އިންޑިއާއާއި ޗައިނާ އާ ދެމެދު އުފެދިފައިވާ ބޯޑަރުގެ ޒަމާންވީ މައްސަލައަށް ބޭނުންވަނީ ދާއިމީ ދެމެހެއްޓެނިވި ހައްލެއްކަމަށް އިންޑިއާގެ ދިފާޢީ ވަޒީރު ރަޖްނާތު ސިންހް ވިދާޅުވެއްޖެއެވެ.

ނިމިދިޔަ ހަފްތާގައި ޗައިނާގެ ކިންޑާއޯގައި ބޭއްވި ޝަންހާއީ ކޯޕަރޭޝަން ކައުންސިލް (އެސް.ސީ.އޯ)ގެ ދިފާޢީ ވަޒީރުންގެ ބައްދަލުވުމުގެ ހަވާސާގައި މިކަމާއި ބެހޭ ގޮތުން ރަޖްނާތު ސިންހް ވަނީ ޗައިނާގެ ދިފާޢީ ވަޒީރު ޑޮންގް ޖުންގް އާއި މަޝްވަރާކުރައްވާފައެވެ. އަދި ދެޤައުމުގެ ސަރަހައްދީ އިމުގެ ކަންކަން ބެހެލެއްޓުމަށާއި ސަރަހައްދީ އިން ވަކިކުރާ ރޮނގުގެ މައްސަލަތައް ހައްލުކުރުމަށް މަޝްވަރާގެ ނިޒާމެއް ޤާއިމްކުރެވިފައި އޮތުމުގެ މުހިއްމުކަމުގެ މައްޗަށް ސިންހް އަލިއަޅުއްވާލެއްވިކަމަށް އިންޑިއާގެ ދިފާޢީ ވުޒާރާއިން ބުންޏެވެ.

ސަރަހައްދީ އިމުގެ މައްސަލައިގައި އިންޑިއާއިން ކުރިން ބުނަމުން އައިސްފައިވަނީ އެމައްސަލައަށް އަވަސް ހައްލެއް ގެނައުމަށް ބޭނުންވާކަމަށެވެ. އެހެންނަމަވެސް 'އަވަސް' ހައްލަކުން 'ދާއިމީ' ހައްލަކަށް އިންޑިއާގެ ބަސްމަގު ބަދަލުވުމުން، މިމައްސަލަ ކޮޅެއްގައި ޖެއްސުމަށް އިންޑިއާއިން އަހައްމިއްޔަތުކަން ދޭ މިންވަރު ދޭހަވާކަމަށް މުރާސިލުން ބުނެއެވެ.

ޗައިނާއިން ބުނީ ސަރަހައްދީ ރޮނގުގެ މައްސަލަ ހައްލުކުރެވެންދެންވެސް ދިމާވާ ކުދިކުދި އެހެން މައްސަލަތަކަކީ ދެގައުމުގެ މެދުގައި އޮންނަ މައިގަނޑު ގުޅުމަށް ބުރޫ އަރާފަދަ ކަންކަމަށް ވެގެން ނުވާނެކަމަށެވެ.

ދުނިޔޭގެ އާބާދީ އެންމެ ބޮޑު މި ދެގައުމުން 3800 ކިލޯމީޓަރުގެ ދިގު ސަރަހައްދީ ރޮނގެއް ހިއްސާކުރެއެވެ. މީގެ ތެރެއިން ބޮޑު ބައި އޮންނަނީ ފާހަގަނުކޮށެވެ. ޚާއްސަކޮށް ހިމާލިޔާ ފަރުބަދަތައް މަތީ ސަރަހައްދު އޮންނަނީ ހުސްކޮށެވެ. އަދި ސަރަހައްދީ ރޮނގުގެ މައްސަލައިގައި ދެގައުމުން ހަނގުރާމަވެސް ކޮށްފައި އެބަހުއްޓެވެ. 2020 ވަނަ އަހަރު އެންމެ ފަހުން ހިނގި ކުރިމަތިލުންތަކުގައި އިންޑިއާ ސިފައިންގެ 20 މީހަކާއި، ޗައިނާ ސިފައިންގެ 4 މީހަކު މަރުވިއެވެ.