ފޮޓޯތަކެއް ހުރިކަމަށް ބުނެ ޓެލެގްރާމުން ފޮނުވާ ޕިޝިންގ ލިންކު މެދުވެރިކޮށް ޓެލެގްރާމް ހެކްކުރުމުގެ މައްސަލަތައް އިތުރުވަމުންދާކަން ފާހަގަކުރެވިފައިވާކަމަށް ދިވެހި ފުލުހުންގެ ޚިދުމަތުން ބުނެފިއެވެ.

ފުލުހުން ބުނެފައިވާ ގޮތުގައި، މި ލިންކުތައް އަންނަނީ އިތުބާރުކުރެވޭ ނުވަތަ ގާތް މީހެއްގެ ނަމުގައި ފޮނުވާ މެސެޖަކާއެކު އެވެ. އެ މެސެޖުގައިވާ ލިންކަށް ފިތައިލުމުން ފޯނު ނަންބަރު ޖެހުމަށް ބުނެއެވެ. އަދި ފޯނަށް އަންނަ އޯޓީޕީ ހިއްސާކުރުމަށް ބުނާނެ ކަމަށާއި، އެ އޯޓީޕީ ހިއްސާކޮށްފިނަމަ ޓެލެގްރާމް އެކައުންޓުގެ އެކްސްސެސް، ސްކޭމްކުރާ ފަރާތަށް ލިބިގެންދާނެކަމަށެވެ.

ފޯނަށް އަންނަ އޯޓީޕީ ހިއްސާކޮށްފިނަމަ، ސްކޭމް ކުރާ ފަރާތުން، ޓެލެގްރާމް އެކައުންޓްގެ ވެރިފަރާތުގެ ނަމުގައި އެހެން މީހުންނަށް ސްކޭމް ޕިޝިންގ ލިންކު ފޮނުވަމުންދާނެކަމަށް ފުލުހުން ވަނީ ބުނެފަ އެވެ.

ޓެލެގްރާމް އެކައުންޓު ރައްކާތެރިކުރުމަށްޓަކައި، ޓެލެގްރާމްގައި ޓޫ-ސްޓެޕް ވެރިފިކޭޝަން އެކްޓިވޭޓްކުރުމާއި، އިތުބާރުކުރެވޭ ނުވަތަ ގާތް މީހެއްގެ ނަމުގައި މިފަދަ ލިންކު ފޮނުވިކަމުގައިވިޔަސް އެއަށް ސަމާލުކަންނުދީ މިފަދަ ލިންކުތަކަށް ނުފިތުމަށް ފުލުހުން ވަނީ އިލްތިމާސްކޮށްފަ އެވެ.

ސްކޭމަރުން ދަނީ ތަފާތު އެކި އުކުޅުތަށް ބޭނުންކޮށްގެން މީހުން ސްކޭމްތަކުގައި ޖައްސަމުންނެވެ. ފުލުހުންނާއި ކަމާ ގުޅުންހުރި އިދާރާތަކުން ސްކޭމްތަކާއި ގުޅޭގޮތުން މީހުން ހޭލުންތެރިކުރުމުގެ ޕްރޮގްރާމުތައް ހިންގި ނަމަވެސް މި ފަދަ ސްކޭމްތަކުގައި ޖެހޭ މީހުންގެ އަދަދު ގިނަ އެވެ.