ކެރެޓް ހަލްވާ އަކީ ދިވެހިންގެ މެދުގައި މަގުބޫލު ފޮނި ކެއުމެކެވެ. އެހެންކަމުން މިއަދު ”ވޮއިސް“ ގެ ބަދިގެއިން މި ގެނެސްދެނީ މީރުކޮށް ކެރެޓް ހަލްވާ ހަދާނެ ގޮތެވެ. 

3 ބޮޑު ކެރެޓް (ހިމުންކޮށް ގާނާފައި)

3 މޭޒުމަތީ ސަމުސާ ގީ

1 ދަޅު ގެރިކިރު

2 މޭޒުމަތީ ސަމުސާ ކަސްޓަޑް ޕައުޑަރ

1/2 ސައި ސަމުސާ ވެނީލާ އެސެންސް

1/3 ސައި ސަމުސާ މުގުރި ކާފޫރު ތޮޅި

1/3 ޖޯޑު ކެޝޫނަޓް (ކުދި ކޮށް ކޮށާފައި) 

1/3 ޖޯޑު ހިކި މޭބިސްކަދުރު

1/2 ޖޯޑު ފުލްކްރީމް މިލްކް

1) އެއް ސަމުސާ ގީ ގެ ތެރޭގައި ނަޓްސްތައް ފްރައި ކޮށްލާށެެވެ. ކެޝޫނަޓާއި ހިކި މޭބިސްކަދުރު ފްރައި ކުރާނީ ވަކިވަކިންނެވެ. ދެން އެ ތަވައަކަށް ބާކީ ދެ ސަމުސާ ގީ ފޮދު އެޅުމަށްފަހު، ގާނާފައި ހުރި ކެރެޓް ކޮޅު އެއަށް އަޅާލައި، ގީ ގެ ތެރޭގައި ކެރެޓްކޮޅު މަޑުވަންދެން ކައްކާލާށެވެ. ކެރެޓް މަޑުވުމުން ކެރެޓްގެ ކުލަ ތަންކޮޅެއް ގަދަ ކުލައަކަށް ބަދަލުވާނެ އެވެ. 

2) ކެރެޓް މަޑު ވުމުން ގެރިކިރު ދަޅު އެއްކޮށް އަޅާލުމަށްފަހު ރަނގަޅަށް ހަލުވާލާށެވެ. 

3) ދެން 1/2 ޖޯޑު ފުލްކްރީމް މިލްކްގެ ތެރެއަށް ކަސްޓަޑް އަޅައި ގިރާލުމަށްފަހު، އެ މިކްސްޗަރ ކެރެޓްކޮޅުގެ ތެރެއަށް އަޅާލާށެވެ. 

4) ހަލްވާ ކޮޅު އޮލަ ވުމުން ވެނީލާ އެސެންސް، ކާފޫރު ތޮޅި އަދި ނަޓްސް އަޅައި އެކުލަވާލުމަށްފަހު އުނދުން ނިއްވާލާށެވެ. 

5) ދެން ޓްރޭ އަކަށް ހަލްވާ އަޅާފައި އޭގެ މައްޗަށް ގާނިޝް ކޮށްލަން ނަޓްސް ކޮޅެއް އަޅާލާށެވެ.