އުއްތަމަ ފަނޑިޔާރަކަށް އަބްދުލްޢަނީ އައްޔަނުކުރުމަށް ހުށަހަޅުއްވައިފި
އުއްތަމަ ފަނޑިޔާރުގެ މަގާމަށް ސުޕްރީމް ކޯޓްގެ ކުރީގެ ފަނޑިޔާރު އަބްދުލްޣަނީ މުހައްމަދު އައްޔަނުކުރުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ރައްޔިތުންގެ މަޖިލީހަށް ފޮނުއްވައިފިއެވެ.
މަޖިލީހަށް ޢަނީގެ ނަން މަޖިލީހަށް ފޮނުއްވިއިރު، އުއްތަމަފަނޑިޔާރުގެ މަގާމަށް ހުޅުވާލި ފުރުސަތުގައި އެ މަގާމަށް ތިން ބޭފުޅަކު ވަނީ ކުރިމަތިލައްވާފައެވެ. އުއްތަމަ ފަނޑިޔާރުގެ މަގާމަށް ހުޅުވާލީ އުއްތަމަ ފަނޑިޔާރުގެ މަގާމުގައި ހުންނެވި އަހުމަދު މުތަސިމް އަދުނާން ފަނޑިޔާރުކަމުގެ މަގާމުން ޝަރަފްވެރިކަމާއެކު ރިޓަޔާ ކުރެއްވުމުންނެވެ.
އުއްތަމަ ފަނޑިޔާރުކަމަށް ކުރިމަތިލެއްވި ބޭފުޅުންގެ ތެރޭގައި ހިމެނިވަޑައިގަންނަވަނީ، ޢަނީގެ އިތުރުން ފެމެލީ ކޯޓްގެ ގާޒީ, ކްރިމިނަލް ކޯޓްގެ ކުރީގެ އިސް ގާޒީ ޢަބްދުﷲ މުހައްމަދާއި، ހައިކޯޓްގެ ކުރީގެ އިސް ފަނޑިޔާރު ސުޖާއު އުސްމާނެވެ.
ޖުޑީޝަލް ސާވިސް ކޮމިޝަނުން އެ ތިން ބޭފުޅުންގެ ނަން ދިރާސާކުރެއްވުމަށްފަހު އުއްތަމަ ފަނޑިޔާރުގެ މަގާމަށް އައްޔަނުކުރުމަށް އެންމެފުރަތަމަ އިސްކަންދެއްވީ ޢަނީގެ ނަމެވެ.
ސުޕްރީމް ކޯޓްގެ ކުރީގެ ފަނޑިޔާރު އަބްދުލްޣަނީ މުހައްމަދު މަގާމުން ވަކިކުރެއްވީ 2019 ވަނަ އަހަރެވެ. ޢަނީ ވަނީ މަދަނީ ކޯޓުގެ ގާޒީކަމާއި، ހައި ކޯޓުގެ ފަނޑިޔާރުކަންވެސް ކުރައްވާފައެވެ.
އުއްތަމަފަނޑިޔާރުކަމަށް ކުރިމަތިލާ މީހެއްގެ ޝަަރުތުތަކުގެ ތެރޭގައި އުމުރުން 30 އަހަރުވެފައިވާ މީހަކަަށްވުމާއި ފަަނޑިޔާރުކަމުގައި ނުވަތަ ގާނޫނީ ވަކީލުކަން ކުރުމުގައި ނުވަތަ ފަނޑިޔާރުކަމައި ވަކާލާތުކުރުމުގައި ހަތް އަހަރު ދުވަހުގެ ތަޖުރިބާ ލިބިފައިވާ ފަރާތަކަށް ވާންޖެހެއވެެ.
Advertisement
This content is created and paid for by advertisers and does not involve Voice Journalists
