ލ. މާވަށުގައި ކަރަށް ވަޅި ހަރައިގެން މަރާލި އެރަށު ނަލަހިޔާގޭ އުމުރުން 29 އަހަރުގެ މޫސާ އިބްރާހީމްގެ ހަށިގަނޑު އޮޓޮޕްސީ ހެދުމަށް ބޭރަށް ގެންދިއުމަށް ނިންމައިފިއެވެ.
މޫސަގެ ހަށިގަނޑު އޮޓޮޕްސީ ހެދުމަށް ބޭރަށް ގެންދިއުމަށް ނިންމާފައިވާކަން ފުލުހުން ވަނީ މީޑިއާއަށް ޔަގީންކޮށްދީފައެވެ. މޫސަގެ ހަށިގަނޑު އޮޓޮޕްސީ ހެދުމަށް ނިންމީ ފުލުހުން ކުރިއަށްގެންދާ ތަހުގީގަށެވެ.
މޫސާ މުހައްމަދު މަރާލާފައިވަނީ މިދިޔަ ހޯމަދުވަހު އެރަށު ވޮލީކޯޓް ކައިރީގައި ހުއްޓައެވެ. އޭނާ މަރާލުމަށްޓަކައި ވަޅިން ހަމަލާދީފައިވަނީ އެވަގުތު އެރަށަށް ގޮސް އުޅުނު ހދ. ނޮޅިވަރަންފަރު، އަސަރީމަންޒިލް، އުމުރުން 29 އަހަރުގެ މުހައްމަދު އިބްރާހީމެވެ. ފުލުހުން ވަނީ ހަމަލާދިނުމަށް ބޭނުންކުރި ވަޅި ހޯދާފައެވެ. ވަޅި ހޯދާފައިވަނީ މޫދުންނެވެ.
މަރުގެ މި މައްސަލާގައި ގާތިލްކަމަށް ތުހުމަތުކުރެވޭ މުހައްމަދު އިބްރާހީމް މިހާރު ހުރީ ޝަރީއަތް ނިމެންދެން ބަންދުކޮށްފައެވެ. މިހާތަނަށް ލިބުނު މައުލޫމާތަށް ބަލާއިރު ވަޅިހެރުމުގެ ހާދިސާ ހިނގާފައިވަނީ، މަސްތުވާތަކެތީގެ މުއާމަލާތެއްގެ ތެރެއިންނެވެ. އެ ދެ މީހުންނަކީވެސް މަސްތުވާތަކެތި ބޭނުންކޮށް ވިޔަފާރިކުރާ ބައެއްކަމަށް އެރަށުން ވާހަކަދެއްކި ބައެއް މީހުން ވަނީ ބުނެފައެވެ. ފުލުހުން ބުނެފައިވަނީ ގާތިލްކަމަށް ތުހުމަތުކުރެވޭ މުހައްމަދަކީ ކުށުގެ ރެކޯޑް އޮންނަ މީހެއްކަމަށެވެ.
Advertisement
This content is created and paid for by advertisers and does not involve Voice Journalists
