ޓެސްލާ އާއި ސްޕޭސްއެކްސްގެ ސީ.އީ.އޯ. އަދި މުއްސަނދި މަހުޖަނު އީލޯން މަސްކު، އެމެރިކާ ދޫކޮށް ދެކުނު އެފްރިކާއަށް އެނބުރި ދާންޖެހިދާނެ ކަމަށް  ބުނެ އެމެރިކާގެ ރައީސް ޑޮނާލްޑް ޓްރަމްޕް އިންޒާރުދީފިއެވެ.

ޓްރަމްޕް މީސްމީޑިއާގައި ކުރި ޕޯސްޓެއްގައި ބުނީ، ނިމިދިޔަ ރިޔާސީ އިންތިޚާބުގައި އޭނާއަށް ތާއީދުކުރުމަށް މަސްކު ނިންމި އިރުވެސް، އޭނާއަކީ އިލެކްޓްރިކް ކާރުތައް މަޖުބޫރުކުރުމާ (އީ.ވީ. މެންޑޭޓް) ދެކޮޅު މީހެއްކަން މަސްކުއަށް އެނގޭނެ ކަމަށެވެ. އަދި އެއީ އޭނާގެ ކެމްޕެއިންގެ މައިގަނޑު އެއް އަމާޒު ކަންވެސް ފާހަގަކޮށްފައިވެއެވެ. 

"އިލެކްޓްރިކް ކާރުތަކަކީ ރަނގަޅު އެއްޗެއް ނަމަވެސް، އެންމެންނަށް އެފަދަ ކާރެއް ގަންނަން މަޖުބޫރުކުރެވިގެން ނުވާނެ. އެންމެންނަށް އެ ނުވެސް ގަނެވޭނެ،" ޓްރަމްޕް ބުންޏެވެ.

ޓްރަމްޕް އިތުރަށް ބުނީ، އެލޯން މަސްކަށް ތާރީޚުގައި އެންމެ ގިނަ ސަބްސިޑީ ލިބިފައިވާނީ އޭނާގެ ސަރުކާރުން ކަމަށާ ، "ސަބްސިޑީ ނުލިބިއްޖެނަމަ މަސްކުގެ ވިޔަފާރި ބަންދުކޮށްލާފައި އޭނާގެ އުފަން ޤައުމު ދެކުނު އެފްރިކާއަށް އެނބުރި ދާންޖެހިދާނެ" ކަމަށެވެ.

އެހެން އެކަން ދިމާވެއްޖެ ނަމަ، ރޮކެޓް ފޮނުވުމާއި، ސެޓެލައިޓް އުފެއްދުމާއި، އިލެކްޓްރިކް ކާރު އުފެއްދުންވެސް ހުއްޓައިލަން ޖެހޭނެ ކަމަށް ޓްރަމްޕް ބުނެފައިވެއެވެ.

މީގެ ސަބަބުން އެމެރިކާގެ ދައުލަތުގެ ބަޖެޓުން "ބޮޑު އަދަދެއް ސަލާމަތްވާނެ" ކަމަށްވެސް ޓްރަމްޕް ބުންޏެވެ.

"މިކަމަށް ރަނގަޅަށް ބަލައިލުން ރަނގަޅު. ވަރަށް ބައުވަރު ފައިސާ ސަލާމަތްވާނެ.“ ޓްރަމްޕް ބުންޏެވެ.