އުއްތަމަ ފަނޑިޔާރުގެ މަގާމަށް ސުޕްރީމް ކޯޓްގެ ކުރީގެ ފަނޑިޔާރު އަބްދުލްޣަނީ މުހައްމަދު އައްޔަނުކުރުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ރައްޔިތުންގެ މަޖިލީހަށް ފޮނުވާފައިވާ މައްސަލާގައި ޣަނީއަށް ރުހުން ދިނުމަށް ފެންނަ ކަމަށް ކަމާގުޅޭ ކޮމެޓީން މިއަދު ފާސްކޮށްފި އެވެ.
މަޖިލީހަށް ޢަނީގެ ނަން މަޖިލީހަށް ފޮނުއްވިއިރު، އުއްތަމަފަނޑިޔާރުގެ މަގާމަށް ހުޅުވާލި ފުރުސަތުގައި އެ މަގާމަށް ތިން ބޭފުޅަކު ވަނީ ކުރިމަތިލައްވާފަ އެވެ. އުއްތަމަ ފަނޑިޔާރުގެ މަގާމަށް ހުޅުވާލީ އުއްތަމަ ފަނޑިޔާރުގެ މަގާމުގައި ހުންނެވި އަހުމަދު މުތަސިމް އަދުނާން ފަނޑިޔާރުކަމުގެ މަގާމުން ޝަރަފްވެރިކަމާއެކު ރިޓަޔާ ކުރެއްވުމުންނެވެ.
އުއްތަމަ ފަނޑިޔާރުކަމަށް ކުރިމަތިލެއްވި ބޭފުޅުންގެ ތެރޭގައި ހިމެނިވަޑައިގަންނަވަނީ، ޢަނީގެ އިތުރުން ފެމެލީ ކޯޓްގެ ގާޒީ, ކްރިމިނަލް ކޯޓްގެ ކުރީގެ އިސް ގާޒީ ޢަބްދުﷲ މުހައްމަދާއި، ހައިކޯޓްގެ ކުރީގެ އިސް ފަނޑިޔާރު ސުޖާއު އުސްމާނެވެ.
ޖުޑީޝަލް ސާވިސް ކޮމިޝަނުން އެ ތިން ބޭފުޅުންގެ ނަން ދިރާސާކުރެއްވުމަށްފަހު އުއްތަމަ ފަނޑިޔާރުގެ މަގާމަށް އައްޔަނުކުރުމަށް އެންމެފުރަތަމަ އިސްކަންދެއްވީ ޢަނީގެ ނަމެވެ. އެ ނިންމުމާއި ގުޅިގެން ރައީސް ވަނީ ޣަނީގެ ނަން މަޖިލީހަށް ފޮނުއްވާފަ އެވެ.
މަޖިލީހުގެ މިއަދުގެ ޖަލްސާގައި ރައީސްގެ ސިޓީފުޅު އިއްވެވުމަށް ފަހު އެ މައްސަލާގައި ގޮތް ނިންމެވުމަށް ރައްޔިތުންގެ މަޖިލީހުގެ ޖުޑީޝަރީ ކޮމިޓީއަށް ފޮނުވާފަ އެވެ. އެ ކޮމެޓީން މިއަދު އެއްވެ ޣަނީއަށް ރުހުން ދޭން ފެންނަ ކަމަށް ވަނީ ކަނޑައަޅާފަ އެވެ. އެ ނިންމުން ނިންމީ ކޮމެޓީގެ އިއްތިފާގުންނެވެ.
ސުޕްރީމް ކޯޓްގެ ކުރީގެ ފަނޑިޔާރު އަބްދުލްޣަނީ މުހައްމަދު މަގާމުން ވަކިކުރެއްވީ 2019 ވަނަ އަހަރެވެ. ޢަނީ ވަނީ މަދަނީ ކޯޓުގެ ގާޒީކަމާއި، ހައި ކޯޓުގެ ފަނޑިޔާރުކަންވެސް ކުރައްވާފައެވެ.
Advertisement
This content is created and paid for by advertisers and does not involve Voice Journalists
