ޖުލައި މަހުގެ 28 ވަނަ ދުވަހުގެ ހެނދުނު މާވަށުގައި ހިނގި ހަމަނުޖެހުމެއް ބޮޑުވެ ވަޅީގެ ހަމަލާއެއް އަމާޒުވެ އެ ރަށު ނަލަހިޔާގޭ އުމުރުން 29 އަހަރުގެ މޫސާ އިބްރާހީމް ވަނީ މަރުވެފަ އެވެ. މޫސައަށް ހަމަލާ ދިނުމުގެ ތުހުމަތު އޮތީ ހދ. ނޮޅިވަރަންފަރު، އަސަރީމަންޒިލް، އުމުރުން 29 އަހަރުގެ މުހައްމަދު އިބްރާހީމް (މޯޑް) އަށެވެ.

ހަމަލާއާ ގުޅިގެން ފަރުވާ ދިނުމަށް ސިއްހީ މަރުކަޒަށް ގެންދިޔައިރުވެސް މޫސަ ވަނީ މަރުވެފަ އެވެ. ހަމަނުޖެހުން ހިނގާ މޫސައަށް ވަޅިން ހަމަލާ ދިނުމަށް ފަހު މޯޑް ފުލުހަށް ހާޒިރުވީ އަމިއްލައަށެވެ. ފުރަތަމަ އޭނާ ދިޔައީ މޫދު ކައިރިއަށެވެ. ގޮސް ގައިގައި ހުރި ލޭތައް ދޮވެ ސާފުކޮށް މޫސައަށް ހަމަލާ ދިނުމަށް ބޭނުންކުރި ވަޅި މޫދަށް އެއްލާލިއެވެ.

އަދި ބަނދަރުމަތީ ހުރި މާވަށު ޕޮލިސް ސްޓޭޝަނަށް ދިޔަ އެވެ. ދިޔައީ އަމިއްލައަށް ފުލުހުންނާއި ހަވާލުވުމަށެވެ. ނަމަވެސް އެ ވަގުތު ސްޓޭޝަން ހުރީ ހުސްކޮށެވެ. ފުލުހުން އައީ ސްޓޭޝަންގެ ކޮފީ ބޯ ސަރަހައްދުގައި މޯޑް އިންްނަތާ އިރުތަކެއްގެ ފަހުންނެވެ.

-- މިއީ އެެ ރަށުން ވާހަކަ ދެއްކި މަންޒަރު ފެނުނު އަދި ކަން ހިނގާދިޔަ ގޮތް އެނގޭ މީހުން ނޫސްތަކަށް މައުލޫމާތު ދިން ގޮތެވެ.

އެހެން ކަމުން ޕޮލިސް ސްޓޭޝަން ހުސްކޮށް ހުރި ސަބަބާއި ގުޅޭގޮތުން ނޫސްވެރީން ސުވާލުކުރި އެވެ. ނޫސްވެރިޔާ މަރިޔަމް އިސާދާ ފުލުހުންނާއި އެ ސުވާލުކުރުމުން އެ ސުވާލުގެ ޖަވާބު މީޑިއާތަކާއި މިއަދު ވަނީ ހިއްސާކޮށްފަ އެވެ.

ފުލުހުން ބުނި ގޮތުގައި މަރުގެ މި މައްސަލާގައި ތުހުމަތުކުރެވޭ މީހާ ސްޓޭޝަނަށް ހާޒިރުވެފައިވަނީ މައްސަލައިގެ ރިޕޯޓު ލިބުމުން ސްޓޭޝަންގެ ހުރިހާ ފުލުހުން ކުށުގެ ވެއްޓަށް ދިޔަ ވަގުތު އެވެ. ސްޓޭޝަން ހުސްކޮށް ހުރީ އެ ސަބަބާއި ގުޅިގެންނެވެ.

މި މައްސަލައާ ގުޅިގެން ހިންގާ ތަހުގީގަށް ބޭނުންވާ މައުލޫމާތު ހޯދުމަށް މޫސާ އިބްރާހީމްގެ ހަށިގަނޑު އޮޓޮޕްސީ ހެދުމަށް ބޭރަށް ގެންދިއުމަށް ވަނީ ނިންމާފަ އެވެ.

މަރުގެ މި މައްސަލާގައި ގާތިލްކަމަށް ތުހުމަތުކުރެވޭ މުހައްމަދު އިބްރާހީމް މިހާރު ހުރީ ޝަރީއަތް ނިމެންދެން ބަންދުކޮށްފައެވެ. މިހާތަނަށް ލިބުނު މައުލޫމާތަށް ބަލާއިރު ވަޅިހެރުމުގެ ހާދިސާ ހިނގާފައިވަނީ، މަސްތުވާތަކެތީގެ މުއާމަލާތެއްގެ ތެރެއިންނެވެ. އެ ދެ މީހުންނަކީވެސް މަސްތުވާތަކެތި ބޭނުންކޮށް ވިޔަފާރިކުރާ ބައެއްކަމަށް އެރަށުން ވާހަކަދެއްކި ބައެއް މީހުން ވަނީ ބުނެފައެވެ. ފުލުހުން ބުނެފައިވަނީ ގާތިލްކަމަށް ތުހުމަތުކުރެވޭ މުހައްމަދަކީ ކުށުގެ ރެކޯޑް އޮންނަ މީހެއް ކަމަށެވެ.

ފުލުހުން ވަނީ ހަމަލާދިނުމަށް ބޭނުންކުރި ވަޅި ހޯދާފައެވެ. ވަޅި ހޯދާފައިވަނީ މޫދުންނެވެ. ވަޅި އޮތްތަން ދެއްކީ ވެސް މޯޑް އެވެ.