މަގުމަތީގެ ސަލާމަތާއި ރައްކާތެރިކަމަށް ބާރުއެޅުމުގެ ގޮތުން ހުޅުމާލޭ ދެވަނަ ފިޔަވަހީގެ ފުލުހުން ޚާއްސަ ހަރަކާތެއް ފަށައިފިއެވެ.

ފުލުހުން މިއަދު މި ފެށި ހަރަކާތުގެ ތެރެއިން، ހުޅުމާލޭ ފޭސް 2 ގެ ނިރޮޅު މަގުގައި، ހެނދުނުގެ ބާރުބޮޑު، މަގުތައް އެންމެ ބައިބޯވި ވަގުތުގައި، މަގުގެ އެކި އެކި ސަރަހައްދު ތަކުގައި ބޯޑުތައް ހިފައިގެން ތިބެ ފުލުހުން ވަނީ، "ލަސްވުމަށްވުރެ ފުރާނަ މުހިންމު!" ކަމަށް ބުނެ ވަރުގަދަ މެސެޖެއް އާއްމުންނަށް ދީފައެވެ. 

މިކަމާއި ގުޅިގެން ފުލުހުން މީސްމީޑިއާ ކޮށްފައިވާ ޕޯސްޓެއްގައި ބުނީ، ހެނދުނު އެ ވަގުތުތަކަކީ ސުކޫލްތަކަށް ކުދިން ވަގުތެއް ކަމަށެވެ.

އެހެން ނަމަވެސް، "އެއްވެސް އެޕޮއިންޓްމަންޓެއް، ކްލާހެއް ނުވަތަ މީޓިންގއެއްވެސް ފުރާނައަށްވުރެ މުހިންމެއް ނުވާނެ" ކަމަށް ފުލުހުން ވަނީ ހަނދާންކޮށްދީފައެވެ.

އަދި މީގެ އިތުރުން، "އަމިއްލަ ނަފްސުގެ ސަލާމަތަކީ ހަމައެކަނި އަމިއްލަ މީހާއަށް މުހިންމު ކަމެއް ނޫން“ ކަމަށާ، އެހެނެއް ކަމަކު އެއީ ”އެމީހެއްގެ ވަށައިގެން ތިބި އެންމެންނަށްވެސް މުހިންމު ކަމެއް" ކަމަށް ފުލުހުން ވަނީ ބުނެފައެވެ.

މި މެސެޖާއެކު ފުލުހުން ވަނީ، ދާންޖެހޭ ތަންތަނަށް ދާނޭ ވަގުތު އޮއްވައި، ކުރިއާލައި ގެއިން ނުކުތުމަށާއި، ސަމާލުކަމާއެކު ދުއްވުމަށް އިލްތިމާސްކޮށްފައެވެ.

ފުލުހުން މިފަދަ ހަރަކާތެއް ފަށާފައިވާއިރު، މިއަހަރުގެ ފުރަތަމަ ހަމަސްދުވަހުގެ ތެރޭގައި އެކަނިވެސް މާލެ، ބްރިޖް އަދި ހައިވޭގައި ހާހަކަށްވުރެ ގިނަ އެކްސިޑެންޓް ހިނގައިގެން ރިޕޯޓްކޮށްފައިވާކަމަށް ފުލުހުންގެ ތަފާސްހިސާބުތަކުން ދައްކައެވެ. މި އެކްސިޑެންޓްތަކުގައި 61 މީހަކަށް ސީރިއަސް އަނިޔާތައް ލިބިފައިވެއެވެ.

މީގެ ތެރެއިން މާލޭގައި 911 އެކްސިޑެންޓް ހިނގާފައިވާއިރު ގިނަ އެކްސިޑެންޓްތައް ހިނގާފައިވަނީ ދުވާލުގަޑީގައެވެ. އެގޮތުން ދުވާލުގަޑީގައި 745 އެކްސިޑެންޓް ހިނގިއިރު، ރޭގަނޑު ވަނީ 356 އެކްސިޑެންޓް ހިނގާފައެވެ. އެންމެގިނައިން އެކްސިޑެންޓް ހިނގާފައިވަނީ ކާރާއި ސައިކަލް ޖެހިގެންނެވެ. ދެން އެންމެ ގިނައީ ދެސައިކަލް ޖެހިެގންނެވެ.

އަދި ދާދިފަހުން ބާރު ސްޕީޑްގައި ދުއްވާފައި ދިޔަ ސައިކަލެއް، ދުވަން ނުކުމެ އުޅުނު މީހެއް ގައިގައި ޖެހި ހިނގި ނުރައްކާތެރި އެކްސިޑެންޓެއްގައި 17 އަހަރުގެ ކުއްޖެއް ވަނީ ނިޔާވެފައެވެ.