މިހާރު ކުރިއަށްދާ ކާށިދޫ ކައުންސިލް ފުޓްބޯޅަ ޗެލެންޖް 2025 ގެ ސެމީފައިނަލް ދެވަނަ މެޗުގައި މިއަދު ހަވީރު ކާށިދޫ ޕޮލިސް ކުލަބާއި އެސްޕީއެސްސީ ކުޅުނު މެޗު ވާދަވެރި ކުޅުމަކަށްފަހު 3-2 ގެ ނަތީޖާއަކުން ކާމިޔާބުކޮށް ފައިނަލްގެ ދެވަނަ ޖާގަ އެސްޕީއެސްސީ އިން ހޯދަައިފިއެވެ.

މުބާރާތުގެ ސެމީފައިނަލުން ކާށިދޫ ޕޮލިސް ކުލަބު ޖާގަހޯދީ ގުރޫޕް ސްޓޭޖުގައި ކުޅުނު ތިން މެޗުން ހޯދި ހަ ޕޮއިންޓާއެކު ގުރޫޕް އޭގެ ދެވަނަ ޓީމުގެ ގޮތުގައެވެ. އަދި އެސްޕިއެސްސީ ސެމީފައިނަލުން ޖާގަހޯދީ ގުރޫޕް ސްޓޭޖުގައި ކުޅުނު ތިން މެޗުން ހޯދި ހަތް ޕޮއިންޓާއެކު ގުރޫޕް ބީގެ އެއްވަނަ ޓީމުގެ ގޮތުގައެެވެ.

މެޗުގެ ފުރަތަމަ ހާފުގައި މޮޅަށްކުޅެ އެސްޕިއެސްސީ އިން މެޗު ޑޮމިނޭޓްކުރިއިރު، އެޓީމުން މެޗުގެ ލީޑުހޯދީ ފުރަތަމަ ހާފުގެ 12 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ އަބާން މުހައްމަދު އެވެ. އަދި އެޓީމުގެ ދެވަނަ ލަނޑު އޭގެ 10 މިނެޓްފަހުން އަޖުލާން އަބްދުލް ހަންނާން ކާމިޔާބުކުރިއިރު، ތިންވަނަ ލަނޑު ދެވަނަ ހާފުގެ 10 ވަަނަ މިނެޓުގައި ކާމިޔާބުކޮށްދިނީ  އަހުމަދު މަޖީދު އެވެ.

އެސްޕިއެސްސީ އާއި ކާށިދޫ ޕޮލިސް ކުލަބު ވާދަކުރި މެޗުގެ ތެރެއިން... ފޮޓޯ: މާންގްރަފީ

މީގެ އިތުރުން ކާށިދޫ ޕޮލިސް ކުލަބުގެ ފުރަތަމަ ލަނޑު ދެވަނަ ހާފުގެ 20 ވަނަ މިނެޓުގައި އަހުމަދު ރާޒީ ކާމިޔާބުކުރިއިރު، އެޓީމުގެ ދެވަނަ ލަނޑު އޭގެ ނުވަ މިނެޓްފަހުން ކާމިޔާބުކޮށްދިނީ މޫސާ ނަބީލް އެވެ. އަދި މިމެޗުގެ މޮޅު ކުޅުންތެރިޔަކަށް ހޮވުނީ އެސްޕިއެސްސީގެ މުހައްމަދު ޝާކިރު އެވެ.

އާދިއްތަ ދުވަހުގެ ހަވީރު ކުޅޭ މުބާރާތުގެ ފައިނަލުގައި އެސްޕިއެސްސީ އިން ނުކުންނާނީ އެންމެ ފަހުގެ ޗެންޕިއަން އެމްޖީ ފުޓްބޯޅަ ޓީމާއި ދެކޮޅަށެވެ. އެމްޖީ ފުޓްބޯޅަ ޓީމު ފައިނަލުން ޖާގަހޯދީ ސެމީފައިނަލްގެ ފުރަތަަމަ މެޗުގައި ފަސޭހަކަމާއެކު 7-0 ގެ ތަފާތުބޮޑު ނަތީޖާއަކުން ފްލަޔާސް ބަލިކުރުމަށްފަހު އެވެ. 

24 ޖުލައި 2025 އިން 03 އޮގަސްޓް 2025 ގެ ނިޔަލަށް ކުރިއަށް ގެންދިއުމަށް ހަމަޖެހިފައިވާ މިމުބާރާތުގައި މިއަހަރު އަށް ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމެޖެހިފައިވަނީ ބައިވެރިވި އަށް ޓީމު ދެ ގުރޫޕަކަށް ބަހާލައިގެންނެވެ.

މެޗުގެ މޮޅު ކުޅުންތެރިޔަކަށް ހޮވުނު އެސްޕިއެސްސީގެ މުހައްމަދު ޝާކިރު.. ފޮޓޯ: މާންގްރަފީ

މީގެ އިތުރުން މިއަހަރުގެ މުބާރާތުގެ ޗެންޕިއަން ޓީމަށް 40،000 އަދި ރަނަރަޕް ޓީމަށް 25،000 ރުފިޔާގެ ފައިސާގެ އިނާމެއް ކާށިދޫ ކައުންސިލްގެ ފަރާތުން ވަނީ ކަޑައަޅާފައެވެ. 

މުބާރާތުގެ އޮފިޝަލް ޕާޓްނަރުންގެ ގޮތުގައި މީޑިއާ ޕާޓްނަރު ވޮއިސް ސްޕޯޓްސް، ޓްރަވަލް ޕާޓްނަރ މައިދޫ ސްޕީޑްސް އަދި ބޭވަރެޖް ޕާޓްނަރު ލަކީ ވޭ، ފޮޓޯގްރަފީ ޕާޓްނަރު މާން ގްރަފީ، ކިޓް ޕާޓްނަރު ބެންބޫ އަދި ޕްރިންޓިންގ ޕާޓްނަރަކަށް ރެޑް ކްރިއޭޓިވް ވަނީ ހަމަޖައްސާފައެވެ.

މީގެ އިތުރުން މުބާރާތުގެ ސަޕޯޓިންގ ޕާޓްނަރެއްގެ ގޮތުގައި އެމްޖީ ސްޕޯޓްސް އެކަޑަމީ ހިމަނާފައިވާއިރު، ކޯ ސްޕޮންސަރުންގެ ގޮތުގައި ފަންގި އިންވެސްޓްމަންޓް، ޑައިމަންޑް ރޫޓް، ކެފޭ ދި ބޮޑުގެ، އީއެކްސްއީ ޝޮޕްގެ އިތުރުން ކުދިރަތްމާ ވަނީ ހަމަޖައްސާފައެވެ.