އަށް ހުށަހެޅުމަށް ވަނީ އެދިފައެވެ.
އެމްކިޔުއޭއިން އިތުރަށް ބުނީ، އެ ކަންކަން ކަށަވަރުނުކޮށް ސަނަދެއް ހާސިލުކޮށް، ވެލިޑޭޓް ކުރުމަށް އެމް.ކިއު.އޭ އަށް ހުށަހެޅި ނަމަވެސް، އެ ކިޔެވި މަރުކަޒަކީ އެމް.ކިއު.އޭ އިން ޤަބޫލުކުރާ މަރުކަޒަކަށް ނުވަނީނަމަ މިކަމުގެ ސަބަބުން ދަރިވަރަށް ލިބޭ ގެއްލުމުގެ ޒިންމާ އެމް.ކިއު.އޭ އިން ނުނަގާނެ ކަމަށެވެ.
Advertisement
This content is created and paid for by advertisers and does not involve Voice Journalists
