މި އަހަރުގެ މިހާތަނަށް ރާއްޖެއާއި ރާއްޖެއިން ބޭރުގައި ސްކޮލާޝިޕްތަކުގައި ކިޔަވާ ދަރިވަރުންނަށް 95 މިލިއަން ރުފިޔާ ދޫކޮށްފައިވާއިރު، ސްކޮލާޝިޕްތަކުގައި ކިޔަވާ ދަރިވަރުންގެ ތެރޭގައި އެންމެ ގިނައީ އަންހެންކުދިންކަން ހަޔާ އެޑިއުކޭޝަން މިނިސްޓްރީގެ ތަފާސްހިސާބުތަކުން ދައްކައިފިއެވެ. 

ހަޔާ އެޑިއުކޭޝަން މިނިސްޓްރީން އާއްމުކޮށްފައިވާ ތަފާސްހިސާބުތަކަށް ބަލާއިރު ސްކޮލާޝިޕްތަކުގައި ވިހި ގައުމެއްގައި 607 ދަރިވަރުން އަންނަނީ ތައުލީމު ހާސިލުކުރަމުންނެވެ. އެ ދަރިވަރުންގެ ތެރެއިން 387 ދަރިވަރުންނަކީ އަންހެން ދަރިވަރުންނެވެ. އެއިން 220 ދަރިވަރުންނަކީ ފިރހެން ދަރިވަރުންނެވެ. 

އޭގެ އިތުރަށް ތަފާސްހިސާބުތަކުން ފެންނަ ގޮތުގައި އަލަށް ސްކޮލާޝިޕްތަކުގައި ކިޔަވަން ފަށާ ކުދިންގެ ތެރެއިން ގިނަ ދަރިވަރުންނަކީ އަންހެން ދަރިވަރުންނެވެ. އެގޮތުން ނިމުނު އަހަަރު އަލަށް ސްކޮލާޝިޕްތަކުގެ ދަށުން ކިޔަވަން ފެށި 268 ދަރިވަރުންގެ ތެރެއިން 178 ދަރިވަރުންނަކީ އަންހެން ދަރިވަރުންނެވެ. ނިމުނު އަހަރު ސްކޮލާޝިޕުގެ ދަށުން ކިޔަވަން ފެށި ފިރިހެން ދަރިވަރުންނަކީ 90 ކުދިންނެވެ. 

މި އަހަރު އަލަށް ސްކޮލާޝިޕުތަކުގައި ކިޔަވަން ފެށީ 45 ދަރިވަރުންނެވެ. އެއިން 34 ދަރިވަރުންނަކީ އަންހެން ދަރިވަރުންނެވެ. އަދި މި އަހަރު ސްކޮލާޝިޕުތަކުގެ ދަށުން ކިޔަވަން ފެށީ 11 ފިރިހެން ދަރިވަރުންނެވެ. 

ތަފާސްހިސާބުތައް ދައްކާ ގޮތުން ނިމުނު އަހަރާއެކު މި އަހަރުގެ މިހާތަނަށް 344،220،070 (ތިންސަތޭކަ ސާޅީސްހަތަރު މިލިއަން ދެލައްކަ ވިހިހާސް ހަތްދިހަ) ރުފިޔާ ސްކޮލާޝިޕް ސްކީމުގެ ދަށުން ދޫކޮށްފައިވެއެވެ. މި އަހަރުގެ މިހާތަނަށް 95،303،176 (ނުވަދިހަަ ފަސް މިލިއަން ތިންލައްކަ ތިންހާސް ސަތޭކަހަ ހަތްދިހަ ހަ) ރުފިޔާއެވެ. 

މިނިސްޓްރީގެ ތަފާސްހިސާބުތަކަށް ބަލާއިރު ރާއްޖެ ހިމެނޭހެން 20 ގައުމެއްގައި ސްކޮލާޝިޕުތަކުގައި 607 ދަރިވަރުން އަންނަނީ ތައުލީމު ހާސިލުކުރަމުންނެވެ. މި އަހަރުގެ މިހާތަނަށްް 36 ސްކޮލާޝިޕެއްގެ ދަށުން 259 ޖާގައެއް ލިބިފައިވެއެވެ.