އަބްދުއްރަހުމާން މަރާލުން: އޮޓޮޕްސީ ރިޕޯޓުން ވަކި ކުރިއެރުމެއް ނުލިބުނު
އއ.މާޅޮހުގައި ރަހުމްކުޑަގޮތަކަށް މަރާލާފައި އޮއްވާފެނުނު އެރަށު އޯކިޑްމާގެ، ޢަބްދުއްރަޙްމާން އާދަމް (65 އަހަރު) ގެ ހަށިގަނޑުގެ ޕޯސްޓް މޯޓަމް ރިޕޯޓުގެ ނަތީޖާއިން ދައްކާފައިވަނީ އޭނާ މަރުވީ ބޮލަށް ލިބުނު އަނިޔާތަކުގެ ސަބަބުންކަމަށް ފުލުހުން ބުނެފިއެވެ.
އަނިޔާވެރިގޮތަކަށް އަބްދުއްރަހްމާން މަރާލާފައި އޮއްވާ ފެނިފައިވަނީ މިމަހު 13 ވަނަ ދުވަހުގެ ރޭ ދަންވަރުގެ ވަގުތެއްގައެވެ. އޭނާ މަރުވީ ސިއްހީ މަރުކަޒުގައި ފަރުވާ ދެމުންދަނިކޮށް އެ ރޭ ފަތިހުގެ ވަގުތެއްގައެވެ.
ފުލުހުން މީޑިއާތަކަށް ހިއްސާކުރި މެސެޖްގައި ބުނެފައިވަނީ ޕޯސްޓް މޯޓަމް ވަގުތީ ރިޕޯޓުން ދައްކާގޮތުގައި ޢަބްދުއްރަހްމާން މަރުވިކަމަށް ބުރަވެވެނީ ބޮލަށް ލިބުނު އަނިޔާތަކުގެ ސަބަބުންކަމަށެވެ.
ޕޯސްޓްމޯޓަމް ހެދުމަށްފަހު ޢަބްދުއްރަހްމާނުގެ ހަށިގަނޑު މާލެ ގެނެސްފައިވަނީ ޖުލައިމަހުގެ 24 ވަނަ ދުވަހުއެވެ. ޕޯސްޓްމޯޓަމް ހަދަން އަބްދުއްރަޙްމާންގެ ހަށިގަނޑު ފޮނުވީ އިންޑިޔާގެ ތްރިވަނަންތަޕޫރަމް އަށެވެ. ޕޯސްޓް މޯޓަމް ހެދުމަށްފަހު ރާއްޖެގެނެސް އޭނާ ވަޅުލާފައިވަނީ މިދިޔަ ބްރާސްފަތިދުވަހުއެވެ.
މި މައްސަލައާ ގުޅިގެން ފުލުހުންގެ ޓީމެއް މާޅޮހަށް ގޮސް ވަނީ ތަހުގީގު ކުރިއަށް ގެންގޮސްފަ އެވެ. އެ މައްސަލައާ ގުޅިގެން މިހާތަނަށް މީހަކު ހައްޔަރުކޮށްފަ އެއް ނުވެ އެވެ.
Advertisement
This content is created and paid for by advertisers and does not involve Voice Journalists
