ބިންހެލުމާ ގުޅިގެން އުފެދިފައިވާ ސުނާމީގެ އަސަރު ރާއްޖެއަށް ނުކުރާނެ: މެޓް
ރަޝިއާ ކައިރިއަށް ރޭ އައި ބާރުގަދަ ބިންހެލުމާ ގުޅިގެން އުފެދުނު ސުނާމީގެ އަސަރު ދިވެހިރާއްޖެއަށް ނުކުރާނޭކަމަށް މޯލްޑިވްސް މީޓިއޮލޮޖިކަލް ސެންޓަރުން ބުނެފިއެވެ.
މޫސުމާ ބެހޭ ޤައުމީ އިދާރާއިން ބުނީ، ރަޝިއާ ކައިރިއަށް އައި ބިންހެލުމާ ގުޅިގެން އެހިސާބުގެ ބައެއް ސަރަހައްދުތަކަށް ސުނާމީގެ އަސަރު ކުރިނަމަވެސް، ރާއްޖެއަށް ސުނާމީގެ އަސަރު ނުކުރާނޭކަމަށެވެ.
ރޭ އެ ބިންހެލުން އައިސްފައިވަނީ ރަޝިއާގެ އިރުމަތީ އައްސޭރިފަށުގެ ހިސާބަށެވެ. ރަޝިއާގެ ކަމްޗަޓްކާ ޕެނިންސިއުލާއަށް 8.8 މެގްނިޓިއުޑް ބާރުމިނުގައި އައި މި ބިން ހެލުމުގެ ސަބަބުން އެ ސަރަހައްދުތަކުގެ އިމާރާތްތަކަށްވެސް ވަނީ ވަރަށްބޮޑެތި ގެއްލުންތަކެއް ލިބިފައެވެ. ބިންހެލުމާ ގުޅިގެން އުފެދުނު ސުނާމީގެ ރާޅުތައް މިހާރު ވަނީ ރަޝިއާގެ އައްސޭރިފަށުގެ ހިސާބުތަކުގެ އިތުރުން ޖަޕާނުގެ ރަށްތަކަށް އަރަން ފަށާފައެވެ. ރޭ ރަޝިއާ ކައިރިއަށް އައި މި ބިންހެލުމަކީ، 2011 ވަނަ އަހަރަށްފަހު 6 ވަނައަށް ރެކޯޑްކުރެވުނު އެންމެ ބާރުގަދަ ބިންހެލުމެވެ.
މި ބިންހެލުމާ ގުޅިގެން ސުނާމީގެ އިންޒާރު ދީފައިވަނީ ޕެސިފިކް ކަނޑުގައިވާ ޤައުމުތަކާއި ރަށްތަކަށެވެ.
Advertisement
This content is created and paid for by advertisers and does not involve Voice Journalists
