ސަރުކާރުން ކައުންސިލަރުން މަދުކުރަން އުޅޭ ނިޔަތް ސާފެއްނޫން: ނާޒިލް
ކައުންސިލަރުންގެ އަދަދު މަދުކުރުމަށް ސަރުކާރުން ގެންގުޅޭ ނިޔަތް ރަނގަޅުނޫންކަމަށް އެމްޑީޕީ ޕީޖީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެއެވެ.
އިދިކޮޅު މައިޕާޓީ، އެމްޑީޕީގެ ޕީޖީ ގްރޫޕުން މިއަދު ބޭއްވި ނުސްވެރިންގެ ބައްދަލުވުމުގައި ވާހަކަދައްކަވަމުން ނާޒިލް ވިދާޅުވީ، ރަށްރަށުގައި ތިބި ކައުންސިލަރުންނަކީ ރާއްޔިތުންނާ ގާތުން މަސައްކަތްކުރަން ހޮވާފައިތިބި ބައެއްކަމަށާއި، އެ ރަށަކަށް ބޭނުންވެފައިވާ ކަންކަން އެންމެ ރަނގަޅަށް އެނގޭނީ ކައުންސިލަށްކަމަށެވެ. ކުރިން އޮތް ނިޒާމް ކަމުނުގޮސްގެން ނިޒާމް ބަދަލުކުރީ ރައްޔިތުން ބޭނުންވެގެންކަމަށެވެ. ނަމަވެސް އެމްޑީޕީ ނޫން ކޮންމެ ވެރިކަމެއްގައިވެސް މަސައްކަތްކުރަނީ ލާމަރުކަޒީ މި ނިޒާމުން ރައްޔިތުންނަށް މަންފާކުރާ މިފަދަ ކަންކަން ބަދަލުކުރުމަށް މަސައްކަތްކުރަމުންދާ މަންޒަރުކަމަށް ނާޒިލް ފާހަގަކުރެއްވިއެވެ.
ނާޒިލް ވިދާޅުވީ އިދާރީ ދާއިރާތައް ލާމަރުކަޒީ އުސޫލުން ހިންގުން ފަހަތަށްދާދިއުން ހުއްޓުވުމަށް ރައްޔިތުން ނިކުމެ މަސައްކަތްކުރަންޖެހޭކަމަށެވެ. ކައުންސިލަރުން އިތުރުވީމައި ބަޖެޓަށް ބާރުބޮޑުވާކަމަށް ސަރުކާރުން ދައްކާ ބަހަނާގައި އަސާސެއް ނެތްކަން ފާހަގަކުރަމުން ނާޒިލް ވިދާޅުވީ، ސަރުކާރުން ކުރަމުން އަންނަ ބޭނުމެއްނެތް ހަރަދުތައް އެހާމެ ބޮޑުކަމަށެވެ. އެގޮތުން އީދަށް ބޮކިފަތި ދިއްލުމަށް އެކަނިވެސް ބޭނުންނެތް ގޮތުގައި އެތައް މިލިއަން ރުފިޔާއެއް ސަރުކާރުން ހަރަދުކުރާކަމަށް ނާޒިލް ފާހަގަކުރެއްވިއެވެ.
" ތިބޭފުޅުން ވިސްނާލައްވާ. ދެ އީދަށް ބޮކި ދިއްލާލުމަށް ކޮންމެ އީދަކަށް 35 މިލިއަން ރުފިޔާ، އެއީ ތިން ރޭ ބޮކި ދިއްލާލުމަށް. ދެއީދަށް ބޮކިފަތި ދިއްލާލުމަށް 70 މިލިއަން ރުފިޔާ. ބޮކިފަތި ދިއްލުންތޯ ރަނގަޅީ، ނުވަތަ ރައްޔިތުންނާ ގާތުން މަސައްކަތްކޮށްދޭނެ މަންދޫބުންގެ ގޮތުގައި ކައުންސިލަރުން ތިބުންތޯ މުހިއްމީ؟" ނާޒިލް ސުވާލު އުފެއްދެވިއެވެ
ރަށްރަށުެގ ކައުންސިލްތަކުގައި މަސައްކަތްކުރާ ކައުންސިލަރުންގެ އަދަދު މަދުކޮށް ބަޖެޓް ކުޑަކުރުމަށް މަޖިލީހަށް ސަރުކާރުން ވަނީ މަޖިލީހުގެ ތަޅުމަށް ގަރާރެއް ހުށަހަޅާފައެވެ. މި ގަރާރު ދިރާސާކުރުމަށް މިހާރު ވަނީ ލާމަރުކަޒީ ކޮމިޓީއަށް ފޮނުވާފައެވެ. ކައުންސިލަރުންގެ މައްސަލާގައި ރައީސް ޑރ.މުއިއްޒުވެސް ވިދާޅުވެފައިވަނީ ކައުންސިލްގެ އޮނިގަނޑު މިހާރު އޮތީ ދައުލަތުގެ ބައިތުލްމާލަށް ބާރުބޮޑުވާ ގޮތަށްކަމަށެވެ. އެގޮތުން ސަރުކާރުގެ ވިސްނުމަކީ އެރަށެއްގެ އާބާދީއަށް ފެތޭގޮތަށް މިހާރު އޮތްގޮތް މުރާޖައާކުރުމަށްފަހު އެކަން އެންމެ ރަނގަޅަށް ބަދަލުކުރުންކަމަށް ރައީސް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
