ރިޔާސީ އިންތިހާބުގައި ވާދަކުރެއްވުމަށް ގެންގުޅުއްވި ވިސްނުން ބަދަލުނުވާ ކަމަށާ އެމްޑީޕީގެ ރިޔާސީ ޕްރައިމަރީގައި ވާދަ ކުރައްވާނެ ކަމަށް އެ ޕާޓީގެ ޗެއާޕާސަން ފައްޔާޒް އިސްމާއީލް މިއަދު ވިދާޅުވެއްޖެ އެވެ.
އެމްޑީޕީގައި ރިޔާސީ ޓިކެޓަށް ވަަރަށް ބޮޑު ވާދައެއް އެބަ އޮތެވެ. ރައީސް އިބްރާހިމް މުހައްމަދު ސޯލިހާއި ރައީސް މުހައްމަދު ނަޝީދާއި ފައްޔާޒްގެ އިތުރުން ޕާޓީގެ ރައީސް އަބްދުﷲ ޝާހިދާއި މެންބަރު ޑރ. އަހްމަދު ޝަމްހީދު ވެސް ރިޔާސީ ޓިކެޓަށް ޝައުގުވެރިވެވަޑައިގަންނަވަ އެވެ.
ރިޔާސީ ޕްރައިމަރީގައި ވާދަކުރައްވާނެ ކަން އެންމެ ފުރަތަމަ އިއުލާނު ކުރެއްވީ ފައްޔާޒް އެވެ. އޭގެ ފަހުން ނަޝީދު ވަނީ އެ ޝައުގުވެރިކަން ފާޅުކުރައްވާ އަލުން އެމްޑީޕިއާ ގުޅިވަޑައިގެންފަ އެވެ. ނަޝީދު ގުޅިވަޑައިގަތުމުގެ އެއް ދުވަސް ކުރީން ރައީސް ސޯލިހް ވެސް ވަނީ ރަސްމީކޮށް އެކަން އިއުލާނު ކުރައްވާފަ އެވެ. ޝާހިދު އާއި ޝަމްހީދު ވެސް ގެންދަވަނީ ނުރަސްމީކޮށް ތާއީދު އިތުރުކުުރުމުގެ މަސައްކަތް ކުރަމުންނެވެ.
މިއަދު އޮތް ނޫސްވެރީންގެ ބައްދަލްވުމުގައި ސުވާލު ކުރުމުން ފައްޔާޒް ވަނީ ކުރީން ވެސް އިއުލާނު ކުރެއްވި ގޮތަށް ބަދަލެއް ނާންނަ ކަމަށެވެ.
"... ﷲ އިރާދަކުރެއްވިއްޔާ، ދުނިޔޭގައި ހުރިއްޔާ [އެމްޑީޕީގެ ރިޔާސީ ޕްރައިމަރީގައި ވާދަ] ކުރާނަން،" ފައްޔާޒް ވިދާޅުވި އެވެ.
ފައްޔާޒު މިއަދުވެސް ވިދާޅުވީ އެމްޑީޕީ އޮތީ ބަދަހިކޮށް ގަދަކޮށް ކަމަށެވެ. އަދި ޕްރައިމަރީ އޮންނާނެ ކަމަށާ ކިތަންމެ ވާދަވެރި ނަމަވެސް ޕްރައިމަރީއަށް ފަހު ކުރީން އޮތް ބަދަހި ކަމުގައި ދެމި އޮންނާނެ ކަމަށެވެ. އެ ގޮތުން ޕްރައިމަރީ ކާމިޔާބު ކުރާ ކެންޑިޑޭޓަކާ އެކު ޕާޓީގެ މެންބަރުން ދެމި ތިބޭނެ ކަމަށް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
