މާލޭގެ މަގުތައްމަތީގައި ދިގު މުއްދަތެއްވަންްދެން ބޭނުންނުކޮށް ދޫކޮށްލާފައި ހުންނަ އުޅަނދުތައް ނެގުމަށް ފުލުހުން ކުރަމުންގެންދާ މަސައްކަތްތަކުގެ ދަށުން މިއަދުވެސް ގިނަ އަދަދެއްގެ ކާރާއި ސައިކަލްތައް ޓޯކޮށްފިއެވެ.
ފުލުހުން ބުނީ މަގުތަކަށް ދޫކޮށްލާފައި ހުންނަތާ ގިނަދުވަސްވީ އުޅަނދުތައް ނެގުމަށް ފުލުހުން މިހާރު ކުރިއަށްގެންދާ ހަރަކާތުގައި މިއަދު އެކަނިވެސް 40 ކާރާއި 168 ސައިކަލް މާލޭގެ އެކި ސަރަހައްދުތަކުން ނަގާފައިވާކަމަށެވެ.
އެ އުޅަނދުތައް ނަގާފައިވަނީ ބޭނުންނުކޮށް ގިނަދުވަސްވުމާއި އަދި އެ އުޅަނދެއްގެ ސަބަބުން އާއްމުނަށް އުނދަގޫވާ އުޅަނދުތައްކަމަށް ފުލުހުން ބުންޏެވެ. ފުލުހުން އެފަދަ އުޅަނދެއް ނަގަނީ ވަރަށް ރަނގަޅަށް ބެލުމަށްފަހު، އެ އުޅަނދަކީ އެތަނެއްގައި ހުންނަތާ ގިނަދުވަސްވީ އުޅަނދެއްކަން އެނގޭފަދަ ކިތާބީ ހެކިތަކާއެކުގައެވެ.
އާންމުންނަށް ދަތިވާގޮތަށްގޮތަށް، ދިގު މުއްދަތަކަށް ބޭނުން ނުކޮށް ދޫކޮށްލާފައިވާ އުޅަނދުތައް ނެގުމުގެ މަސައްކަތް، ފުލުހުން ކުރަނީ މާލޭގެ މަގުތަކުގެ ބަލަދުވެރިފަރާތް މާލެ ސިޓީ ކައުންސިލާއި، އަދި ސިޓީތަކާއި އިދާރީ ދާއިރާތައް ހިންގުމާބެހޭ ވުޒާރާ ގުޅިގެންނެވެ.
ސައިކަލެއް ޓޯކުރުމުގެ ކުރިން ފުލުހުން ބަލަނީ.. ފޮޓޯ: ފުލުހުން
މާލޭގެ މަގުތަކުގައި ބޭނުންނުކޮށް ގިނަދުވަސްވީ އުޅަނދުތައް ހުންނަ މައްސަލައަކީ ވަރަށްގިނަ ރައްޔިތުންގެ ޝަކުވާއެކެވެ. މަގުތަކަށް ދޫކޮށްލާފައި ހުންނަ އުޅަނދުތައް ނެގުމަށް މީގެ ކުރިން އެކި ފަހަރުމަތިން ފުލުހުން މި ހަރަކާތް ކުރިއަށްގެންދިޔައިރު، އެއިން ކޮންމެ ފަހަރެއްގައި ގިނަ އަދަދެއްގެ އުޅަނދުތައް ވަނީ ޓޯކޮށްފައެވެ.
މާލޭގެ އިތުރުން ހުޅުމާލޭގެ ފޭސް އެކެއް އަދި ފޭސް ދޭއްގެ އެކި ސަރަހައްދުތަކުގައިވެސް މިފަދަ އުލަނދުތައް ދޫކޮށްލާފައި ހުންނަކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
