އިންޓެލެކްޗުއަ ޕްރޮޕަޓީ އޮފީހެއް ގާއިމްކޮށް، ފިކުރީ މުދަލުން ވައްކަން ކުރުން ހުއްޓުވުމަށް މަޖިލީހަށް ބިލެއް ހުށަހަޅައިފިއެވެ.

ސަރުކާރުގެ ފަރާތުން، މި ބިލު ހުށަހެޅުއްވީ ކުޑަހުވަދޫ ދާއިރާގެ މެންބަރު ޙުސައިން ޙަމީދެވެ.

މި ބިލު ހުށަހެޅުމުގެ ބޭނުމަކީ، ދިވެހިރާއްޖޭގައި ފިކުރީ މުދާ ހިމާޔަތްކޮށް، ކުރިއެރުވޭނެ ހަރުދަނާ ނިޒާމެއް ގާއިމްކޮށް، ވިޔަފާރީގެ ދާއިރާގައި ފަންނުވެރިކަމާއި، އިނޮވޭޝަންއަށް ހިތްވަރުދީ، އެ ދާއިރާ ކުރިއަރުވައި، ގައުމުގެ އިގްތިޞާދީ ތަރައްގީއަށް މަގުފަހި ކުރުމަށްޓަކައި، ’މޯލްޑިވްސް އިންޓެލެކްޗުއަލް ޕްރޮޕަޓީސް‘ ގެ ނަމުގައި އޮފީހުގެ ނަމުގައި ސަރުކާރުގެ އިދާރާއެއް ގާއިމްކޮށް، އެ އޮފީހުގެ މަސްއޫލިއްޔަތު ތަކާއި ބާރުތަކާއި އެނޫންވެސް އުސޫލުތައް ބަޔާން ކުރުން ކަމަށް ބިލުގައި ވެއެވެ.

* ފިކުރީ މުދާ ރަޖިސްޓްރީކުރުން.

* ރަޖިސްޓްރީކުރެވޭ ފިކުރީ މުދަލާ ބެހޭ ދަފްތަރެއް އެކުލަވާލައި އަދާހަމަކޮށް ބެލެހެއްޓުން.

* ބައިނަލްއަގްވާމީ އިންޓަލެކްޗުއަލް ޕްރޮޕަޓީ ޖަމިއްޔާތަކާ ގުޅުން ގާއިމުކޮށް، ފަންނީ އެހީއާއި ލަފާ ހޯދުން.

* ފިކުރީ މުދަލާ ގުޅޭ ބައިނަލްއަގްވާމީ މުއާހަދާތަކުގައި ބައިވެރިވުން.

* ފިކުރީ މުދަލުގެ ދާއިރާއިން ސަރަހައްދީ އަދި ބައިނަލްއަގުވާމީ ފެންވަރުގައި އަންނަ ކުރިއެރުންތައް ދިރާސާކުރުން.

* ފިކުރީ މުދަލާ ގުޅޭގޮތުން ރާއްޖޭގައި އަމަލުކުރާ ގާނޫނުތަކުގެ ދަށުން ލިބިދޭ ހައްގުތަކާ ގުޅޭގޮތުން އާންމުން ހޭލުންތެރިކުރުވުމުގެ ޕްރޮގްރާމްތައް ހިންގުން.

* ފިކުރީ މުދަލާގުޅޭ ކަމާބެހޭ ގާނޫނުތަކުގެ ދަށުން ފޯރުކޮށްދޭންޖެހޭ ޚިދުމަތްތައް ފޯރުކޮށްދިނުމާއި އެ ގާނޫނުތަކުގެ ދަށުން އެ ޚިދުމަތްތަކަށް ކަނޑައަޅާފައިވާ ފީ ނެގުން.

* ފިކުރީ މުދަލާގުޅޭ ކަމާބެހޭ ގާނޫނުތަކުގެ ދަށުން މޯލްޑިވްސް އިންޓެލެކްޗުއަލް ޕްރޮޕާޓީ އޮފީހުގެ މަސްއޫލިއްޔަތުތައް ކަމުގައި ކަނޑައަޅާ އެނޫންވެސް މަސްއޫލިއްޔަތުތައް އަދާކުރުން.

ބިލު ހުށަހަޅުއްވަމުން މެމްބަރު ހަމީދު ވިދާޅުވީ، ބިލުގެ ސަބަބުން ރާއްޖޭގެ ޒުވާނުންނަށާއި، އުފެންދުންތެރިންނަށް މީގެ ކުރިން ލިބިފައިނުވާ އެތައް ހައްގުތަކެއް ކަށަވަރުވެގެންދާނެކަމަށެވެ. 

”މި ބިލު ހުށައެޅުމުގެ މައިގަނޑު މަގްސަދަކީ ފިކުރީ މުދާ ހިމާޔަތްކުރާނެ ހަރުދަނާ ނިޒާމެއް ގާއިމްކޮށް، އެ ނިޒާމަށް ފާރަވެރިވާނެ، ޒިންމާދާރުވާނެ ފަރާތެއް ކަނޑައަޅާ އޮފީހެއްގެ ނަމުގައި އެކަން އުފެއްދުން.“ ހަމީދު ވިދާޅުވިއެވެ.

މި ބިލުގައި ފިކުރީ މުދަލުގެ ގޮތުގައި ބަޔާންކޮށްފައިވާ ތަކެތީގެ ތެރޭގައި، ޓްރޭޑްމާކާއި، ކޮޕީރައިޓާއި، ޕޭޓަންޓާއި، އިންޑަސްޓްރިއަލް ޑިޒައިން އަދި ޖިއޮގްރަފިކަލް އިންޑިކޭޝަންތައް ހިމެނެއެވެ.