އޮރިޖިނަލް ޒަމްޒަމް ފެން ކަަމަށް ބުނެ އިސްކުރު ފެން ވިއްކާ ކަމަށް ބެލެވޭ މައްސަލަ ފުލުހުން ބަލަން ފަށައިފި އެވެ.
ޒަމްޒަމް ފެން ކަމަށް ބުނެ އިސްކުރު ފެން ވިއްކާ ކަމަށް ތުހުމަތުކޮށް އެ މައްސަލަ ބަޔަކު ވަނީ ސަމާލު ކަމަށް ގެނެސްފަ އެވެ. ޒަމްޒަމް ފެން ބަންދުކޮށްފައި ހުންނަ ފުޅީފައި ޒަމްޒަމް ފެން ކަމަށް ބުނެ އިސްކުރު ފެން އަޅައިގެން ބަންދު ކުރަނީ ޔޫއޭއީ ގައި ކަމަށް ވެ އެވެ.
އެ ފެން ރާއްޖެ ގެނެސް ބަޔަކު ދަނީ ވިއްކަމުންނެވެ. ފެން ފުޅިއެއް ވިއްކަނީ 550 ރުފިޔާ އަށެވެ.
އެ ފެން ވިއްކަން ޕޭޖެއް ހަދާ ފެން ގަންނަން ބޭނުންވާ މީހުން ގުޅާނެ ނަންބަރެއް ވެސް ވަނީ ހިމަނާފަ އެވެ.
ރިޕޯޓްތައް ބުނާ ގޮތުން އޮޅުވާލައިގެން އެކަން ކުރާ ޔޫއޭއީގެ ކުންފުނީގެ މަސައްކަތް އެ ގައުމުގެ ކަމާގުޅޭ އިދާރާތަކުން ވަނީ ހުއްޓުވާފަ އެވެ. އަދި ބަޔަކު ވަނީ ހައްޔަރުކޮށް މައްސަލަ ތަހުގީގު ކުރަން ފަށާފަ އެެވެ.
ފުލުހުން މިއަދު ބުނި ކަމާގުޅޭ އިދާރާތަކާއި ގުޅިގެން އެކަަމުގެ މައުލޫމާތު ސާފުކޮށް ބަލަން ޖެހޭ ކަންކަން ދަނީ ބަލަމުން ކަމަށެވެ.
ޒަމްޒަަމް ފެން ބޭރުކުރުން ސައުދީން އޮންނަނީ ވަރަށް ހަރުދަނާ އުސޫލެއްގެ ތެރޭގައި ހިފަހައްޓާފަ އެވެ. އެއީ އެ ފެނުގެ ވިޔަފާރި ނުގަވައިދުން ހިންގުމާއި އެ ނޫން ސަބަބުތަކާއި ގުޅިގެންނެވެ. ޒަމްޒަމް ފެނަކީ ބަރަކާތް ލެއްވިގެންވާ ފެނެކެވެ. އެއީ ދުޅަހެޔޮ ކަމާއި ބަލިތަކުން ފަސޭހަވުމަށް އޮތް ޝިފާއެއް ވެސް މެ އެވެ.
Advertisement
This content is created and paid for by advertisers and does not involve Voice Journalists
