ގދ. ތިނަދޫ ސިޓީގެ މޭޔަރު ސައުދު އަލީ އާއި ޑެޕިއުޓީ ނަސްރުﷲ އަލީ އަށް މުސާރަ އާއި އިނާޔަތް ނުލިބޭ ގޮތަށް ސަސްޕެންޑް ކުރަން ލޯކަލް ގަވާމަންޓް އޮތޯރިޓީ (އެލްޖީއޭ) އިން މިއަދު ނިންމައިފި އެވެ.

އެލްޖީއޭ އިން މި ނިންމުން ނިންމީ ތިނަދޫ ކައުންސިލާއި ގުޅޭގޮތުން އެލްޖީއޭ އިން ކުރިއަށް ގެންދިޔަ އިންކުއަރީއަށް ފަހު އެވެ. މި އިންކުއަރީ ކުރިއަށް ގެންދިއުމުގެ ހުއްދަ އެލްޖީއޭއަށް ވަޒީރު ދެއްވީ ފެބްރުއަރީ 17, 2025 ގަ އެވެ.

މި އިންކުއަރީގައި ސިޓީ ކައުންސިލް މެންބަރުންނަށް ލިޔުމުން ޖަވާބުދާރީވާން ހަތް ދުވަހުގެ ފުރުސަތެއް ދިނެވެ. އަދި މި މައްސަލަތަކާއި ގުޅޭ މައުލޫމާތާއި ލިޔެކިޔުންތައް ތިނަދޫ ކައުންސިލް އިދާރާ އިން ވަނީ ހޯދާފަ އެވެ.

* އިދާރާތަކުން ފޮނުވާ ސިޓީތަކަށް ޖަވާބުނުދީ ފޮނުވާލާ މައްސަލަ

* ތިނަދޫން އެހެން ރަށަކަށް ރަށްވެހިކަން ބަދަލުކުރުމަށް ހުށައެޅުމުން 5,000 ރުފިޔާގެ ފީއެއް ނަގާ މައްސަލަ

* ތިނަދޫން އެހެން ރަށަކަށް ރަށްވެހިކަން ބަދަލުކުރުމުގެ ކައުންސިލުން ފީއެއް ނެގުމަށް ނިންމާފައިވާ ނިންމުން ބަދަލުކުރުމަށް އެލްޖީއޭ ބޯޑުން އެންގުމުން އަމަލު ކުރި މައްސަލަ

* އަތޮޅު ކައުންސިލުންނާއި ސަރުކާރުގެ އެހެން އިދާރާތަކުން ތިނަދޫ ކައުންސިލުން ހޯދުމަށް އެދޭ މައުލޫމާތު ނުފޮނުވުން

* އަތޮޅު ކައުންސިލުން އަންގާ އެއްވެސް އެންގުމަކަށް ތިނަދޫ ކައުންސިލުން އަމަލު ނުކުރާ މައްސަލަ

* މާލީ ވުޒާރާގެ ހުއްދަ ނެޔި ކައުންސިލްގެ ބިޑް ކޮމެޓީއާ ބިޑް އިވެލިއޭޝަން ކޮމެޓީއަށް އެލަވަންސް ދޭ މައްސަލަ

* ވަކި ފަރާތަކަށް މަންފާވާ ގޮތަކަށް ކައުންސިލަށް ލޯންޗެއް ގަތުމަށް ޕްރޮކިއުމަންޓް ކަންކަން ކުރިއަށް ގެންދާ މައްސަލަ

* ކައުންސިލްގެ އިދާރީ މުވައްޒިފުންނަށް މަޖުބޫރުކޮށްގެން ވަކި ގޮތަކަށް ކަންކަން ކުރުވާ މައްސަލަ

* ކައުންސިލް މެންބަރު މުހައްމަދު ޒަލީފްގެ ސާބިތު ދަރަނީގެ މައްސަލަ

* ކައުންސިލް މެންބަރުން ކައުންސިލްގެ ޖަލްސާއަށް އެޖެންޑާއަށް ހުށައަޅާ ކަންކަން އެޖެންޑާ ނުކުރުން

މި މައްސަލަތައް ބެލުމަށް ފަހު އެލްޖީއޭ އިން ނިންމީ މޭޔަރު ސައުދު އަލީ މުސާރަ ނުލިބޭ ގޮތަށް ތިން މަހަށް ސަސްޕެންޑް ކުރުމަށެވެ. އަދި ޑެޕިއުޓީ މޭޔަރު ނަސްރުﷲ އަލީ މުސާރަ އާއި އިނާޔަތް ނުލިބޭ ގޮތަށް އެއް މަސް ދުވަހަށް ސަސްޕެންޑް ކުރުމަށެވެ.