ރައީސް އޮފީހުން ސިޓީ އާއްމު ނުކުރިނަމަ، ފޯޅަވަހި މައްސަލާގައި ކުރިއަށް ދެވޭނެ: ޑރ.ހަލީލް
ފޯޅަވެއްސާ ގުޅޭގޮތުން ލިޔުނު ސިޓީ، މިދިޔަ ސަރުކާރުން އާއްމު ނުކުރިނަމަ އެ މައްސަލާގައި ކުރިއަށް ދެވުނީސްކަމަށް މި ސަރުކާރުގެ ހާރިޖީ ވަޒީރު ޑރ.ޢަބްދުﷲ ހަލީލް ވިދާޅުވެއްޖެއެވެ.
ފޯޅަފަހި ކަނޑުގެ މައްސަލާގައި އަދުގެ ސަރުކާރުގެ ސިޔާސަތަކީ ކޮބައިތޯ ވިލުފުށި ދާއިރާގެ މެމްބަރު ހަސަން ވަހީދު ސުވާލުކުރެއްވުމުން ވަޒީރު ވިދާޅުވީ މިދިޔަ ސަރުކާރުން ފޮނުވި ފޭކް ސިޓީއެއްގެ ސަބަބުން ރާއްޖޭގެ މަސްވެރިން މަސްވެރިކަން ކުރަމުންދިޔަ 45 ހާސް އަކަ ކިލޯ މީޓަރުގެ ކަނޑުގެ ސަރަހައްދެއް ރާއްޖެއަށް ގެއްލިގެންދިޔަ ކަމަށެވެ. ވަޒީރު ވިދާޅުވީ އެކަމުގެ ސަބަބުން ރާއްޖޭގެ މަސްވެރިކަމަށް އަދި ވަކިން ހާއްސަކޮށް ދެކުނުގެ މަސްވެރިކަމަށް ބުރޫއެރިކަމަށް މަސްވެރިްނގެ ފަރާތުން މައުލޫމާތު ލިބިފައިވާކަމަށެވެ.
ހަލީލް ވިދާޅުވީ އެ ސިޓީ ބޭރުނުވިނަމަ ފޯޅަވަހި ކަނޑުގެ މައްސަލައާއި ފޯލަވަހީގެ މައްސަލާގައި ދިވެހިންނަށް ކުރިއަށްދެވުނީސްކަމަށެވެ. ވަޒީރު ވިދާޅުވީ ބޭރުގެ އެކިއެކި ލޯޔަރުން ހޯދައިގެން އެ މައްސަލަ އިތުރަށް މުރާޖައާކުރުމުގެ މަސައްކަތް މި ސަރުކާރުން ކުރަމުންދާކަމަށެވެ.
ފޯޅަވަހި މައްސަލާގައި އެންމެފަހުން އެޓާނީ ޖެނެރަލް އަހުމަދު އުޝާމް ވިދާޅުވެފައިވަނީ، ޗާގޯސްގެ މިނިވަންކަން މޮރިޝަސްއަށް ދިނުމަށް އިނގިރޭސިވިލާތުން ނިންމި ނިންމުމާ ގުޅިގެން ރާއްޖެއަށް ގޮންޖެހުންތަކެއް އެބަހުރިކަމަށެވެ. އެގޮތުން ޗާގޯސް މައްސަލާގައި އިނގިރޭސިވިލާތުން ނިންމި ނިންމުމުގެ ސަބަބުން މުޅި މައްސަލާގައި ރާއްޖެއިން ގެންގުޅެމުން އައި ރޭވުންތައް ބަދަލުކުރަން ޖެހިފައިވާކަން އުޝާމް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
