މިދިޔަ ޖޫން މަހުގެ ތެރޭގައި ވަގަށް ނެގި 69 ސައިކަލެއް ފުލުހުން ހޯދާފައިވާ ކަމަށް ތަފާސް ހިސާބުތަކުން ދައްކައިފި އެވެ.

ފުލުހުން މިއަދު ވަނީ މާލެ ފްރަންޓްލައިން ޕޮލިސިންގެ ޑިޕާޓްމަންޓްތަކުން ކުރަމުންދާ މަސައްކަތުގެ ތެރެއިން ރިކަވާ ކުރެވުނު މުދަލުގެ ތަފާސް ހިސާބުތައް އާންމުކޮށްފަ އެވެ. ފުލުހުން ބުނީ މިދިޔަ މަހު ވަގަށް ނެގި 69 ސައިކަލެއް ފުލުހުން ހޯދާފައިވާ ކަމަށެވެ. މި ސައިކަލުތަކުގެ އަގު 3.3 މިލިއަނަށް ވުރެ ބޮޑެވެ.

މީގެ އިތުރުން ވަގަށް ނެގި 29 މޯބައިލް ފޯނެއް ވަނީ ހޯދާފަ އެވެ. މީގެ އިތުރުން އިލެކްޓްރޯނިކްސް އައިޓަމްތަކުގެ ތެރެއިން 80,000 ރުފިޔާގެ ތަކެތި ފުލުހުން ވަނީ ހޯދާފަ އެވެ.

ފުލުހުން ބުނި ގޮތުގައި މިދިޔަ މަހު, ފައިސާ ވަގަށް ނެގުމުގެ 26 މައްސަލައެއްގައި ހިމެނޭ 400,000 ވުރެ ގިނަ ރުފިޔާ ވެސް ފުލުހުން ވަނީ ހޯދާފަ އެވެ.

ފުލުހުންގެ ތަފާސް ހިސާބުތައް ދައްކާ ގޮތުން މިދިޔަ ޖޫން މަހުގެ ތެރޭގައި 5015 މީހަކު ހުއްޓުވާ ސުވާލުކުރި އެވެ. އޭގެ ތެރޭގައި 4833 މީހުންނަކީ ކުށުގެ ރެކޯޑް އޮތް މީހުން ކަމަށް ފުލުހުން ބުންޏެވެ.

ކުށުގެ ރެކޯޑް ނެތް މީހުންގެ އަދަދަކީ 182 މީހުންނެވެ.