ދުނިޔޭގެ ބިމުން މިހާތަނަށް ފެނިފައިވާ އެންމެ ބޮޑު، މާސް ޕްލެނެޓްގެ ގައު (މެޓިއޮރައިޓް) 4.3 މިލިއަން ޑޮލަރަށް ވިއްކާލައިފިއެވެ. މި ގައު ވިއްކާލާފައިވަނީ ނިއުޔޯކްގައި ހުންނަ ސޯތަބީސް އޮކްޝަން ހައުސްގައި ބޭއްވުނު ނީލަމެއްގައެވެ. 

"އެންޑަބްލިޔުއޭ 16788" ގެ ނަމުން މަޝްހޫރު މި ގަލުގެ ބަރުދަނަކީ 24.5 ކިލޯގްރާމެވެ. އަދި އޭގެ ދިގުމިނަކީ ގާތްގަނޑަކަށް 38.1 ސެންޓިމީޓަރެވެ. ސޯތަބީސް އިން ހާމަކުރި ގޮތުގައި، މިއީ މިހާތަނަށް ބިމުން ފެނިފައިވާ މާސްގެ އެންމެ ބޮޑު ގަލެވެ. އަދި މިގައު، މިހާތަނަށް ފެނިފައިވާ ދެވަނަ އެންމެ ބޮޑު ގަލަށްވުރެ 70 އިންސައްތަ ބޮޑެވެ.

މި ގާ ފެނިފައިވަނީ 2023 ވަނަ އަހަރުގެ ނޮވެމްބަރު މަހު ނައިޖަރގެ ސަރަހައްދަކުންނެވެ. އުޑުގާ ނުވަތަ މެޓިއޮރައިޓަކީ، ތަރިއެއް ނުވަތަ ކޮމެޓެއް ބިމުގެ ފަޒާގެ ތެރެއިން ދަތުރުކުރުމަށްފަހު ބާކީވާ ގައުގެ ބައިތަކެވެ.

ސޯތަބީސް އޮކްޝަން ހައުސް އިން ބުނި ގޮތުގައި، މިފަދަ ރަތްކުލަޔަށްދާ މުށިކުލައިގެ ގައު ވަރަށް މަދެވެ. މިހާތަނަށް ބިމުން ފެނިފައިވަނީ މާސްގެ ގާތްގަނޑަކަށް 400 މެޓިއޮރައިޓެވެ. ސޯތަބީސްގެ ސައިންސް އަދި ނެޗުރަލް ހިސްޓަރީގެ ނައިބު ޗެއަރމަން ކަސަންޑްރާ ހެޓަން އޮންލައިންކޮށް ދޫކޮށްލި ވީޑިއޯއެއްގައި ވިދާޅުވީ، މާސް ޕްލެނެޓްގެ އެހާ ބޮޑު ގަލެއް ދުނިޔޭގެ ބިމާ ހަމައަށް ފޯރުމަކީ ވަރަށް ކުޑަ ޗާންސެއް އޮތް ކަމެކެވެ. 

"މިއީ ބިމުން ފެނުނު މާސްގެ އެންމެ ބޮޑު ގައު. މާސް އިން މިތަނަށް (ބިމަށް) މި އައުމުގެ ފުރުސަތު ނިހާޔަތަށް ކުޑަ. ބިމުގެ ގާތްގަނޑަކަށް 70 އިންސައްތަ ސަރަހައްދުގައި ފެން ހުރޭ. އެހެންކަމުން، މި ގާ ކަނޑުގެ ތެރެއަށް ނުވެއްޓި، ބިމުގެ ހިކި ސަރަހައްދަކަށް ވެއްޓުމަކީ އަހަރެމެންނަށް ލިބުނު ވަރަށް ބޮޑު ނަސީބެއް." ކަސަންޑްރާ ވިދާޅުވިއެވެ. 

ނީލަމުގައި 4.3 މިލިއަން ޑޮލަރަށް ވިއްކި ނަމަވެސް، އިތުރު ޓެކްސްއާއި ފީ ހިމަނައިގެން ގަލުގެ ޖުމުލަ އަގު ގާތްގަނޑަކަށް 5.3 މިލިއަން ޑޮލަރަށް އަރައެވެ. މި ގައު ގަތް ފަރާތުގެ މައުލޫމާތު ވަނީ ސިއްރުކޮށްފައެވެ.

މި ބުދަ ދުވަހު ބޭއްވުނު މި ނީލަމުގައި 100 އަށްވުރެ ގިނަ ތަކެތި ވިއްކާލިއެވެ. އޭގެތެރޭގައި ޖުރާސިކް ދައުރުގެ ސެރަޓޯސޯރަސްގެ ކަށިގަނޑެއް 26 މިލިއަން ޑޮލަރަށް، އަދި ޕެކީސެފަލޯސޯރަސްގެ ސްކަލް 1.4 މިލިއަން ޑޮލަރަށް ވަނީ ވިއްކާލާފައެވެ.