ފޭކް ސްލިޕް ފޮނުވިކަމުގެ ތުހުމަތުގައި ފުލުހުން ހައްޔަރުކުރި ދެމީހުން މިއަދު ދޫކޮށްލައިފި އެވެ.

ފޭކް ސްލިޕް ބޭނުން ކޮށްގެން ވިޔަފާރިކުރުމުގެ ތުހުމަތުގައި ގ. ސިނަމާލެ 1 05-13، އުމުރުން 28 އަހަރުގެ ޒައިދާން މުޙައްމަދު ހާޝިމް އާއި ބަންގްލަދޭޝްއަށް ނިސްބަތްވާ އުމުރުން 30 އަހަރުގެ އަފްރިން އަކްތަރު، ފުލުހުން ހައްޔަރުކުރީ މިދިޔަ ޖޫން މަހުގެ 17 ވަނަ ދުވަހު އެވެ.

މި ދެ މީހުން ހައްޔަރުކޮށް ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން އޭރު ވަނީ ޒައިދާން 15 ދުވަހަށް އަދި އަފްރިން އަކްތަރު ފަސް ދުވަހުގެ މުއްދަތަކަށް ބަންދުކުރުމަށް އަމުރުކޮށްފަ އެވެ.

މި މައްސަލަ އާއި ގުޅިގެން ފުލުހުން މިއަދު ބުނެފައި ވަނީ މައްސަލައިގެ ތަހުގީގަށް މި ދެ މީހުން އިތުރަށް ބަންދުގައި ބޭތިއްބުމަށް ނުފެންނާތީ ދެ މީހުން ވަނީ ފުލުހުންގެ ބަންދުން ދޫކޮށްލާފައިވާ ކަމަށެވެ.

ފުލުހުން މިއަދު ބުނެފައި ވަނީ ސައްހަ ނޫން ޓްރާންސްފަރ ސްލިޕް ފޮނުވައިގެން އެކި ފިހާރަތަކުން ވިޔަފާރިކުރި މައްސަލައިގައި ގެއްލުންވި 80،000 އަށްވުރެ ގިނަ ރުފިޔާ އަނބުރައި އޭގެ ވެރިފަރާތްތަކަށް މިހާރު ހޯދައިދެވިފައިވާ ކަމަށެވެ. މި ފައިސާއަކީ އެކި ފިހާރަތަކަށް ފޭކު ސްލިޕް ފޮނުވައިގެން އެ ފިހާރަތަކުން ނަގާފައިވާ މުދަލަށްވާ ފައިސާއެވެ.

މި ދެމީހުން ބަންދުން ދޫކޮށްލި ނަމަވެސް ފުލުހުންދަނީ މި މައްސަލަ އިތުރަށް ތަހުގީގުކުރަމުންނެވެ.