ހުޅުމާލޭ ފޭސް އެކެއްގެގައި މިއަދު މެންދުރު ހިނގި އަލިފާނުގެ ހާދިސާގައި ގެއްލުންވި 21 ފަރާތަކަށް ވަގުތީ ބޯހިޔާވަހިކަން ފޯރުކޮށްދީފި އެވެ.

މި ހާދިސާ ހިނގާފައިވަނީ 94 ވަނަ ފްލެޓްގެ 2 ވަނަ ފަންގިފިލާގައެވެ. ވޮއިސް އަށް މައުލޫމާތު ލިބިފައިވާ ގޮތުގައި އަލިފާނުގެ ހާދިސާ ހިނގި އެ އެޕާޓްމެންޓްގައި 11 ބިދޭސީން ދިޔައީ ދިރިއުޅެމުންނެވެ. ހާދިސާ ހިނގި ވަގުތު އެޕާޓްމެންޓްގައި އެއްވެސް މީހަކު ނޫޅެއެވެ.

މި ކަމާއި ގުޅިގެން ނެޝަނަލް ޑިޒާސްޓާސް މެނޭޖުމެންޓް އޮތޯރިޓީ (އެން.ޑީ.އެމް.އޭ) އިން ބުނެފައިވަނީ އަލިފާނުގެ ހާދިސާގައި 4 އެޕާޓްމަންޓަކަށް އެކިވަރުގެ ގެއްލުންތައް ލިބިފައިވާކަމަށެވެ. އެގޮތުން 21 މީހަކަށް ވަގުތީ ބޯހިޔާވަހިކަން މިވަގުތު ފޯރުކޮށްދެމުން އަންނަކަމަށް ޑިޒާސްޓާ އޮފީހުން ބުންޏެވެ.

އަލިފާނުގެ ހާދިސާ ހިނގި އެޕާޓްމަންޓް ދިރިނޫޅެވޭވަރަށް އަލިފާނުގެ އަސަރުކޮށް ތަނުގައި ހުރި ފަރުނީޗަރުތަކާއި، ހިފާގެންގުޅޭ އާލާތްތައް ވަނީ ބޭނުން ނުކުރެވޭވަރަށް އަނދައިގެން ގޮސްފައެވެ. ވޮއިސްއަށް މައުލޫމާތު ލިބިފައިވާ ގޮތުގައި އަލިފާނުގެ ހާދިސާ ހިނގި އެޕާޓްމަންޓްގައި މީގެ 6 މަސް ދުވަސްކުރިންވެސް ވަނީ އަލިފާން ރޯވެފައެވެ. މައުލޫމާތު ލިބިފައިވާ ގޮތުގައި އެފަހަރު އަލިފާން ރޯވެފައިވަނީ ޗާޖަށް ޖަހާފައިވާ ފޯނެއްގައި ރޯވެގެންނެވެ. މިއަދު ހިނގި އަލިފާނުގެ ހާދިސާގައި ރޯވި ސަބަބެއް ކަމާބެހޭ ފަރާތްތަކުން އަދި ހާމަކޮށްފައެއް ނުވެއެވެ.

އަލިފާން ރޯވި އެޕާޓްމަންޓަކީ ބިދޭސީން ދިރިއުޅުމަށް ބޭނުންކުރާ ތަނެކެވެ. ފުލުހުން ބުނެފައިވަނީ އެތަނުގައި ދިރިއުޅެމުންދަނީ 11 މީހުން ކަމަށެވެ. ނަމަވެސް އެ އެޕާޓްމަންޓް ކައިރީ އުޅޭ ބައެއް އަވައްޓެރިން ވޮއިސްއާ މައުލޫމާތު ހިއްސާކުރަމުން ބުނެފައިވަނީ އެތަނުގައި ބައެއްފަހަރު އޭގެ ދެގުނައަށް މީހުން އުޅެމުންދާކަމަށެވެ.