ބޮޑު ކަންނެލި މަސްވެރިން ބާނާ މަސްނުކިރި، ގިނަ ދުވަސް ވުމުގެ ސަބަބުން މަސް އުކާލަންޖެހި، މަސްވެރިންނަށް ބޮޑު ތަކުލީފްތަކެއް އުފުލަން ޖެހިފައިވާ ކަމަށް ވިދާޅުވެ ކުއްލި މައްސަލައެއް މަޖިލީހަށް ހުށަހަޅުއްވައިފިއެވެ.

މަޖިލީހުގެ މިއަދުގެ ޖަލްސާގައި މި މައްސަލަ ހުށަހަޅުއްވާފައި ވަނީ ވައިކަރަދޫ ދާއިރާގެ މެންބަރު ހުސައިން ޒިޔާދެވެ. 

ޒިޔާދު އެ މައްސަލަ ހުށަހެޅުއްވި ސަބަބެއްގެ ގޮތުގައި ފާހަގަކުރެއްވީ، މިހާރުވެސް 120 ޓަނަށްވުރެ ގިނަ މަސްނުކިރި ބަހައްޓަން ޖެހުމުގެ ސަބަބުން ހަލާކުވަމުންދާތީ އެކަން ސަރުކާރުގެ ސަމާލުކަމަށް ގެނައުމެވެ. 

އެގޮތުން، މަސްވެރިން ބާނާ މަސް މިފްކޯ މެދުވެރިކޮށް ސަރުކާރަށް ގަންނަ ގޮތަށް ބަދަލުކޮށް، ބޮޑު ކަންނެލީގެ މަސްވެރިންނަށް މިފްކޯގެ ހިއްސާ ލިބޭނެ ގޮތް ހެދުމާއި، ބޮޑު ކަންނެލީގެ އަގު 80-100 ރުފިޔާގައި ބެހެއްޓުމަކީ ރައީސް ޑރ މުޙައްމަދު މުޢިއްޒުގެ ރިޔާސީ ވަޢުދުފުޅެއްކަން ޒިޔާދު ވަނީ ފާހަގަކުރައްވާފައެވެ. އެހެން ނަމަވެސް އެ ވަޢުދު އަދާއި ހަމައަށްވެސް ފުއްދަވާފައި ނުވާކަމަށް އޭނާ ވިދާޅުވިއެވެ.

މީގެ އިތުރުން މަސްވެރިން ބާނާ މަސް ނުކިރޭ ކަމަށާ، ކަންނެލި ކިރުމަށްފަހުގައިވެސް މަހަށްވާ ލާރި ލިބުން ލަސްވެ، މަސްވެރިކަން ކުރުމަށް ދިމާވާ ދަތިތައް އިންތިހާއަށް އިތުރުވަމުންދާކަމަށް ބުނެ މަސްވެރިން ކަންބޮޑުވުން ފާޅުކުރަމުންދ ކަމަށް ޒިޔާދު ވިދާޅުވިއެވެ. 

ހަމައެއާއެކު މަސްވެރިކަން ރަނގަޅު، ބޭރުގެ މާކެޓު ތަކުގައިވެސް މަހުގެ އަގު މަތިވި ނަމަވެސް، ރާއްޖޭގެ މަސްވެރިންނަށް އެކަމުގެ ފައިދާ ނުލިބޭ ކަމަށާ، އެކަމުގެ ސަބަބުން މަސްވެރި އާއިލާތައް ނިކަމެތިވަމުންދާކަމަށް އޭނާ ވިދާޅުވިއެެވެ.

އެހެންކަމުން، އެކަންކަން ހައްލުކޮށް ރައީސް މުޢިއްޒު ކަންނެލި މަސްވެރިންނަށް ވެވަޑައިގެންނެވި ވަޢުދު ފުއްދެވުމަށް މައްސަލާގައި ވަނީ ސަރުކާރަށް ގޮވާލާފައެވެ. 

މި މައްސަލަ ބަލައިގަތުމަށް 40 މެންބަރުން ވޯޓު ދެއްވާފައިވާއިރު، ބަލައިގަންނަން ނުފެންނަ ކަމަށް އެއްވެސް މެންބަރަކު ވޯޓެއް ނުދެއްވައެވެ.