ރާއްޖޭގެ ބާޒާރުގައި މުދަލުގެ އަގުތައް އުފުލި އިގްތިސާދީ ހާލަތު ދަށްވަމުންދާއިރު މަރުކަޒީ ބޭންކްގެ ގަވަރުނަރު އަހުމަދު މުނައްވަރު ހަނުހުންނަވާކަމަށް ވިދާޅުވެ އެމްޑީޕީގެ ޗެއާޕާސަން ފައްޔާޒް އިސްމާއީލް ވަރަށްބޮޑަށް ފާޑުވިދާޅުވެއްޖެއެވެ.

ފައްޔާޒް އެކްސްގައި ކުރެއްވި ޕޯސްޓެއްގައި ވިދާޅުވީ، ބާޒާރުގައި އާފަލެއްގެ އަގު 10 ރުފިޔާއަށް އަރައި ފިޔާ ކިލޯއެއްގެ އަގު 50 ރުފިޔާއިން މައްޗަށްގޮސް، ކާބޯތަކެއްޗަށް ދަތިވެއްޖެކަމަށެވެ. މީގެ އިތުރުން ބޭސް ނުލިބޭއިރު ޒަރޫރީ މުދަލުގެ އަގުތައް އުފުލި ޑޮލަރު ގަންނަން ލިބޭއަގުވެސް މިއަދު 20.20 ރުފިޔާއަށް އަރާފައިވާކަމަށް ފައްޔާޒް ވިދާޅުވިއެވެ. 

ފައްޔާޒުގެ މި ޕޯސްޓްގައި ވަނީ ކުދި ވިޔަފާރިތައް ދަރަނިވެ ހަލާކުވެއްޖެކަން ފާހަގަކޮށް، ސަރުކާރުން ނުދައްކާ ބިލުތައް 13 ބިލިއަން ރުފިޔާއަށް އަރައި ރާއްޖޭގެ އިގްތިސާދު މިއަދު ފުނޑިއްޖެކަމަށް ވިދާޅުވެފައެވެ.

އެގޮތުން މި ހާލަތަށް ދިޔައިރުވެސް ގާނޫނު އަސާސީން މަނިޓަރީ ސިޔާސަތު މަތިކޮށްފައިވާ މަރުކަޒީ ބޭންކުގެ ބަހެއް ނެތްކަމަށާއި މިކަންކަމާ ކަންބޮޑުވެ އެމްޑީޕީގެ ޕާލަމެންޓަރީ ގްރޫޕްއިން ލިޔުމުން ބައްދަލުކުރަން އެދުމުންވެސް ގަވަރުނަރާ ބައްދަލުކުރުމަށް ކުރި މަސައްކަތް ކާމިޔާބުވެފައި ނުވާކަމަށް ފައްޔާޒް ވިދާޅުިވިއެވެ. ރައްޔިތުން ހޮވާފައި ތިބި މަންދޫބުން ގައުމުގެ ހާލަތު ސާފުކުރަން މަސައްކަތް ކުރެއްވުމުން ފިއްލެވީކަން ފާހަަގަކުރަމުން ފައްޔާޒް ވަނީ އެއީ އެމްއެމްއޭއިން ޖަވާބު ނުދޭތާނގާ ރައްޔިތުންނަށް ކުރީ ބޮޑު މަލާމާތެއްގެ ގޮތުގައި ކަމަށްވެސް ފައްޔާޒު ވަނީ ސިފަކޮށްފައެވެ.

ގަވަރުނަރާ ބައްދަލުކުރުމަށް އެމްޑީޕީގެ އިސް ބޭފުޅުން މަރުކަޒީ ބޭންކުގައި

ފައްޔާޒު އެކްސްގައި ކުރެއްވި ޕޯސްޓްގައި ވިދާޅުވީ، ސަރުކާރުގެ އަމަލުތައް ހުރިގޮތުން އެއްޗެހީގެ އަގުތައް އަދިވެސް ދާނީ ދުވަހެއްދުވަހަކަށް ބޮޑުވަމުންކަމަށް ވިދާޅުވެފައެވެ.

އެއްޗެހީގެ އަގުބޮޑުވަމުންދާކަމަށް ވިދާޅުވެ ފައްޔާޒް ގަވަރުނަރަށާއި، ސަރުކާރަށް ފާޑުވިދާޅުވިއިރު، ރާއްޖެއަށް އިގްތިސާދީ މިހާލަތު ކުރިމަތިވި ހަގީގީ ސަބަބަކީ އެމްޑީޕީގެ ވެރިކަމުގައި އަމަލުކުރިގޮތުންކަމަށް މި ސަރުކާރުން ވަނީ ބުނެފައެވެ. އެގޮތުން ފައިސާ ޗާޕްކޮށް، އިންޓްރަސްޓްރޭޓް ބޮޑުކޮށް ކުރުމުއްދަތުގައި ދައްކަންޖެހޭގޮތަށް އުސޫލެއްނެތި ދަރަނިތައް ނަގަމުންދިޔުމުގެ ނަތީޖާއަކީ ރާއްޖެ މިހާލަތަށް ވެއްޓުމުގެ އަސްލުކަމަށް ސަރުކާރުން ވަނީ ބުނެފައެވެ.

ޑޮލަރުގެ މައްސަލައަށް ހައްލެއް ހޯދުމަށް ސަރުކާރުން ވަނީ ގިނަ ފިޔަވަޅުތަކެއް އަޅާފައެވެ. އެގޮތުން ޓޫރިޒަމް ވިޔަފާރިތަކުން ބޭންކްތަކަށް ވަކި އަދަދަކުން ޑޮލަރު މާރުކުރަން ލާޒިމްކުރުމަކީ މިގޮތުން އެޅި އެންމެ މުހިއްމު ފިޔަވަޅުކަަމަށް މަރުކަޒީ ބޭންކުން ވަނީ ބުނެފައެވެ. އެމްއެމްއޭއިން ވަނީ ވިޔަފާރިތަކަށް ޑޮލަރު ދޭ އަދަދު އިތުރުކުރުމުގެ ގޮތުންވެސް ފިޔަވަޅުތަކެއް އަޅާފައެވެ.