ރާއްޖޭގެ މިނިވަން ކަމަށް 60 އަހަރު ފުރޭ މުނާސަބަތުގައި ބޭއްވުނު ލޯގޯ ފަރުމާކުރުމުގެ މުބާރާތުން އެއް ވަނަ އަށްހޮވިފައިވާ ލޯގޯ އާންމުކޮށްފި އެވެ.

ސަގާފަތާއި ތަރިކައާ ބެހޭ މިނިސްޓްރީން ވަނީ ރާއްޖޭގެ މިނިވަން ކަމަށް 60 އަހަރު ފުރޭ މުނާސަބަތުގައި ކުރިއަށް ގެންދާ ހަރަކާތްތަކުގައި ބޭނުން ކުރާނެ ލޯގޯއެއް ފަރުމާ ކުރުމަށް ހުޅުވާލާފަ އެވެ. އިމާނަކަށް 30,000 ރުފިޔާ ކަނޑައެޅި އެވެ.

އެ މިނިސްޓްރީން ބުނީ ރާއްޖޭގެ މިނިވަން ކަމަށް 60 އަހަރު ފުރޭ މުނާސަބަތުގައި ބޭއްވުނު ލޯގޯ ފަރުމާކުރުމުގެ މުބާރާތުން އެއް ވަނަ އަށް ހޮވިފައިވަނީ އާންމުކޮށްފައިވާ ލޯގޯ ކަމަށެވެ.

‏މި ލޯގޯ ކުރެހީ ކުޅަދާނަ ފަންނާނު ހދ. ނޭކުރެންދޫ ވާރޭ ވިލާ، ފަރުހާދު އިބްރާހީމެވެ. އެ މިނިސްޓްރީން ވަނީ އޭނާއަށް ތަހުނިޔާ އާއި ހެޔޮ އެދުންތައް ފޮނުވާފަ އެވެ.

ފަރުހާދަކީ ވަރަށް ކުޅަދާނަ ފަންނާނެކެވެ. ވަރަށް މޮޅު ކެލިގްރާފަރެކެވެ. ވަރަށް ރީތިކޮށް އަރަބި އަކުރު ލިޔެ އެވެ.

ރާއްޖޭގައި ބިނާކޮށްފައިވާ އެތައް މިސްކިތްތަކެއްގައި ފަރުހާދުގެ ކުޅަދާނަ ލިޔުންތައް ބަހައްޓާފައިވެ އެވެ. އުމުރުން 48 އަހަރުގެ ފަރުހާދު ވަނީ ދިވެހި އެތައް ޑިޒައިންތަކެއް ފަރުމާ ކޮށްފަ އެވެ.

ފަރުހާދުގެ ފަންނުވެރިކަން ފެންނަ މިސްކިތްތަކުގެ ތެރޭގައި ތޮއްޑޫގައި ބިނާކޮށްފައިވާ މަސްޖިދު އައިޝާ އާއި އައްޑޫ ސިޓީގައި ބިނާކޮށްފައިވާ މަސްޖިދު އިބްރާހިމް ހިމެނެ އެވެ.

މީގެ އިތުރުން ހުޅުމާލޭގައި ބިނާކޮށްފައިވާ އެންމެ ރީތި މިސްކިތްތަކުގެ ތެރޭގައި ހިމެނޭ މަސްޖިދު އުމަރު ބިން ޚައްތާބް އާއި މަސްޖިދު އަމީލް ޖަލީލުގައި ބަހައްޓާފައިވާ ބޯޑްތަކުގެ ފަރުމާ ކުރުންތެރިއަކީ ވެސް ފަރުހާދެވެ.

މީގެ އިތުރުން މާލޭގެ މުންނާރު އަސްލަކަށް ބަލައިގެން ހއ އުލިގަމުގައި ހަދާފައިވާ މުންނާރު ވަށައިގެންވާ ލިޔުންތަކަކީ ވެސް ފަރުހާގެ މަސައްކަތެވެ.