އެމެރިކާއިން އީރާނުގެ ނިއުކްލިއަރ ތިން ސައިޓަކަށް ކާމިޔާބު ހަމަލާތަކެއް ދީފައިވާ ކަމަށް އެގައުމުގެ ރައީސް ޑޮނަލްޑް ޓްރަމްޕް ހާމަކޮށްފިއެވެ.
މި ހަމަލާތައް ދީފައިވަނީ ހޮނިހިރު ދުވަހު ކަމަށާ، ހަމަލާތައް ދިން ބޯޓުފަހަރު މިހާރު ސަލާމަތްކަމާއެކު އެނބުރި އެމެރިކާއަށް އައުމަށް ދަތުރު ފަށާފައިވާ ކަމަށް ޓްރަމްޕް ވަނީ ބުނެފައެވެ.
"އީރާނުގައި ހުންނަ ފޮޑޯ، ނަޓަންޒް އަދި އިސްފަހާން ހިމެނޭހެން، ތިން ނިއުކްލިއަރ ސައިޓަށް އަޅުގަނޑުމެން ކާމިޔާބު ހަމަލާތަކެއް ދީފައިވާނެ. ހުރިހާ ބޯޓުފަހަރު މިހާރު އީރާނުގެ ވައިގެ ސަރަހައްދުން ބޭރުވެފައިވާނެ. އެންމެ މުހިންމު ސައިޓް ކަމަށްވާ ފޮޑޯއަށް ވަރުގަދަ ބޮމުގެ ހަމަލާތަކެއް ވާނީ ދީފައި. އެމެރިކާގެ އަސްކަރީ ހަނގުރާމަވެރިންނަށް އަޅުގަނޑު ވަރަށް ހޫނު މަރުހަބާއެއް ދަންނަވަން. އެމެރިކާ ފިޔަވައި، ދުނިޔޭގެ އެހެން އެއްވެސް އަސްކަރިއްޔާއަކަށް މިކަމެއް ނުކުރެވުނީސް. މިހާރު ސުލްހައިގެ ވަގުތު.“ ޓްރަމްޕް މީސް މީޑިއާގައި ކުރި ޕޯސްޓެއްގައި ބުނެފައިވެއެވެ.
ހޮނިހިރު ދުވަހުގެ ރޭ ވައިޓް ހައުސްގައި ގައުމާ މުޚާތަބުކޮށް ވާހަކަދައްކަމުން ޓްރަމްޕް ވަނީ، މި ހަމަލާތަކަކީ "އަސްކަރީ ކާމިޔާބީއެއް" ކަމަށް ސިފަކޮށްފައެވެ.
"އީރާނުގެ މުހިންމު ނިއުކްލިއަރ ވަސީލަތްތައް ވާނީ މުޅިން ފުނޑުފުނޑުކޮށްލާފައި. މެދުއިރުމަތީގެ 'ބުލީ'، އީރާނުން ދެން ޖެހޭނީ ސުލްހަ ގާއިމުކުރަން. އެމީހުން އެކަން ނުކޮށްފިނަމަ، ކުރިއަށް އޮތްތަނުގައި ދޭ ހަމަލާތައް މާ ވަރުގަދަވާނެ.“
އެމެރިކާގެ ރައީސް ޑޯނަލްޑް ޓްފަމްޕް
”ފާއިތުވެދިޔަ 40 އަހަރުގެ ތެރޭގައި، އީރާނުން ވަނީ، އެމެރިކާއާއި އިސްރާއިލަށް ހަމަލާތައްދީ، އަހަރުމެންގެ މީހުން މަރާފައި. މިކަންކަން ހުއްޓުވާނަން“ ޓްރަމްޕް ބުނެފައިވެއެވެ.
އެމެރިކާގެ ހަމަލާތައް މައިގަނޑުކޮށް އަމާޒުކުރި ފޮޑޯ ސަރަހައްދަކީ އީރާނުގެ ނިޔުކްލިޔާ މަސައްކަތްތަކަށް އެންމެ މުހިންމު އެއް ސަރަހައްދު ކަމަށް ރިޕޯޓްތައް ބުނާއިރު، ދެން ހަމަލާތައް އަމާޒުކުރި ދެ ސަރަހައްދަކީ ޔުރޭނިއަމް އުފެއްދުމުގެ މަސައްކަތް ކުރާ ދެ ސަރަހައްދު ކަމަށްވެސް ބޭރުގެ މީޑިއާތަކުން ފާހަގަކުރެއެވެ.
Advertisement
This content is created and paid for by advertisers and does not involve Voice Journalists
